މާލޭ ޖަލު އެނެކްސް ބަންދުކުރަން ދެވަނަ ފަހަރަށް އަންގައިފި
ދެ ދުވަހުގެ ތެރޭގައި މާލޭ ޖަލު އެނެކްސް ބަންދުކުރުމަށް އެޗްއާރްސީއެމްގެ ފަރާތުން މޯލްޑިވްސް ކަރެކްޝަންސް ސާރވިސްއަށް އަންގައިފިއެވެ.
މިއީ އެތަން ބަންދުކުރުމަށް އެ ކޮމިޝަނުން އެންގި ދެވަނަ ފަހަރެވެ.
އެޗްއާރްސީއެމުން މިއަދު ނެރުުނު ނޫސް ބަޔާނެއްގައި ބުނީ މާލޭ ޖަލު އެނެކްސްެގެ ހާލަތު ބެލިބެލުމުން އެތަން ބަންދުކުރުމަށް ކޮމިޝަނުން އެޕްރީލްމަހުގެ 11ވަނަ ދުވަހު އެންގުމުން އެމަހުގެ 15ވަނަ ދުވަހުން ފެށިގެން އެތަން ބަންދުކޮށްފައިވާކަމަށް ކަރެކްޝަންސްއިން އެންގިކަމަށެވެ.
ނަމަވެސް އިއްޔެ ކޮމިޝަނުން މާލޭ ޖަލު އެނެކްސްއަށް ޒިޔާރަތްކުރުމުން އެތަނުގައި 25ގައިދީއަކާއި ބަންދުމީހެއް ހުރިކަމަށް ފާހަގަވިކަމަށް ވަނީ ބުނެފައެވެ. އަދި އެންމެ ފުރަތަމަ އެތަން ބަންދުކުރުމަށް އެންގި ތާރީޚާއި އަޅާބަލާއިރު ތަނުގެ ހާލަތު މާ ގޯސްކަމަށް ވަނީ ބުނެފައެވެ.
އެގޮތުން އެ ތަނުގެ ތެރޭގައި ބާވެފައިވާ ދަނގަޑާއި، ކުދި ހިލަ ގޯންޏާއި، ވެލި ގޯންޏާއި، އަދި ގޮޅިތަކުގައި ހިރަފުސް ބޯވެފައި ހުރުމާއި، ގޮޅިތައް ސާފްތާހިރު ނޫންކަން ފާހަގަކުރެވިފައިވާކަމަށް އެޗްއާރްސީއެމްއިން ބުނެފައެވެ.
އެހެންކަމުން މިއަދުން ފެށިގެން 48 ގަޑިިއިރުގެ ތެރޭގައި އެތަން ބަންދުކުރުމަށާއި އެތަނުގައި ތިބި މީހުން އެހެން ތަނަކަށް ބަދަލުކުރުމަށް ވަނީ އަންގާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
