ޓެކްސީ ލައިނެއް ފަށަން 407 ޑްރައިވަރުން ހޯދަންފަށައިފި

ސަރުކާރުގެ ފަރާތުން ޓެކްސީ ލައިނެއްގެ ހިދުމަތް ފެށުމަށް 407 ޑްރައިވަރުން ހޯދަން އެމްޓީސީސީން އިއުލާނުކޮށްފި އެވެ.

އެމްޓީސީސީން ކުރި އިއުލާނެއްގައިވާ ގޮތުން ހޯދުމަށް އިއުލާންކޮށްފައިވާ 407 ޑްރައިވަރުންގެ ތެރެއިން 122 ޑްރައިވަރުން ބޭނުންވަނީ ޕާޓް ޓައިމްކޮށް މަސައްކަތްކުރާ ގޮތަށެވެ. އަދި މިކަމަށް އެދި ކުރިމަތިލުމުގެ ފުރުސަތު އަންނަ މަހުގެ 17 ވަނަ ދުވަހުގެ ނިޔަލަށް އޮންނާނެ ކަމަށް އެ އިއުލާނުގައިވެއެވެ.

އެ ކުންފުނިން ބުނީ މި ހިދުމަތަށް ބޭނުންވާ ޑްރައިވަރުން ނެގުމުގައި އިސްކަން ދޭވޭނީ މިވަގުތު ޓްރާންސްޕޯޓް މިނިސްޓްރީގައި އެކުލަވާލާފައިވާ ޓެކްސީ ޑްރައިވަރުންގެ ދަފްތަރުގައި ރަޖިސްޓްރީ ކުރެވިފައިވާ ފަރާތްތަކަށް ކަމަށެވެ.

އާއްމު ދަތުރުފަތުރުގައި މިހާރު ދިމާވާ ދަތިތައް ހައްލުކުރަން ސަރުކާރުން އެމްޓީސީސީއާ ހަވާލުކޮށްގެން ފެށުމަށް ތައްޔާރުވަމުން އަންނަ މި ޓެކްސީ ލައިނުގެ ހިދުމަތް އެޕްލިކޭޝަން މެދުވެރިކޮށް 24 ގަޑިއިރު ލިބޭނެއެވެ.

މިހާރު ވެސް ޓެކްސީގެ ހިދުމަތަށް 1،500 އެއްހާ ކާރު ރަޖިސްޓްރީކޮށްފައިވެއެވެ.

ސަރުކާރުގެ ޓެކްސީ ލައިންގެ ހިދުމަތް ދޭން ފަށާނީ ތިން ފިޔަވައްސަކަށް ބަހާލައިގެންނެވެ.

ކުރިން އިއުލާނުކޮށްފައިވާ ގޮތުން ފުރަތަމަ ފިޔަވަހީގައި މި އަހަރުގެ ތެރޭގައި މާލެ އާއި ހުޅުމާލޭގެ އިތުރުން ވެލާނާ އިންޓަނޭޝަނަލް އެއާޕޯޓަށް ހިދުމަތް ދޭން ފަށާނެ އެވެ. އަދި ދެ ވަނަ ފިޔަވަހީގެ ދަށުން 2026 ވަނަ އަހަރާއި 2027 ވަނަ އަހަރު ވިލިމާލެ އާއި ތިލަފުއްޓަށް ހިދުމަތް ތައާރަފްކުރާނެ އެވެ. ތިން ވަނަ ފިޔަވަހީގައި އެ ހިދުމަތް ރަސްމާލެ އާއި ގިރާވަރާއި އައްޑު އާއި ފުވައްމުލަކުގައި ފަށާނެ އެވެ. އަދި އެ ހިދުމަތް ހދ. ކުޅުދުއްފުއްޓަށް 2028 ވަނަ އަހަރާއި 2029 ވަނަ އަހަރު ތައާރަފްކުރަން ރާވާފައިވެ އެވެ.

އެމްޓީސީސީން ޓެކްސީގެ ހިދުމަތް ދޭން ހަމަޖެހިފައިވަނީ އިލެކްޓްރިކް ވެހިކަލް (އީވީ) ބޭނުންކޮށްގެންނެވެ. އަދި މި ހިދުމަތް ދޭނީ ހާއްސަ އެޕްލިކޭޝަނެއްގެ ތެރެއިން، ރާއްޖެއިން ބޭރުގައި ދޭ 'އޫބާ' އާއި 'ގްރޭބް' ފަދަ ހިދުމަތްތަކުގެ ސްޓައިލަށެވެ.