ޕީއެންސީގެ ވަޓްސްއެޕް ގްރޫޕުން ޢަބްދުއްރަހީމް ބޭރުކޮށްފައެއް ނުވާނެ: ފަލާހް

ޕީއެންސީގެ ރަސްމީ ވަޓްސްއެޕް ގްރޫޕުން މަޖިލީހުގެ ރައީސް އަދި ޕީއެންސީގެ ޗެއާޕާސަންގެ މަޤާމުގައި ހުންނެވި ޢަބްދުއްރަޙީމް ޢަބްދުﷲ ބޭރުކޮށްފައިނުވާ ކަމަށް ޕީއެންސީގެ ޕީޖީ ލީޑަރ އިބްރާހީމް ފަލާހް ވިދާޅުވެއްޖެއެވެ.

ވެރިކަން ކުރަމުންދާ މައި ޕާޓީ، ޕީއެންސީގެ ގްރޫޕްތަކުން މަޖިލީސް ރައީސް ބޭރުކުރިކަމުގެ ވާހަކަތަކެއް މީސްމީޑިއާގައި ދަނީ ދެކެވެމުންނެވެ. މިކަމާ ގުޅޭގޮތުން "ވޮއިސް" އަށް މިކަން ކަށަވަރުކޮށްދެއްވަމުން ފަލާހު ގްރޫޕުން ޢަބްދުއްރަހީމް ވަކިކުރިކަމަށް ދައްކާ ވާހަކަތަކަކީ "ބޮޑު ދޮގެއް" ކަމަށެވެ.

މީސް މީޑިއާގައި ދައުރުވަމުންދާ ވާހަކަތަކަށް ބަލާއިރު،މަޖިލީސް ރައީސް ވަޓްސްއެޕް ގްރޫޕްތަކުން ބޭރުކޮށްފައިވަނީ، ޕީއެންސީގެ ލީޑަރ ރައީސް ޑރ. މުޙައްމަދު މުޢިއްޒުގެ އެންގެވުމަށެވެ.

ޢަބްދުއްރަހީމާ ގުޅޭގޮތުން ފަހަކަށް އައިސް މިފަދަ ވާހަކަތަކެއް ފެތުރެމުންދަނީ އެމަނިކުފާނުގެ ދަރިކަލުންކަމަށްވާ ކުރީގެ ޓޫރިޒަމް މިނިސްޓަރ ފައިސަލް އިބްރާހީމް އެމަޤާމުން ވަކިކުރެއްވި ފަހުންނެވެ. ފައިސަލް ވަކިކުރެއްވުމާއެކު ޢަބްދުއްރަހީމާ ރައީސް ޑރ.މުއިއްޒުގެ ގުޅުން ގޯސްވެފައިވާކަމަށް ސިޔާސީ ބައެއް ފަރާތްތަކުން ބުނިނަމަވެސް ޕީއެންސީން އެކަން ދޮގުކުރެއެވެ. ފައިސަލް މަޤާމުން ވަކިކުރެއްވުމަކީ ޕީއެންސީ ބައިބައިވުމުގެ ފެށުމުގެ ގޮތުގައި ސިޔާސީބައެއް ފަރާތްތަކުން ސިފަކުރަމުންދާކަން ފާހަގަކޮށްލަންޖެހެއެވެ.

މަޖިލީސް ރައީސްގެ ދަރިކަލުން ޓޫރިޒަމް މިނިސްޓަރުކަމުން ވަކިކުރައްވާފައިވަނީ މިދިޔަ މަހުގެ 28 ވަނަ ދުވަހުއެވެ. ނަމަވެސް އޭނާ މަޤާމުން ވަކިކުރެއްވި ސަަބަބެއް ސަރުކާރުން ހާމަކޮށްފައި ނުވެއެވެ. އޭނާ މަޤާމުން ވަކިކުރެއްވުމަށްފަހު މިހާރު ޓޫރިޒަމް މިނިސްޓްރީ ވަނީ އެންވާރަމެންޓް މިނިސްޓްރީގެ ދަށަށް ބަދަލުކޮށްފައެވެ.