ޗައިނާ ސަރުކާރުގެ އެހީގައި ކ.ހިންމަފުށީގައި 165 ސޯލާ މަގުބައްތި ހަރުކޮށްފި

ޗައިނާ ސަރުކާރުގެ އެހީގައި ކ.ހިންމަފުށީގައި 165 ސޯލާ މަގުބައްތި ހަރުކޮށްފިއެވެ.

ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު، އާދަމް ޝަރީފް އުމަރު މިއަދު އެކްސްގައި ކުރެއްވި ޕޯސްޓެއްގައި މިކަން ހާމަ ކުރައްވާ ވިދާޅުވީ، މި ފަދަ އެހީއެއް ޗައިނާ ސަރުކާރުން ވުމަކީ ދެމެހެއްޓެނިވި މަސައްކަތަށް ލިބުނު ވަރަށް ބޮޑު ކުރިއެރުމެއް ކަމަށެވެ.

އަދި މިކަމުގެ ސަބަބުން ދެ ޤައުމުގެ ގުޅުން ބަދަހިވަމުންދާކަން ހާމަވެގެން ދާކަމަށްވެސް ވަޒީރު ވިދާޅުވިއެވެ.

މަގުބައްތިތައް ހަރުކޮށް ނިންމައި، އެ ޚިދުމަތް ރަސްމީކޮށް ފެށުމަށް މިއަދު ބޭއްވުނު ރަސްމިއްޔާތުގައި، ދިވެހިރާއްޖެއަށް ޗައިނާއިން ކަނޑައަޅުއްވާފައި ހުންނެވި ސަފީރު، އެކްސެލެންސީ ވާންގް ލިޒިންވެސް ބައިވެރިވެ ވަޑައިގެން ވާހަކަފުޅު ދެއްކެވިއެވެ.

ސަފީރު ވިދާޅުވި ގޮތުގައި، މި އެހީއަކީ ޗައިނާގެ ޔުނާން ޕްރޮވިންސްއިން ފޯރުކޮށްދެއްވި އެހީތެރިކަމެކެވެ. އަދި ކުދި އާބާދީތަކުގެ ތަރައްޤީއަށް ބޭނުންވާ، ޒަމާނީ ވަސީލަތްތަކާއި އެހީތެރިކަން ދިވެހިރާއްޖެއަށް ފޯރުކޮށްދިނުމުގައި ޗައިނާއިން އަބަދުވެސް އެއްބާރުލުން ދެއްވާނެ ކަމުގެ ޔަޤީންކަން ސަފީރު ދެއްވިއެވެ.

މީގެ އިތުރުން ވަޒީރު އާދަމް ޝަރީފު އެކްސްގައި ކުރެއްވި ޕޯސްޓުގައި ވަނީ މިއަދު މަގު ބައްތިތައް ހަރުކޮށް ނިމި، ޚިދުމަތް ދޭން ފެށުމަށް ބޭއްވި ރަސްމިއްޔާތަށް ކުރައްވާފައިވާ ރަނގަޅު އިންތިޒާމުތަކަށާއި، ހޫނު މަރުޙަބާއަށްޓަކައި ހިއްމަފުށީ ކައުންސިލަށާއި އެ ރަށުގެ ރައްޔިތުންނަށް ޝުކުރު ދަންނަވާފައެވެ.