ޓަވަރުދޮށް ގޮނޑުކުރި ބައެއް މީހުން އެފްޑީސީން ޖޫރިމަނާކޮށްފި

ހުޅުމާލޭގެ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަނުން ތަރައްޤީކޮށްފައިވާ ޓަވަރުތަކުގެ އެތެރެ އާއި ވަށައިގެންވާ ސަރަހައްދުތަކަށް ކުނިއަޅާ މީހުން ފާހަގަކޮށް ޖޫރިމަނާކުރަން ފަށައިފިއެވެ.

މިކަމާ ގުޅޭގޮތުން އެފްޑީސީއިން ބުނީ، ޓަވަރުތަކުގެ ގްރައުންޑް ފްލޯ ހިމެނޭހެން ކަނޑައެޅިފައިވާ އުސޫލްތަކާ ހިލާފަށް ބައެއް ފަރާތްތަކުން ކުނިއަޅައި ގޮނޑުކުރަމުންދާކަން ފާހަގަކުރެވޭ ކަމަށެވެ. މިގޮތަށް ކުނިއަޅައި ހެދުމުގެ ސަބަބުން ތަނުގައި ދިރިއުޅެމުންދާ ފަރާތްތަކުގެ އާއްމު ސިއްހަތަށާއި، ސަލާމަތަށް ނުރައްކާވާފަދަ ހާލަތްތައް މެދުވެރިވަމުން އަންނަކަމުގެ ޝަކުވާ ލިބެމުން އަންނަކަމަށް އެފްޑީސީން ބުންޏެވެ.

އުލޫފާ ހިލާފަށް ތަންތަނަށް ކުނި ނޭޅުމަށް ތަކުރާރުކޮށް ނަސޭހަތް ދިން ނަމަވެސް ކުނިއަޅަމުންދާކަން ފާހަގަކޮށް އެފްޑީސީން ބުނީ، ގޭބިސީތަކުގައި އުފެދޭ ކުނި އުކާލަންވާނީ ހަމައެކަނި ގްރައުންޑް ފްލޯގައި ހުންނަ ގާބޭޖް ރޫމްގައި އެކަމަށް ހާއްސަކޮށްފައި ހުންނަ ކުނިވަށިތަކަށް ކަމަށެވެ. އެގޮތުން އެޕާޓްމަންޓަށް ބަދަލުވާއިރު އެއްޗެހި ގެންނަ ކަރުދާސް ފޮށިތަކާއި، އެނޫންވެސް ކުނިބުނި އުކާލުމަކީ ތަނުގެ ވެރިފަރާތުގެ ޒިންމާއެއްކަމަށް އެޗްޑީއެފްސީން ބުންޏެވެ.

ޤަވައިދާ ހިލާފަށް ކުނިއަޅާ ފަރާތްތައް ޖޫރިމަނާކުރަން ފަށާފައިވާއިރު އެފްޑީސީން ބުނީ، ޓަވަރުތަކުގައި ދިރިއުޅެމުންދާ ފަރާތްތަކުގެ ރައްކާތެރިކަން ކަށަވަރުކޮށް، ތަނުގެ ސާފްތާހިރުކަން ދެމެހެއްޓުމަށް ޓަވަރުތައްދޮށަށް ޖަމާކޮށްފައިހުރި ކުނިތައް ވެމްކޯއާ ގުޅިގެން ނަގަމުންދާކަމަށެވެ. އެގޮތުން މި މަސައްކަތުގެ ދަށުން އަމާން އުދަރެސް އަދި ދޯދީގެ 32 ޓަވަރު ސާފްކުރުމުގެ މަސައްކަތް ކުރުމަށް ހަމަޖެހިފައިވާކަމަށް އެފްޑީސީން ބުނެއެވެ.