އެއްބަސްވުމުގައި ސޮއި ކޮށްފައިތިބި އެންމެނަށް ޖަނަވަރީ މަހުގައި ފުލެޓް ތަޅުދަނޑި ދެވޭނެ: ވަޒީރު

4000 ފުލެޓް ގެ އެއްބަސްވުމުގައި ސޮއި ކޮށްފައިތިބި އެންމެނަށް ޖަނަވަރީ މަހުގައި ފުލެޓް ތަޅުދަނޑި ހަވާލުކުރެވޭނެ ކަމަށް ގެދޮރުވެރިކަމާ ބެހޭ ވަޒީރު ޑރ.އަބްދުالله މުއްޠަލިބު ވިދާޅުވެއްޖެއެވެ.

ގެދޮރުވެރިކަމާބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މުއްޠަލިބު ވިދާޅުވީ، ގެދޮރުވެރިކަމުގެ މަޝްރޫޢު ތަކަކީ ސަރުކާރުން ވަރަށް އިސްކަމެއް ދީގެން ކުރިއަށް ގެންދާ މަޝްރޫޢުތަކެއް ކަމަށެވެ.

އެގޮތުން 4000 ފުލެޓްގެ މަސައްކަތް ނިންމުމަށް ޚާއްސަ އިސްކަމެއް ދެވި، އެ ލިބުނު މީހުންނާ ހަވާލުކުރުމުގެ މަސައްކަތް ކުރިއަށްދާ ކަމަށް ވިދާޅުވިއެވެ.

ތިންކޮޓަރީގެ 2800 ފުލެޓާއި، ދެކޮޓަރީގެ 1200 ފުލެޓް އިމާރަތްކޮށް ނިމުމަކާ ހަމައަށް ވަނީ އައިސްފައި. މި 4000 ފުލެޓްގެ ތެރެއިން 3879 ފަރާތަކަށް ފުލެޓް އެއްބަސްވުންވަނީ ސޮއިކުރެވިފައި. އަދި 399 ފަރާތަކާ ފުލެޓް ތަޅުދަނޑި ހަވާލުކުރެވިފައިވޭ. އެއްބަސްވުން ހެދިފައިވާ ހުރިހާ ފަރާތަކަށް އިރާދަކުރެއްވިއްޔާ  މި ޖަނަވަރީ މަސްތެރޭގައި ތަޅުދަނޑި ހަވާލުކޮށް ނިމޭނެ.

ވަޒީރު ޑރ.މުއްޠަލިބު

ފުލެޓް ހަވާލުކުރުން ލަސްވި ސަބަބެއްގެ ގޮތުގައި ވަޒީރު ވިދާޅުވީ އިމާރާތް ކުރުމުގެ އެއްބަސްވުމުގެ ތެރޭގައި ފެނާއި ނަރުދަމާއާއި ކަރަންޓް ގުޅުން ހިމެނިފައި ނުވާތީ އެ މަސައްކަތް ސްޓެލްކޯއާއި އެމްޑަބްލިޔުއެސްސީ މެދުވެރިކޮށް ކުރަންޖެހުމުން ކަމަށެވެ. އަދި އޭގެ އިތުރުން ލޭންޑް ސްކޭޕިން މަސައްކަތްވެސް ކުރަން ޖެހިފައިވުމުން ކަމަށް ވަޒީރު ވިދާޅުވުއެވެ.

މި ސަރުކާރު ހަވާލުވިއިރު 4000 ފުލެޓްގެ ނިމިފައިވަނީ 32 އިންސައްތަ. މިވީ ދެ އަހަރުތެރޭގައި ބާކީ 68 އިންސައްތަ ނިންމައި އޭގެ އިތުރަށް ފެނާއި ނަރުދަމާއާއި ކަރަންޓް ގުޅުމުގެ މަސައްކަތާއި ލޭންޑް ސްކޭޕިންގެ މަސައްކަތް ކުރުމަށްފަހު ފުލެޓްތައް ލޮބޭ ފަރާތްތަކަށް ހަވާލުކުރެވިގެން މިދަނީ

ވަޒީރު ޑރ.މުއްޠަލިބު

ދާދިފަހުން ރައީސް ޑރ.މުޙައްމަދު މުޢިއްޒު ވަނީ 4000 ފްލެޓުތައް ލިބުނު ފަރާތްތަކުން ދައްކަންޖެހޭ ކުއްޔާއި ޑައުންޕޭމަންޓް ކުޑަކޮށްދިނުމަށް ނިންމަވާފައެވެ.

އެގޮތުން، މިހާރު 3 ކޮޓަރީގެ އެޕާޓްމަންޓުތަކަށް ޑައުންޕޭމަންޓްގެ ގޮތުގައި 8،500 ރުފިޔާ އަދި ކުލީގެ ގޮތުގައި މަހަކު 10،000 ރުފިޔާ ދައްކަންޖެހޭ ގޮތަށް ވަނީ ބަދަލު ގެނެސްފައެވެ. އަދި ދެ ކޮޓަރީގެ އެޕާޓްމަންޓުތަކުގެ ޑައުންޕޭމަންޓަށް 6،000 ރުފިޔާ އަދި މަހު ކުލީގެ ގޮތުގައި 7،000 ރުފިޔާ ދައްކަންޖެހޭ ގޮތަށް ވަނީ އަގުތައް ކުޑަކޮށްދެއްވާފައެވެ.