އިންސާނީ ހައްގުތައް ރައްކާތެރިކުރުމަށް ތައްޔާރު: ޝާހިދު

އިންސާނީ ހައްގުތައް ރައްކާތެރިކުރުމަށް ކުރެވެން ހުރި ހުރިހާ މަސައްކަތެއް ކުރުމަށް ރާއްޖެއިން ތައްޔާރުކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އިންސާނީ ޙައްޤުތަކާއިބެހޭ ހައިކޮމިޝަނަރ މިޝެލް ބެޗްލެޓް ފޮނުއްވި ސިޓީއަކަށް ޖަވާބު ދެއްވަމުންނެވެ.

ޝާހިދު ވިދާޅުވީ އިންސާނީ ޙައްޤުތައް ރައްކާތެރިކޮށްދީ އިންސާނީ ޙައްޤުތަކަށް ކުރެވޭ މަސައްކަތްތައް އިތުރަށް ފުޅާކުރުމަށްޓަކައި ކުރެވެންހުރި ހުރިހާކަމެއް ކުރުމަށް ރާއްޖެއޮތީ ތައްޔާރަށްކަމަށެވެ. އެގޮތުން ހައި ކޮމިޝަނަރގެ އޮފީހާއި އިންސާނީ ޙައްޤުތަކާއި ބެހޭ ކައުންސިލްގެ އުޞޫލުތަކަށް އެއްބާރުލުންދީ އެކުގައި މަސައްކަތް ކުރުމަށް ތައްޔާރުކަމަށް މިނިސްޓަރ ފާހަގަކުރެއްވިއެވެ.

މިސަރުކާރުގެ ފުރަތަމަ 100 ދުވަހުގެ ވަޢުދުތަކުގެ ތެރޭގައި ބައިނަލްއަގްވާމީ އިންސާނީ ހައްގުތަކަށް މަސައްކަތްކުރާ ފަރާތްތަކާއި އެކު ގުޅުން ބަދަހިކުރުން ހިމެނޭކަމަށް ޝާހިދު ފާހަގަކުރެއްވިއެވެ. އެގޮތުން އދ.ގެ ވޯރކިންގ ގްރޫޕް އޮން އާރބިޓްރަރީ ޑިޓެންޝަން އަދި ވޯރކިންގް ގްރޫޕް އޮން އެންފޯރސްޑް އެންޑް ޑިސެޕެއަރެންސްއާއި އެކު މިހާރުވެސް ވާހަކަދެކެވެމުންދާކަމަށް މިނިސްޓަރ ވިދާޅުވިއެވެ.

މި ސިޓީގައި ޝާހިދު އިތުރަށްވަނީ އދ.ގެ އިންސާނީ ޙައްޤުތަކާއި ބެހޭ ކައުންސިލްގެ ސްޕެޝަލް ޕްރޮސީޖަރސް މެންޑޭޓް ހޯލްޑަރުންނަށް ރާއްޖެއައުމަށް، ފޮނުވާފައިވާ ހުޅުވާލެވިފައިވާ ދަޢުވަތު އަދިވެސް ދެމިއެބައޮތް ކަމަށް ބަޔާންކުރައްވާފައެވެ.

އެގޮތުން، މިދިޔަ ސަރުކާރުގައި ސްޕެޝަލް ޕޮސީޖަރސް މެންޑޭޓް ހޯލްޑަރުން ދިވެހިރާއްޖެއަށް އައުމަށް ކުރެއްވި މަސައްކަތް ނާކާމިޔާބުވެފައި ވީނަމަވެސް، މިސަރުކާރުން އެކަމަށް މަރުޙަބާ ކިޔާނެ ކަމަށާއި މެންޑޭޓް ހޯލްޑަރުންގެ ކިބައިން ރާއްޖެއަށް ވަޑައިގަތުމަށް ވަނީ އެދިވަޑައިގެންފައެވެ.