ދިފާޢީ ބާރުގެ އަސްކަރީ ޤާބިލުކަން އިތުރުކުރަން ރައީސް މުޢިއްޒު ކުރައްވާ މަސައްކަތަށް ޣައްސާންގެ ޝުކުރު

ދިފާޢީ ބާރުގެ އަސްކަރީ ޤާބިލުކަން އިތުރުކުރަން ރައީސުލްޖުމްހޫރިއްޔާ އަދި ސިފައިންގެ މަތީ ވެރިޔާ ޑރ. މުޙައްމަދު މުޢިއްޒު ކުރައްވާ މަސައްކަތަށް ދިފާޢީ ވަޒީރު ޣައްސާން މައުމޫން ޝުކުރު އަދާކުރައްވައިފިއެވެ.

133 ވަނަ ސިފައިންގެ އަހަރީ ދުވަހުގެ ތަހުނިޔާ ރައީސް މުޢިއްޒަށާއި، ސިފައިންގެ ލީޑާޝިޕަށާއި ސިފައިންނަށް ފޮނުއްވައި، މިއަދު އެކްސްގައި ކުރެއްވި ޕޯސްޓުގައި ވިދާޅުވީ، ދިވެހި އަސްކަރިއްޔާގެ ޤާބިލިއްޔަތު އިތުރު ކުރައްވަން ރައީސް މުޢިއްޒު ވަރަށް ބުރަ މަސައްކަތް ކުރައްވާ ކަމަށެވެ.

އަދި އެކަމަށްޓަކައި، ދިވެހި ސިފައިންގެ ނަމުގަޔާއި، މިނިސްޓްރީ އޮފް ޑިފެންސްގެ ނަމުގަޔާއި، ދިވެހި ރައްޔިތުންގެ އަދި ވަޒީރުގެ ނަމުގައި ހިފެހެއްޓުމެއްނެތި ޝުކުރު އަދާކުރައްވާ ކަމަށް ވިދާޅުވިއެވެ.

މި ސަރުކާރަށް މި ވީ ދުވަސްތަކުގެ ތެރޭގައި ދިވެހި އަސްކަރިއްޔާއަށް ބޮޑެތި ބަދަލުތަކެއް ސަރުކާރުންވެސް އަންނަނީ ގެންނަމުންނެވެ.

އެގޮތުން، ދާދި ފަހުން ދިވެހި ސިފައިންގެ ފައުޖުގެ ތެރެއަށް ”އެއަރ ކޯރ“ އިތުރުކޮށް، ޒަމާނީ ޓެކްނޮލޮޖީގެ އެންމެ ކުރީސަފުގައި އެއްހަމަކުރަމުން އަންނަ އާލާތްތައް ވަނީ އިތުރު ކުރެވިގެން ގޮސްފައެވެ. މި އާލާތްތަކާއެކު ވަށާޖެހޭގޮތައް ވަރަށް ގިނަ ކަންކަމަށް ކުރިއެރުން ލިބިގެންދާނެއެވެ.

މީގެ އިތުރުން ސިފައިންގެ އެއްގަމުގެ ބާރުވެސް ވަރުގަދަކުރުމަށް ޒަމަނީ އުޅަނދުތަކާއި ވަސީލަތްތައް ސަރުކާރުން ވަނީ ހޯދާފައެވެ. އެ އުޅަނދުތައް އެންމެފަހުން ބޭއްވި ސިފައިންގެ މަގުމަތީ ޝަރަފްގެ ހިނގާލުމުން ފެނިގެންދިޔައެވެ.