މީޑިއާ ކޮމިޝަނަށް މަޖިލީހުން ހޮވާ މެންބަރު ކަމަށް ހުޅުވާލައިފި

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް ރައްޔިތުންގެ މަޖިލީހުން ކަނޑައަޅާ މެންބަރު ކަމަށް ހުޅުވާލައިފި އެވެ.

ހަތް މެންބަރުންގެ މައްޗަށް އެކުލެވޭ މީޑިއާ ކޮމިޝަނަށް ތިން މެންބަރުން އައްޔަނުކުރަނީ މަޖިލީހުންނެވެ.

މަޖިލީހުން މިއަދު ކުރި އިއުލާނުގައި ބުނެފައިވަނީ މީޑިއާ ކޮމިޝަނުގެ މެންބަރުކަމަށް ހުޅުވާލާފައިވާ ކަމަށެވެ. އެ ފުރުސަތު 12 އޮކްޓޯބަރު މެންދުރު 12:00 ގެ ނިޔަލަށް ވަނީ ހުޅުވާލާފަ އެވެ. އެކަމަށް ޝައުގުވެރިވާ ފަރާތްތަކުން ރައްޔިތުންގެ މަޖިލީހަށް އެޕްލިކޭޝަން ފޯމާއި ލިޔެކިޔުންތައް ހުށަހަޅަން ވަނީ އެދިފަ އެވެ.

މެންބަރު ކަމަށް ކުރިމަތިލާ މީހަކީ މީޑިއާއެއްގެ މަސްއޫލުވެރިއަކަށް ނުވަތަ އެޑިޓަރެއްގެ މަގާމުގައި ހުރި މީހަކަށް ވެގެން ނުވާނެ އެވެ. އަދި ސިޔާސީ ޕާޓީއެއްގެ މެންބަރަކަށް އަދި ކޮމިއުނިކޭޝަނާއި މީޑިޔާގެ ހިދުމަތް ދޭ ކުންފުންޏެއް ނުވަތަ ވިޔަފާރިއެއްގެ ހިއްސާދާރަކަށް ވެސް ކޮމިޝަނުގެ މެންބަރުކަމަށް ކުރިމަތިނުލެވޭނެ އެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ އިންތިހާބަށް އިލެކްޝަންސް ކޮމިޝަނުން ވެސް ވަނީ ހުޅުވާލާފަ އެވެ. އެގޮތުން ބްރޯޑްކާސްޓަރުން ތަމްސީލުކުރާ ދެ މެންބަރަކާއި މީޑިއާތައް ތަމްސީލުކުރާ ދެ މެންބަރުކު އިންތިހާބު ކުރާނެ އެވެ.

މެންބަރު ކަމަށް ކުރިމަތިލުމުގެ ފުރުސަތު، އޮކްޓޫބަރު ހަތަރެއްވާ ހޮނިހިރު ދުވަހުގެ 14:00 އާ ހަމަޔަށް ވަނީ ހުޅުވާލާފަ އެވެ.