ދިރާސާ ކުރުމުގެ ދާއިރާ ކުރިއެރުވުމަށް އެމް.އެން.ޔޫ އާއި ބަންގްލަދޭޝް ޔުނިވަރސިޓީ އޮފް ޕްރޮފެޝަނަލްސްއާ ދެމެދު އެއްބަސްވުމެއް

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އާއި ބަންގްލަދޭޝް ޔުނިވަރސިޓީ އޮފް ޕްރޮފެޝަނަލްސް (ބީ.ޔޫ.ޕީ) އާ ދެމެދު ތަޢުލީމާއި ދިރާސާ ކުރުމުގެ ދާއިރާއިން ގުޅުން ބަދަހިކުރުމުގެ މަޤްޞަދުގައި މިއަދު ފަހުމުނާމާއެއްގައި ސޮއިކޮށްފިއެވެ.

މި އެއްބަސްވުމުގައި ދިވެހިރާއްޖޭގެ ޤައުމީ ޔުނިވަރސިޓީގެ ފަރާތުން ސޮއިކުރެއްވީ އެ ޔުނިވަރސިޓީގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމެވެ. ބަންގްލަދޭޝް ޔުނިވަރސިޓީ އޮފް ޕްރޮފެޝަނަލްސްގެ ފަރާތުން ސޮއިކުރެއްވީ އެ ޔުނިވަރސިޓީގެ ޑިޕާޓްމަންޓް އޮފް އިންޓަރނޭޝަނަލް ރިލޭޝަންސްގެ ޗެއަރމަން، ލެފްޓިނަންޓް ކާނަލް މުޙައްމަދު ޝަފީޢުލް ޢާލަމެވެ.

އެމްްއެންޔޫއިން ބުނެފައިވާގޮތުން މި އެއްބަސްވުމުގެ މައިގަނޑު މަޤްޞަދަކީ ދެ މުއައްސަސާގެ ދެމެދުގައި ދަރިވަރުންނާއި، ފެކަލްޓީ މެންބަރުން އަދި ދިރާސާކުރާ ބޭފުޅުން ބަދަލުކުރުމުގެ ތެރެއިން ތަޢުލީމީ ފެންވަރު މަތިކޮށް، ގުޅުން ބަދަހިކުރުމެވެ.

މި އެއްބަސްވުމުގެ ދަށުން ބައިނަލްއަޤްވާމީ ގުޅުންތައް، ޑިފެންސް އިންޖިނިއަރިންގ އެންޑް ޓެކްނޮލޮޖީ، އަމާންކަމާއި ރައްކާތެރިކަން، ބިޒްނަސް މެނޭޖްމަންޓް، ތިމާވެށީގެ ދިރާސާތައް އަދި އިތުރު ދާއިރާތަކުން ދިރާސީ މަސައްކަތްތައް ގުޅިގެން ކުރިއަށް ގެންދިއުމަށް ހަމަޖެހިފައިވާ ކަމަށް އެމްއެންޔޫއިން ބުނެއެވެ.

މީގެ އިތުރުން، މި އެއްބަސްވުމުގެ ދަށުން ދެ ޔުނިވަރސިޓީ ގުޅިގެން ހިންގާނެ ޙަރަކާތްތަކުގެ ތެރޭގައި ދަރިވަރުން ބަދަލުކުރުމުގެ ޕްރޮގްރާމްތަކާއި، ލެކްޗަރާސް ދިނުމާއި، ގުޅިފައިވާ ސެމިނާރުތަކާއި ވޯކްޝޮޕްތައް ބޭއްވުން ހިމެނެއެވެ. އަދި ކުރު ކޯސްތައް ހިންގުމާއި، ދިރާސީ މަސައްކަތްތަކާއި ޝާއިޢުކުރާ ލިޔުންތައް ހިއްސާކުރުމަށްވެސް ވަނީ އެއްބަސްވެފައެވެ.

އެމްއެންޔޫއިން ބުނިގޮތުން، މި އެއްބަސްވުން ބިނާވެފައިވަނީ ދެ ފަރާތަށްމެ ފައިދާހުރި، މުއައްސަސާގެ އަގު ހިފެހެއްޓޭނެ ފަދަ ދެމެހެއްޓެނިވި ގުޅުމެއްގެ މައްޗަށެވެ.

މި އިސްތިރާތީޖީ ބައިވެރިވުމަކީ މަތީ ތަޢުލީމު ކުރިއެރުވުމަށާއި، ދިރާސީ ދާއިރާއިން ގުޅުން ބަދަހިކޮށް، ބައިނަލްއަޤްވާމީ ފެންވަރުގައި ތަޢުލީމީ ގުޅުންތައް ވަރުގަދަކުރުމަށް އެމް.އެން.ޔޫ އާއި ބީ.ޔޫ.ޕީ އިން ކުރާ މަސައްކަތުގެ މުހިންމު ފިޔަވަޅެއް ކަންވެސް އެމްއެންޔޫއިން ފާހަގަކުރެއެވެ.