ސިފައިން ތިބީ ދުރާލާ ތައްޔާރުވެގެން، ފެން ހިންދުމުގެ މަސައްކަތް ކުރިއަށް

މާލެއަށް ކުރިޔަށް އޮތް ދެ ދުވަހު ވިއްސާރަ ކުރާނެކަން އެނގުނު ހިސާބުން ފެށިގެން ވިއްސާރައިގެ ސަބަބުން ރައްޔިތުންނާއި މުދަލަށް ލިބިދާނެ ގެއްލުމަކުން ރައްކާތެރި ކުރުމަށްޓަކައި ކުރަންޖެހޭ މަސައްކަތްތައް ފަށާފައިވާ ކަމަށް އެމްއެންޑީއެފުން ބުނެފި އެވެ.

މިއަދު ހަވީރު މާލެ ސަރަހައްދަށް މޫސުން ގޯސްވެ ވެހެން ފެށި ވާރޭ އަދިވެސް ނުހުއްޓަ އެވެ. ބޯކޮށްވާރޭވެހި މަގުތަކުގައި ވަނީ ފެންބޮޑުވެފަ އެވެ.

އެމްއެންޑީއެފުން ބުނީ ސިފައިންނަކީ ރައްޔިތުންގެ ސަލާމަތާއި ރައްކާތެރި ކަމަށްޓަކައި، އަޅަންޖެހޭ ކޮންމެ ފިޔަވަޅެއް އެޅުމަށް އަބަދުވެސް ތައްޔާރަށް ތިބޭ ބައެއް ކަމަށާ މާލެއަށް ކުރިޔަށްއޮތް ދެދުވަހު ވިއްސާރަ ކުރާނެކަން އެނގުނު ހިސާބުން ފެށިގެން ސިފައިން ވަނީ، ވިއްސާރައިގެ ސަބަބުން ރައްޔިތުންނާއި މުދަލަށް ލިބިދާނެ ގެއްލުމަކުން ރައްކާތެރި ކުރުމަށްޓަކައި ކުރަންޖެހޭ މަސައްކަތްތައް ފަށާފައި ކަމަށެވެ.

އެގޮތުން މިއަދު މެންދުރުން ފެށިގެން ޢާންމުކޮށް ފެންބޮޑުވާ ހިސާބުތަކުގައި ޕަމްޕުތައް ބަހައްޓާ، ފެންހިންދުމުގެ މަސައްކަތަށް ރެޑީ ވެފައިވާކަން ފާހަގަކޮށް ސިފައިން ބުނީ މިވަގުތު މާލޭގެ 3 ސަރަހައްދެއްގައި ޕަމްޕު ބަހައްޓައިގެން ފެންހިންދުމުގެ މަސައްކަތް ދަނީ ކުރަމުން ކަމަށެވެ.

ފެން ހިއްކުމުގެ މަސައްކަތް ކުރަމުންގެންދަނީ އެންމެ ބޮޑަށް ފެން ބޮޑުވާ ސަރަހައްދުތައް ކަމަށްވާ އައިޖީއެމްއެޗް ސަރަހައްދާއި ވެސްޓްޕާކް ސަރަހައްދު އަދި މާފަންނު ފެރީ ޓާމިނަލް ސަރަހައްދުގަ އެވެ.

އެމްއެންޑީއެފުން ބުނީ އާންމުން ދިރިއުޅޭ ގެތަކަށާއި އެހެނިހެން އިމާރާތްތަކަށް ފެންވަދެ ލިބިދާނެ ގެއްލުމަކުން ރައްކާތެރި ކޮށްދިނުމަށްޓަކައި ވެލިބަސްތާ ޖެހުމުގައި ވެސް ސިފައިން ދަނީ ހަރަކާތްތެރި ވަމުން ކަމަށެވެ.

މާލެއަށް ވާރޭވެހި ފެންބޮޑުވާ ކޮންމެ ފަހަރަކު، ސިފައިން ފޯރުކޮށްދޭ ގައުމީ ހިދުމަތަކީ ޝުކުރުހައްގު ހިދުމަތެކެވެ. ސިފައިންގެ މިމަސައްކަތްތަކުގެ ސަބަބުން، ރައްޔިތުންގެ އެތައް މުދަލެއް ރައްކާތެރި ކުރެވިގެންދެ އެވެ.