މަސްތުވާތަކެތީގެ މައްސަލާގައި އައްޑޫއިން ހައްޔަރުކުރި މީހުން ދޫކޮށްލީ އިންތިޚާބެއް އޮތީމައެއް ނޫން: އިހްސާން

މަސްތުވާތަކެތީގެ މައްސަލާގައި އައްޑޫއިން ހައްޔަރުކުރި 6 މީހުން ބަންދުން ދޫކޮށްލީ ގާނޫނާ ޤަވާއިދުގެ ތެރެއިން ކަމަށާ އައި އިންތިޚާބަކާ ގުޅުވައި ކުރި ކަމެއް ނޫން ކަމަށް ދާޚިލީ ސަލާމަތާ ބެހޭ ވަޒީރު ޢަލީ އިހްސާން ވިދާޅުވެއްޖެއެވެ.

އައްޑޫގައި ފުޅާ ދާއިރާއަކަށް މަސްތުވާތަކެތި ވިއްކައި ވިޔަފާރިކޮށް، އެކަމުން ހޯދާ ފައިސާ ލޯންޑާކުރާކަމަށް ތުހުމަތުކުރެވޭ ހަ މީހަކު ހައްޔަރުކުރުމަށްފަހު ޕީޖީން އެދިގެން ދޫކޮށްލީ ކައުންސިލް އިންތިޚާބާ ދިމާކޮށް ކަމަށްބުނެ ވާހަކަތައް ވަނީ އޭރު ފަތުރާފައެވެ.

އެކަމާގުޅިގެން މިއަދުގެ ނުސްވެރިންގެ ބައްދަލުވުމުގައި ކުރި ސުވާލަކަށް ޖަވާބު ދެއްވަމުން އިހްސާން ވިދާޅުވީ މީހަކު ފުލުހުންގެ ބަންދަށް ނަގައި މައްސަލައެއް ޕީޖީ އޮފީހާ ހަމައަށް ދަނީ ވަކި ޓައިމްލައިން އެއްގެ ތެރެއިން ކަމަށެވެ.

އެ ޓައިމްލައިންއަށް ބަލާލީމާ އެނގޭނެ އިންތިޚާބާ ގުޅުންހުރި ޑިޒިޝަނެެއް ނޫންކަން އެދުވަހު އެ ނެގިގެން ދިޔައީ. އެއީ ޕީޖީ ދައުވާ އުފުލާނީތޯ އަދި ވަކިން ޚާއްސަކޮށް ދައުވާ އުފުލާއިރު ބަންދާމެދު ގޮތެއް ނިންމަނީތޯ ނިންމަން އޮތް ދުވަސް އެ ހިސާބުން އެ ޖެހެނީ. އެހެންވީމާ އެއީ ޖިނާއީ އިޖުރާތުގެ ގާނޫނުގެ ދަށުން ކަން ކުރަން އޮންނަ އުސޫލު.

ވަޒީރު އިހްސާން

ވަޒީރު ވިދާޅުވީ މަސްތުވާތަކެތީގެ އެ މައްސަލާގައި މިހާތަނަށް ވަރަށް ގިނަ ހެކިތަކެއް ލިބިފައިވާ ކަމަށެވެ. ނަމަވެސް ޕީޖީ އޮފީހުން ފުލުހުންނަށް ލަފާ ދިނީ މައްސލަައިގެ ތަހުގީގު އިތުރަށް ފުރިހަމަ ކުރުމަށް ކަމަށާ، އެހެން ކަމުން އެކަން ކުރުމަށްފަހު އަލުން އެ މައްސަލަ ޕީޖީއަށް ހުށަހެޅޭ ހިސާބުން ހުށަހަޅާން ފުލުހުންނަށް އަންގާވާފައިވާ ކަމަށް އިހްސާން ވިދާޅުވިއެވެ.

” ބަންދުގައި މީހާ އެވަގުތަށް ނުބެހެއްޓޭތީ ބަންދުން ދޫކޮށްލާފައި އެވަނީ. ކުރިންވެސް ދެންނެވުނުހެން ޝަރީއަތެއްގައި  ނުވަތަ ތަހުގީގަކަށް މީހަކު ހަެއޔަރުކުރާ ހިސާބުން ބަންދުގެ މުއްދަތެއް އެބަ އެކްޓިވޭޓްވޭ. އެ މުއްދަތު ބަދަލުވާނީ ޕްރޮސިކިޔުޓަރު ކޯޓަށް ގޮއްސަ އެހިސާބުން ޕްރޮސިކިޔުޓް ކުރީމާ.  ދެން ކޯޓުން އެ މުއްދަތު ދީފި ނަމަ.“

ވަޒީރު އިހްސާން

ވަޒީރު ވިދާޅުވީ، ރާއްޖެއަކީ އިންތިޚާބުތައް ގިނަ ގައުމެއް ކަމަށާ، އެމީހުން ދޫކޮށްލަންޖެހޭ ޓައިމްލައިންއާ އިންތިޚާބު އޮންނަ ދުވަސްވަރާ ދިމާވުމަކީ ދިމާވި ކަމެއް ކަމަށާ އެއީ އިންތިޚާބާ ގުޅުންހުރި ކަމެއް ނޫން ކަމަށެވެ.

މަސްތުވާތަކެތީގެ އެ މައްސަލާގައި ހައްޔަރު ކުރީ، ސ. ހިތަދޫ، ކޮންމުލި، އަލީ ނަދީމް، 30، ސ. ހިތަދޫ ފަލާހް، ހާފިޒު ފައުޒީ، 31، އާއި ސ. ހިތަދޫ ވެޔޮފެހެބުރުގެ، އިބްރާހީމް ސިރާޖު، 43 އާއި ސ. ހިތަދޫ، ދޮރުފޮތިމާގެ، ހަސަން އަލްފާފް، 28، އާއި ސ. ހިތަދޫ، ކެކުރިމާގެ، އަމީން މުހައްމަދު، 23، އަދި ދ. ހުޅުދެލި، އަންބަރީގެ، ޒަހްނާ އަހްމަދު އެވެ.

ޕީޖީން ކުރިން ބުނީ އައްޑޫ ޑްރަގް ނެޓްވޯކުގައި ހިމެނޭ ހަ މީހުން ދޫކޮށްލީ މައްސަލައިގައި ތަހުގީގު ކުރުމަށް ގާނޫނުގައި ކަނޑައެޅިފައިވާ މުއްދަތު ހަމަވިއިރު ލިބިފައިވާ ހެކި ގަރީނާ ވަޒަންކޮށް ބެލިއިރު، ތުހުމަތުކުރެވޭ މީހުން ކުށްކުރާ ޖަމާއަތެއްގައި ބައިވެރިވިކަން ނުވަތަ މަނީ ލޯންޑާކުރިކަން ގާނޫނުގައި ކަނޑައެޅިފައިވާ މިންގަނޑަށް ސާބިތުކޮށްދެވަރަށް ހެކި ނެތުމުން ކަމަށެވެ.

"މި މައްސަލައިގެ ތަހުގީގު މުއްދަތު ގާނޫނު ތަންދޭ އެންމެ ދިގު މުއްދަތާ ހަމައަށް އެކި ފަހަރުމަތިން ވާނީ އިތުރުކޮށްދީފައި. ނަމަވެސް، އެ މުއްދަތުގެ ތެރޭގައި ތަހުގީގު އެކަށީގެންވާ ވަރަށް ފުރިހަމަކުރެވި، ދައުވާކުރެވޭ މިންވަރަށް ހެކި ގަރީނާ ހޯދިފައި ނުވޭ،" ޕީޖީން ބުންޏެވެ.