ތިނަދޫ ރަށްވެހިކަން ދޫކޮށްލާނަމަ ބޮޑު ފީއެއް ނަގަނީ!

ގދ.ތިނަދޫގެ ރަށްވެހިކަން ދޫކޮށްލާނަމަ އަނެއްކާވެސް ބޮޑު ފީއެއް ނެގުމަށް އެ ސިޓީގެ ކައުންސިލުން ނިންމައިފިއެވެ.

ތިނަދޫ ސިޓީ ކައުންސިލުން މިއަދު ކުރި އިއުލާނުގައި ވާގޮތުން ގދ. ތިނަދޫގެ ރައްވެހިކަން ދޫކޮށްލާނަމަ 5،000 ރުފިޔާގެ ފީއެއް ނެގުމަށް ވަނީ ނިންމާފައެވެ.

އެ ސިޓީގެ އާބާދީ މަދުނުވެ ހިފެހެއްޓުމުގެ މަގުސަދުގައި ރަށުން ރަޖިސްޓްރި ބަދަލުކުރާ މީހުންގެ އަތުން ބޮޑު ފީއެއް މިދިޔަ އަހަރުގެ ޖެނުއަރީމަހުގެ ތެރޭގައި ވަނީ ނަގަން ފަށާފައެވެ. ނަމަވެސް މި އަހަރުގެ ޖުލައި މަހުގެ ތެރޭގައި، ލޯކަލް ގަވަމެންޓް އޮތޯރިޓީން ފީ ނަގަމުން ދަނީ އިޖުރާއަތްތައް ފުރިހަމަ ނުކޮށް ކަމަށް ބުނުމުން އެ ކައުންސިލުން ވަނީ މި ފީ ނެގުން ހުއްޓާލާފައެވެ.

އެގޮތުން ތިނަދޫ ކައުންސިލުން މިއަދު ކުރި އިއުލާނުގައި ބުނީ، އެލްޖީއޭގެ އެދުމާ އެއްގޮތަށް އެކަމުގައި ރައްޔިތުންގެ ރުހުން ހުރި ގޮތް ބެލުމަށް، މިދިޔަ އޮގަސްޓު މަހުގެ ތެރޭގައި ބައްދަލުވުމެއް ބޭއްވާ، ރައްޔިތުކަމުން އުނިކުރުމުގެ ފީގެ ގޮތުގައި ނަގާނެ އަދަދުގެ ގޮތުގައި 0-5،000 ރުފިޔާއާއި ދެމެދުގެ އަދަދެއް ކަނޑައެޅުމަށް ގޫގުލް ފޯމެއްގެ ދަށުން އިހްތިޔާރު ދިންކަމަށެވެ. އެގޮތުން ހިޔާލު ހުށަހެޅުމުގެ އެ ބައްދަލުވުމުގައި ބައިވެރިންގެ މެޖޯރިޓީ ބޭނުންވީ ފީގެ ގޮތުގައި 5،000 ރުފިޔާ ނެގުމަށް ކަމަށްވުމުން މި މަހު 16 ވަނަ ދުވަހުން ފެށިގެން އެ ފީ ނަގަން ފަށާފައިވާކަން ވެސް ވަނީ އިއުލާންކޮށްފަ އެވެ.

ތިނަދޫ އަކީ ގދ.ގެ ވެރިކަންކުރާ ރަށް ކަމަށްވާއިރު އެރަށުގައި ރަޖިސްޓްރީވެފައިވާ އާބާދީގެ އަދަދަކީ 7،906 އެކެވެ. މިދިޔަ ރިޔާސީ އިންތިހާބުގެ ކެމްޕެއިންތެރެއިން އޭރުގެ ރައީސް އިބްރާހިމް މުހައްމަދު ސޯލިހުވަނީ ތިނަދޫއަށް ސިޓީއެއްގެ ދަރަޖަ ދެއްވާފައެވެ. ނަމަވެސް އެތަނުގެ ރަށްވެހިކަން ދޫކޮށް އެހެން ރަށްރަށަށް ބަދަލުވަމުންދާ މީހުން ގިނަވެ، ތިނަދޫގެ އާބާދީއަށް ނުރަނގަޅު އަސަރުތަކެއް ކުރިމަތިވާކަމަށް އެ ސިޓިގެ ކައުންސިލުން ވަނީ ވިދާޅުވެފައެވެ. އެހެންކަމުން މިފަދަ ފީއެއް ނެގުމުގެ މަގުސަދަކީ އެފަދަ ނޭދެވޭ އަސަރުތައް މަދުކޮށް އެސިޓީގެ އާބާދީ އިތުރުކުރުމަށް ބާރު އެޅުން ކަމުގައިވެސް އެ ކައުންސިލުން ވަނީ ވިދާޅުވެފައެވެ.