ކުރިއަށް އޮތް ދެދުވަހު ބޯކޮށް ވާރޭ ވެހިދާނެކަމަށް ސިފައިން ތިބީ ތައްޔާރީ ހާލަތުގައި: ޑިފެންސް މިނިސްޓަރު
ލިޔުންތެރިޔާ
ސްޓާފް ރައިޓަރ
މާލެއަށް މިހާރު ކުރަމުންދާ ވިއްސާރާގައި ކުރިއަށްއޮތް ދެދުވަހުވެސް ބޯކޮށް ވާރޭ ވެހޭނޭކަމަށް މޫސުމާ ބެހޭ ޤައުމީ އިދާރާއިން ލަފާކޮށްފައިވާތީވެ، ފެންބޮޑުވުމުގެ ސަބަބުން ކުރިމަތިވެދާނޭ ހާލަތަކަށް ސިފައިން ތައްޔާރަށް ތިބިކަމަށް ދިފާއީ ވަޒީރު ޢައްސާން މައުމޫން ވިދާޅުވެއްޖެއެވެ.
ދައުލަތުގެ މީޑިއާއަށް ދެއްވި ބަސްދީގަތުމެއްގައި ދިފާއީ ވަޒީރު ވިދާޅުވީ، މާލެއަށް ވެހެމުންދާ ވާރޭގެ ސަބަބުން މަގުތަކުގައި ފެންބޮޑުވަމުންދާތީވެ، ފެން ހިއްކުމުގެ މަސައްކަތުގައި ސިފައިން ކެނޑިނޭޅި ކުރަމުންދާކަމަށެވެ. މިވަގުތު ހާލަތު އޮތްގޮތުން އަލިފާން ނިއްވުމަށް ބޭނުންކުރާ ޕަންޕުތައްވެސް ބޭޏުންކުރަމުންދާކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ މަގުތަކުން ފެންހިއްކުމުގައި ފަޔަރ އެންޑް ރެސްކިއު ޓީމާއި މާލޭ އޭރިއާގެ ކޮމާންޑުން ވަނީ ސިފައިންގެ އެންމެ މަތީވެރިޔާ އަދި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވާފައި އޮތް އިރުޝާދާ އެއްގޮތަށް ފުރިހަމަޔަށް ތައްޔާރުވެފައި ކަމަށެވެ.
"މިއަށްވުރެ ބޮޑަށް ވާރޭ ވެހިދާނެކަމަށް ތައްޔާރުވެ، އަޅުގަނޑުމެންގެ އަތުގައި ހުރި ވަސީލަތްތައް އެންމެ ފުރިހަމައަށް ރައްޔިތުންނަށް ޓަކައި ބޭނުންކޮށްގެން މަގުތަކުގެ ފެން ހިއްކުމުގެ މަސައްކަތްކުރަން ވަރަށް ފުރިހަމަޔަށް ވަނީ ތައްޔާރުވެފައި" ދިފާއީ ވަޒީރު ޢައްސާން މައުމޫން ވިދާޅުވިއެވެ.
މާލެއަށް ކުރަމުންދާ ވިއްސާރާގައި ފެންބޮޑުވެފައިވާތީވެ އެމްއެންޑިއެފުން މިހާރުވެސް ދަނީ 10 ސަރަހައްދެއްގައި ފެން ހިއްކުމުގެ މަސައްކަތް ކުރަމުންނެވެ.
އެމްއެންޑީއެފުން ވަނީ މިހާރު ކުރަމުންދާ ވިއްސާރައިގައި އެ މުއައްސަސާގެ އެހީތެރިކަން ހޯދުމަށް އެދޭ ފަރާތްތަކުން 115 އަށް ގުޅައިގެން ކުރިއަށްގެންދިއުމަށް އިލްތިމާސްކޮށްފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
