ކ އަތޮޅުން ފެށިގެން އައްޑޫސިޓީގެ ރަށްތަކަށް، އުދަ އަރާފާނެކަމަށް ލަފާކޮށްފި

ކ.އަތޮޅުން ފެށިގެން އައްޑޫސިޓީގެ ރަށްތަކާ ހަމަޔަށް އުދައަރާނޭކަމަށް މޫސުމާ ބެހޭ ޤައުމީ އިދާރާއިން ލަފާކޮށްފިއެވެ.

މޯލްޑިވްސް މީޓިއޮލޮޖިކަލް ސެންޓަރުން ބުނީ، މިއަދުގެ މެންދުރުފަހު 15:30 ހަމަޔަށް ކ އަތޮޅުން ފެށިގެން އައްޑޫ ސަރަހައްދަށް އުދައަރާނޭކަމަށް ލަފާކުރެވޭ ކަމަށެވެ. މެޓް އޮފީހުން ވަނީ، އުދަ އަރާނޭކަމަށް ލަފާކޮށް އެހިސާބަށް ހުދު ސަމާލު ނެރެފައެވެ.

އުދަ އަރާނޭކަމަށް ލަފާކުރެވެނީ ދިޔަވަރު ބޮޑުވާ ވަގުތުތަކުގައެވެ.

މީގެ ކުރީ އަހަރުތަކުގެ ހުޅަނގު މޫސުމުގައިވެސް އައްޑޫސިޓީގެ ބައެއް ރަށްތަކަށް ވަނީ ވަރަށް ބޮޑަށް އުދައިގެ އަސަރުކޮށް، ގެއްލުންތައް ލިބިފައެވެ.

ހިނގަމުން މިދަނީ ހުޅަނގު މޫސުމުގެ ހިތަ ނަކަތުގެ އެންމެ ފަހު ދުވަހެވެ. މާދަމާ ފެށޭނީ ހެއި ނަކަތެވެ. މި ނަކަތް ކުރިއަށްދާނީ އޮކްޓޯބަރުމަހުގެ ނިޔަލަށެވެ. ހެއި ނަކަތަކީ ވައި އެނބުރޭ ނަކަތެވެ. މި ނަކަތުގައި ވައި ޖެހޭކަށް ވަކި ކޮޅެއް  ނޯވެއެވެ.

މި ނަކަތުގައި ޢާންމުކޮށް ވައި ހުންނާނީ ހުޅަނގުގައެވެ. އިހުގެ ނަކަތްތެރިންގެ ފަރާތުން އައިސްފައިވާ ގޮތުގައި މި ނަކަތުގައި މަސްވެރިކަން ރަނގަޅުވެފައި ބޭނޭ މަހުގެ ސައިޒު ބޮޑުވާނެއެވެ.