މީކާއިލްއާ ގުޅޭ ޕޯސްޓު ޑިލީޓް ކުރީ ބެލެނިވެރިން ކަންބޮޑުވުން ފާޅުކުރުމުން: ޖޭއެސް

ޖަމާލުއްދީން ސްކޫލް (ޖޭއެސް)ގެ 40 ވަނަ އަހަރީ ދުވަހާއި ގުޅިގެން އެ ސުކޫލަށް ކިޔަވައި ވިދާޅުވި، ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއިލް އަހުމަދު ނަސީމަށް ތައުރީފުކޮށް، އެ ސްކޫލުން ސޯޝަލް މީޑިއާގައި ޕޯސްޓެއް ކުރުމަށް ފަހު، އެ ޕޯސްޓް ޑިލީޓް ކުރަން ޖެހުނީ ބެލެނިވެރިންގެ ކަންބޮޑުވުން ފާޅުކުރުމުން ކަމަށް އެ ސްކޫލުން ބުނެފި އެވެ.

ޖޭއެސްގެ 40 ވަނަ އަހަރީ ދުވަހާ ގުޅިގެން އެ ސްކޫލުން ކުރިއަށް ގެންދާ އެލުމްނާއީ ޕްރޮފައިލްސް މެދުވެރިކޮށް އަންނަނީ އެ ސުކޫލުން ތައުލީމު ހާސިލްކޮށް، ސްކޫލަށް ރީތި ނަން ހޯދައި ދިން މީހުންގެ ޕޯސްޓުތައް ސޯޝަލް މީޑިއާގައި ހިއްސާ ކުރަމުންނެވެ.

އެގޮތުން އިއްޔެ، މީކާއިލް އާއި ގުޅޭ މައުލޫމާތުވެސް ސުކޫލުގެ އެކްސް އަދި ފޭސްބުކު އެކައުންޓުގައި ހިއްސާ ކުރިއެވެ. ނަމަވެސް، ފަހުން އެ ސްކޫލުން ސޯޝަލް މީޑިއާގެ ހުރިހާ ޕްލެޓްފޯމްތަކުން އެ ޕޯސްޓް ފޮހެލި އެވެ.

އެކަމާއި ގުޅިގެން މީކާއިލް ކުރި ޕޯސްޓެއްގައި އޭނާ ވަނީ، ސުކޫލުން އެ ޕޯސްޓް ޑިލީޓްކުރީ އެޑިޔުކޭޝަން މިނިސްޓްރީން ޕްރެޝަރ ކޮށްގެން ކަމަށް ތުހުމަތުކޮށްފައެވެ.

އެ ތުހުމަތުތައް ދޮގުކޮށް ޖޭއެސް އިން ރޭ ނެރުނު ބަޔާނެއްގައި ބުނީ މީކާއިލްގެ ޕޯސްޓު ފޮހެލީ އެޑިއުކޭޝަން މިނިސްޓްރީން އަންގައިގެން ނޫން ކަމަށެވެ.

”(އެ ޕޯސްޓް) ޑިލީޓްކުރަންޖެހުނީ، މި ސްކޫލަކީ ތައުލީމާއި ތަރުބިއްޔަތު ދޭ މުއައްސަސާއަކށް ވެފައި މި ސްކޫލަށް ނިސްބަތްވާ ކުރީގެ ދަރިވަރު [މީކާއިލް] ގެ ފަރާތުން އަދުގެ ދަރިވަރުންނަށް ފެންނަން ނުޖެހޭ ފަދަ އަމަލުތަކެއް ފެނުމުން، އަދި އެފަދަ ކަންކަމަކީ ސްކޫލުން ގަބޫލުރާ އަހުލާގީ މިންގަނޑުން ބޭރު ކަމެއް ކަމަށް ވާތީ އާއި ބެލެނިވެރިންގެ ކަންބޮޑުވުންތައް ސްކޫލަށް ލިބެމުންދިއުމާ ގުޅިގެން.“ ޖޭއެސް އިން ބުނެފައިވެއެވެ.

ޖޭއެސް އިން އިތުރަށް ބުނީ، މީކާއިލްއާ ގުޅޭ ސޯޝަލް މީޑިއާ ޕޯސްޓް ޑިލީޓްކުރީ އެލުމްނާއީ ޕްރޮފައިލް ކޮމިޓީގެ މަޝްވަރާގެ މަތިން ކަމަށާ، އެ ޕޯސްޓް ފޭސްބުކާއި އެކްސް އިން ޑިލީޓްކުރީ މިނިސްޓްރީ އޮފް އެޑިއުކޭޝަން އިން ޕްރެޝަރު ކޮށްގެން ކަމަށް ބުނެ ބައެއް ފަރާތްތަކުން ރިޕޯޓް ކޮށްފައިވީ ނަމަވެސް އެއީ ސައްހަ މައުލޫމާތެއް ނޫން ކަމަށެވެ.

"މި ޕޯސްޓް ފޭސްބުކާއި އެކްސް އިން ޑިލީޓްކުރީ މިނިސްޓްރީ އޮފް އެޑިއުކޭޝަން އިން ޕްރެޝަރު ކޮށްގެން ކަމަށް ބުނެ ބައެއް ފަރާތްތަކުން ރިޕޯޓް ކޮށްފައިވީ ނަމަވެސް އެއީ ސައްހަ މައުލޫމާތެއް ނޫން ކަމުގައި ހާމަކުރަމެވެ،" ޖޭއެސްގެ ބަޔާނުގައި ވެ އެވެ.