ރާއްޖޭގެ ތަރައްގީއަށް ކުރަން ޖެހިފައިވާ އެންމެ ބޮޑު ކަމަކީ މީހުން ބިނާކުރުން: ރައީސް ސޯލިހް
ދިވެހިރާއްޖޭގެ ތަރައްގީއަށްޓަކައި ކުރަން ޖެހިފައިވާ އެންމެ ބޮޑު ކަމަކީ މީހުން ބިނާކުރުންކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ހުޅުމާލޭގައި ތަރައްގީ ކުރެވުނު ރާއްޖޭގެ އެންމެ ބޮޑު ސްކޫލްކަމުގައިވާ ހުރަވީ ސްކޫލް އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ވިދާޅުވީ އެމަނިކުފާނު ދެކިވަޑައިގަންނަވާ ގޮތުގައި ރާއްޖެ ތަރައްގީ ކުރުމަށް ކުރަން ޖެހިފައިވާ އެންމެ ބޮޑު މަސައްކަތަކީ މީހުން ބިނާކޮށް، އިންސާނީ ވަސީލަތްތައް ތަރައްގީކޮށް އިތުރުކުރުން ކަމުގައެވެ. އަދި މި ސަރުކާރުން ރާއްޖޭގެ ތަރައްގީއަށް ކުރާ އެންމެ ބޮޑު މަސައްކަތަކީވެސް އެއީކަމަށް އެމަނިކުފާނު ފާހަގަކުރެއްވިއެވެ.
ރައީސް ސޯލިހު ވިދާޅުވީ މި ސަރުކާރުގެ ތައުލީމީ ނިޒާމު އެކުލަވައިލީ ރައްޔިތުންގެ ޝަކުވާތަކަށް އެހުމަށްފަހުގައި ކަމަށެވެ. އެއީ ބެޗެލަރސް ޑިގްރީއާއި ހަމައަށް ހިލޭ ކިޔެވުމުގެ ފުރުސަތު ފަހިކޮށްދިނުން ކަމަށާއި އަދި މަތީ ތައުލީމްގެ ލޯނުގެ އިންޓްރެސްޓް ތިން އިންސައްތައަށް ކުޑަކުރުންކަމަށް ރައީސް ސޯލިހު ވިދާޅުވިއެވެ.
އެމަނިކުފާނުގެ ވާހަކަފުޅުގައި ވަނީ މިއަދު ހުޅުވިގެންދިޔަ ހުރަވީ ސްކޫލަށްވެސް އަލިއަޅުއްވާލައްވާފައެވެ. އެގޮތުން ރައީސުލްޖުމްހޫރިއްޔާ ވިދާޅުވީ އެ ސްކޫލަކީ ވަށާޖެހޭ ތައުލީމީ ނިޒާމަކަށް ފަރުމާކުރެވުނު ސްކޫލެއްކަމަށާއި އެ ސްކޫލްގައި ހުސް ދިވެހި ޓީޗަރުން ކިޔަވައިދެއްވާތީ އުފާ ކުރައްވާ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
