މިދިޔަ ސަރުކާރުން ޕްރިންސިޕަލުންނަށާއި ޓީޗަރުންނަށް ވަނީ އެކި ގޮތްގޮތުން ”އަނިޔާވެރިވެފައި“: ވަޒީރު ޝަފީޢު

ތަޢުލީމީ ދާއިރާއަށް ދިމާވި އެންމެބޮޑު ގޮންޖެހުމަކީ މިދިޔަ ސަރުކާރުން ޕްރިންސިޕަލުންނަށާއި ޓީޗަރުންނަށް އަނިޔާވެރިވެފައިވުން ކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

ދައުލަތުގެ މީޑިއާއިން ގެނެސްދިން ”ހަފްތާ 52“ ޕެނަލް ޑިސްކަޝަންގައި ވާހަކަ ދައްކަވަމުން ވަޒީރު ޝަފީޢު ވިދާޅުވިގޮތުގައި، ނިމިދިޔަ ސަރުކާރުގައި 40 އެއްހާ ޕްރިންސިޕަލުން އެ ބޭފުޅުން ވަޒީފާ އަދާކުރަމުންދިޔަ ރަށް ނޫން އެހެން ރަށް ރަށަށް ބަދަލުކޮށްފައިވާ ކަމަށެވެ.

އެންމެ ބޮޑު އެއް ގޮންޖެހުމަކަށް ވީ ކަމަކީ އަނިޔާވެރިވެފައިވުން. ސާޅިހަކަށް ސުކޫލުގެ ޕްރިންސިޕަލުން އެބޭފުޅުން މަސައްކަތް ކިރައްވާ ތަން ނޫން އެހެން ރަށް ރަށަށް ފޮނުވާލެވިފައި. އަނބިދަރިންނާއި ދުރަށް. އެ މަގާމު އެގޮތަށް ބަހައްޓާފައި އެހެން ރަށެއްގައި މަސައްކަތް ކުރަން މަޖުބޫރު ވެފައިވުން.

ވަޒީރު ޝަފީޢު

އަދި ޓީޗަރުންނަށްވެސް އެކި ގޮތް ގޮތުން ބިރުދައްކައި، ”އަނިޔާވެރިވެފައިވާ“ ކަމަށް ވިދާޅުވިއެވެ.

މިނިސްޓަރީ އޮފް އެޑިޔުކޭޝަނަށް އެކި ގޮތް ގޮތުން ލިބިފައިވާ މައުލޫމާތުން، 300 އެއްހާ ޓީޗަރުންނަށް، އެއްވެސް ހެއްކެއް ގަރީނާއެއް، މާބޮޑު ސާބިތުކަމެއް ނެތި އިންޒާރު ދެވިފައި، ބިރުދައްކާފައި

ވަޒީރު ޝަފީޢު

މިއާއެކު ވަޒީރު ވިދާޅުވީ، ޓީޗަރުންނަކީ ދަރިވަރުންނަށް ކިޔަވައި ދިނުމުގެ އެންމެ މުހިންމު ޒިންމާ ކޮނޑުގައި އެޅިފައި ތިބޭ ފަރާތްތައް ކަމަށާ، އެހެން ކަމުން، ބިރުވެރި ކަމެއްގައި ތިބެގެން އެ ޒިންމާ އަދާނުކުރެވޭނެ ކަމަށާ، އަދި 40 ޕްރިންސިޕަލުން އެހެން ރަށްރަށަށް ބަދަލުކުރުމުން، ދެންތިބި ބޭފުޅުންނަށްވެސް ވާނެ ގޮތަކާމެދު އެ ބޭފުޅުން ވިސްނައި ނުތަނަވަސްވާނެ ކަމަށެވެ.

ކަންމިހެން ހުރުމުން، ވަޒީރު ކަމާއި ހަވާލުވެވަޑައިގެންނެވުމަށްފަހު، އެ 40 ޕްރިންސިޕަލުންނަށް އިންސާފް ހޯއްދަވައިދެއްވާފައިވާނެ ކަމަށް ވަޒީރު ވިދާޅުވުއެވެ. އަދި ޕްރިންސިޕަލުން ”ތިއްބަވަންޖެހޭ ތަނަށް ބަދަލުކުރެވުފައި“ ވާނެ ކަމަށް ވިދާޅުވިއެވެ.

އަދި އޭގެ އިތުރުން، މުވައްޒަފުންނަކީ ގަދަރުވެރި ބަޔަކަށް ހެދުމަށް، ފާއިތުވެދިޔަ މުއްދަތުގެ ތެރޭގައި އެއްވެސް މުދައްރިސަކަށް ބިރުދައްކާފައި ނުވަތަ އިންޒާރުދީފައި ނުވާނެ ކަމަށްވެސް ޝަފީޢު ވިދާޅުވިއެވެ.