މަޖިލިހަށް ހޮވިއްޖެ ނަމަ ޕާޓީ ބަދަލު ނުކުރަން އެމްޑީޕީ ކެންޑިޑޭޓުންލައްވާ ހުވާ ކުރުވައިފި

މިއަންނަމަހުގެ 17 ގައި ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލިސް އިންތިހާބުގައި އެމްޑީޕީގެ ފަރާތުން ވާދަކުރާ ކެންޑިޑޭޓުން، ޕާޓީ ބަދަލުނުކުރާނެ ކަމަށް މާތް ﷲ ގަންދީ ހުވާކުރުވައިފިއެވެ.

އެމްޑީޕީގެ ކެންޑިޑޭޓުން އެކަމަށް އިގުރާރުވެ ހުވާކޮށްފައިވަނީ މިރޭ އެޕާޓީގެ ފަރާތުން ކެންޕެއިން ފެށުމަށް ބޭއްވި ޖަލްސާގައެވެ. އިސްވެ ހުވާލައިދެއްވީ އެމްޑީޕީގެ ޗެއާޕާސަން ފައްޔާޒު އިސްމާއީލްއެވެ.

އެހުވާގައި ބުނެފައިވަނީ ގޮނޑި ކާމިޔާބު ކުރެވިއްޖެ ނަމަ މަޖިލީހުގެ ދައުރުގެ މުއްދަތުގައި އެމްޑީޕީގެ މެމްބަރެއްގެ ގޮތުގައި ހުރުމަށާއި، ޕާޓީގެ އަސާސީ ގަވާއިދާއި ޕާޓީގެ އުސޫލުތަކާއި ނިންމުންތަކާއި، ޕާލަމެންޓްރީ ގްރޫޕްގެ ހިންގާ ގަވާއިދަށް ހުރުމަތްތެރިކޮށް ހިތުމަށް އިގުރާރުވެ މާތްﷲ ގަންދީ ހުވާކުރާކަމަށެވެ.

ރާއްޖޭގައި މިވަގުތު އޮތް އެންމެ ބޮޑު އިދިކޮޅުޕާޓީ އެމްޑީޕީން ކެނޑިޑޭޓުން ލައްވާ ޕާޓީ ބަދަލު ނުކުރުމަށް ހުވާ ކުރުވާފައިވާއިރު، މިހާރު ހިނަގަމުން މިދާ 19 ވަނަ މަޖިލީހަށް އެމްޑީޕީ ޓިކެޓްގައި އިންތިހާބުވި ބައެއް މެމްބަރުން ވަނީ ޕާޓީ ބަދަލުކޮށްފައެވެ.  އެގޮތުން މިދިޔަ ޑިސެމްބަރު މަހުގެ 28 ވަނަ ދުވަހު އެމްޑީޕީގައި ތިއްބެވި 13 މެމްބަރަކު ވަނީ ޕީއެންސީއަށް ސޮއި ކުރައްވާފައެވެ.

މިފަދަ ގޮތަކަށް ޕާރޓީ ބަދަލުކުރުމަކީ ރާއްޖޭގައި ވަރަށް ގިނައިން ހިނގާކަމަކަށްވާއިރު އެކަން ހައްލުކުރުމަށް އެމްޑީޕިން މިހާރު ވަނީ މަޖިލީހަށް އެންޓިޑިފެކްޝަން ގާނޫނެއް ވެސް ހުށަހަޅާފައެވެ.