ކުރީ ސަރުކާރުން ކުންފުނިތައް ހިންގި ގޮތުން ޖުމްލަ ދަރަނި 98 ބިލިއަނަށް އަރާ: މުނައްވަރު

ކުރީ ސަރުކާރުން ކުންފުނިތައް ހިންގި ގޮތުން ޖުމްލަ ދަރަނި 98 ބިލިއަނަށް އަރާކަމަށް ކުރީގެ ފިނޭންސް މިނިސްޓަރު އަދި މިހާރުގެ ފިނޭންސް މިނިސްޓަރުގެ އެޑްވައިޒަރު އަހުމަދު މުނައްވަރު ވިދާޅުވެއްޖެއެވެ.

ދައުލަތުގެ މީޑިޔާ ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަ ދައްކަވަމުން މުނައްވަރު ވިދާޅުވީ، މިދިޔަ ފަސް އަހަރު ކުންފުނިތައް ހިންގާފައި ވަނީ ދަަރަނި އަދާކުރެވޭނެ ގޮތްތައް ނުބަލާ ކަމަށެވެ.

އެގޮތުން، 2018 ވަނަ އަހަރު 2.8 ބިލިއަން ރުފިޔާގައި ހުރި ސްޓެލްކޯގެ ދަރަނި، ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަން ނިމުނުއިރު، 3.8 ބިލިއަން ރުފިޔާ އަރާފައިވާ ކަން މުނައްވަރު ފާހަގަ ކުރެއްވިއެވެ.

އަދި ހަމަ އެހެންމެ، އައިލެންޑް އޭވިއޭޝަންގެ ދަރަނި ވެސް އެއް ބިލިއަނުން ހަތަރު ބިލިއަން ރުފިޔާ އަށް އިތުރުވި ކަން މުނައްވަރު ވަނީ ފާހަގަކުރައްވާފައެވެ.

"ޖުމްލަ ދަރަނި 2022 ވަނަ އަހަރު ނިމުނު އިރު 32 ބިލިއަން ރުފިޔާ އަށް އަރާ. އެއީ ސީދާ ލޯނު ދަރަނި. އަދި ޖުމްލަ ދަރަނި އެހެނިހެން ލައިބިލިޓީސް ހިމަނައިގެން 98 ބިލިއަންގައި އެބަ އުޅޭ. އެބަހުރި ފިސްކަލް އިންޑިސިޕްލީންކޮށް ހިންގާފައި ހުރި ކުންފުނިތައް،"

މުނައްވަރު ވިދާޅުވިއެވެ.

މީގެ އިތުރުން 2018 ވަނަ އަހަރު 1.2 ބިލިއަން ގައި ހުރި ފެނަކައިގެ ޖުމްލަ ދަރަނި، 2023 ވަނަ އަހަރު 4.3 ބިލިއަނަށް އިތުރު ވެފައިވާކަމަށް ވެސް އަންވަރު ވިދާޅުވިއެވެ.

މުނައްވަރު އިތުރަށް ވަނީ، މި ސަރުކާރުން ކުންފުނިތަކުގެ ޚަރަދު ކުޑަކުރުމަށް މުހިއްމު ފިޔަވަޅުތަކެއް އަޅަން ރާވާފައިވާ ކަމަށް ވިދާޅުވެފައެވެ.