ރަސްމީ ރިޒާވް 686 މިލިއަން ޑޮލަރުގައި. ދަރަނިތައް އަދާކުރުމާއެކުވެސް ރިޒާވް ފެންނަނީ ވަރުގަދަކޮށް

މިއަހަރުގެ ޖޫންމަސް ނިމުނުއިރު ދައުލަތުގެ ރަސްމީ ރިޒާވް 686 މިލިއަން ޑޮލަރަށް އަރައިފިއެވެ.

މޯލްޑިވްސް މަނިތަރީ އޮތޯރިޓީ، އެމްއެމްއޭއިން ނެރެފައިވާ އެންމެ ފަހުގެ ތަފާސްހިސާބުތަކަސް ބަލާއިރު، ޖޫންމަސް ނިމުނުއިރު ރަސްމީ ރިޒާވް 686 މިލިއަން ޑޮލަރަށް އަރާފައިވާއިރު، މިއީ އޭގެ ކުރީ މެއިމަހާ އަޅާބަލާއިރު 18 މިލިއަން ޑޮލަރުގެ ދަށްވުމެކެވެ. އަދި އަހަރުން އަހަރަށް ބަލާއިރު މިއީ 17.5 އިންސައްތަ ދަށްވުމެކެވެ. މިދިޔަ އަހަރުގެ ޖޫންމަހު ރާއްޖޭގެ ރަސްމީ ރިޒާވްގައި 831.6 މިލިއަން ޑޮލަރު ހުއްޓެވެ.

މަރުކަޒީ ބޭންކުގެ ތަފާސްހިސާބުތަކަށް ބަލާއިރު ޖޫންމަސް ނިމުނުއިރު ބޭނުންކުރެވޭ ރިޒާވް ހުރީ 248.9 މިލިއަން ޑޮލަރުގައެވެ. މިއީ މިދިޔަ މޭ މަހާއި އަޅާބަލާއިރު 11.9 މިލިއަން ޑޮލަރުގެ ދަށްވުމެކެވެ. އަހަރުން އަހަރަށް ބަލާއިރު، 2025 ވަނަ އަހަރުގެ ޖޫން މަސް ނިމުނުއިރު މިއަދަދު ހުރީ 203.0 މިލިއަން ޑޮލަރުގައެވެ. މިއީ ގާތްގަނޑަކަށް 23 އިންސައްތައިގެ ކުރިއެރުމެކެވެ.

އެމްއެމްއޭ އިން ބުނީ މެއިމަހާ އަޅާބަލާއިރު ޖޫން މަހު ގްރޮސް ރިޒާވް ދަށްވުމުގެ މައިގަނޑު ސަބަބަކީ ބޭރު ފައިސާއިން ކުރެވުނު ހޭދަ އިތުރުވުމެވެ. މީގެ ތެރޭގައި، ބޭންކިން ނިޒާމާއި މުދާ އިމްޕޯޓްކުރާ ފަރާތްތަކުން ބޭރު ފައިސާއަށް އޮތް ބޮޑު ޑިމާންޑް އިތުރުވުމުގެ ސަބަބުން އެމްއެމްއޭގެ ފޮރިން އެކްސްޗޭންޖް އިންޓަވެންޝަން ސިޔާސަތުގެ ދަށުން ބާޒާރަށް ވިއްކި ޑޮލަރުގެ މިންވަރު، ކުރީ މަހާ އަޅާބަލާއިރު 43 އިންސައްތަ އިތުރުވުން ހިމެނޭކަމަށް ރިޕޯޓްގައި ވަނީ ފާހަގަކޮށްފައެވެ.

މަރުކަޒީ ބޭންކުގެ ތަފާސްހިސާބުތަކަށް ބަލާއިރު، މިއަހަރުގެ މާޗްމަހު ރަސްމީ ރިޒާވް 1.3 ބިލިއަން ޑޮލަރަށް އެރިއެވެ. ނަމަވެސް މީގެ ކުރިން ނަގާފައިވާ ކުރު މުއްދަތުގެ ބޮޑެތި އިންޓްރަސްޓްރޭޓްގެ ދަރަނިތައް ދައްކަންޖެހުމާއެކު ރިޒާވް ވަނީ ދަށަށް ގޮސްފައެވެ. އެގޮތުން މިއަހަރުގެ އޭޕްރިލްމަހުގެ ތެރޭގައި ރާއްޖެއިން ވަނީ 1 ބިލިއަން ޑޮލަރު ދަރަނީގެ ގޮތުގައި އެކި ފަރާތްތަކަށް ދައްކާފައެވެ.