ސައުދީގައި ފަލަސްތީނުގެ ދައުލަތް ގާއިމްކުރުމަށް ނަތަންޔާހޫ ގޮވާލެއްވުމުން, ރާއްޖެއިން އެކަން ކުށްވެރިކޮށްފި

ސަޢުދީގައި ފަލަސްޠީނު ދައުލަތް ގާއިމުކުރުމަށް ހިތްވަރުދީ، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ދެއްކެވި ވާހަކަތައް ދިވެހި ސަރުކާރުން ކުށްވެރިކޮށްފިއެވެ.

ރާއްޖެއިން ނަތަންޔާހޫގެ ވާހަކަ ކުށްވެރިކޮށްފައިވަނީ މިއަދު ފޮރިން މިނިސްޓްރީ އިން ނެރުނު ބަޔާނެއްގައެވެ. ނަތަންޔާހޫ ވިދާޅުވެފައިވަނީ، ސަޢުދީއަކީ ބިމުގެ ޖާގަ ބޮޑު ޤަައުމެއް ކަމުން އެގައުމުގައި ފަލަސްޠީނުގެ ދައުލަތެއް ގާއިމުކުރެވިދާނެއެވެ.

މިކަމާ ގުޅިގެން ދިވެހި ސަރުކާރުގެ ފަރާތުން ނެރުނު ބަޔާނުގައި ވަނީ، ސައުދީ އަރަބިއްޔާގައި ފަލަސްތީނުގެ ދައުލަތެއް އުފެއްދުމަށް ގޮވާލާ، އިޒްރޭލުގެ ބޮޑުވަޒީރު ދެއްކީ ޒިންމާދާރުކަން ކުޑަވާހަކަތަކެއްކަމަށް ބަޔާންކޮށްފައެވެ. އަދި އެވާހަކަތައް ދައްކަވާފައިވަނީ ހަމަނުޖެހުން އުފެދޭ ރޫހުގައިކަމަށްވެސް ވަނީ ފާހަގަކޮށްފައެވެ. ދިވެހި ސަރުކާރުގެ ބަޔާނުގައި ބުނެފައިވަނީ ނަތަންޔާހޫ ދެއްކި  ވާހަކަތަކަކީ ބައިނަލްއަޤްވާމީ ޤާނޫނާއި އދ. ގެ ގަވާއިދުތަކާއި ކަނޑައެޅިގެން ފުށުއަރާ ވާހަކަތަކެއް ކަމަށާއި، ރާއްޖެއިން އަބަދުވެސް ބަލައިގަންނާނީ އިރުމަތީ ގުދުސް ފަލަސްޠީނުގެ ވެރިރަށުުގެ ގޮތުގައި، ހެދުމަށް 1967 ގައި ނިންމާފއިވާ ނިންމުންކަމަށެވެ.

ސަރުކާރުގެ ބަޔާނުގައި ވަނީ، ސަރަހައްދީ ހަމަޖެހުމަށް ބުރޫއަރާ މިފަދަ ވާހަކަތަކާއި ދެކޮޅަށް ބައިނަލްއަގްވާމީ މުޖުތަމައުއިން ހަރުދަނާ ގޮތެއްގައި ތެދުވެ ފިޔަވަޅުތައް އެޅުމަށް ގޮވާލާފައެވެ.

މިއީ ހަމައެކަނި ސައުދީ އަރަބިއްޔާގެ އިސްތިގުލާލާ ހިލާފުވުން ނޫންކަމަށާއި، އިޒްރާއީލްގެ ބޮޑުވަޒީރުގެ އެ ވާހަކަތަކަކީ ފަލަސްތީނުގެ ރައްޔިތުންގެ ހައްގުތަކަށް އިންކާރުކުރުން ކުރިއަށް ގެންދިއުމަށް ތަމްސީލުކުރާ ވާހަކަތަކެއް ކަން ސަރުކާރުން ވަނީ ފާހަގަކޮށްފައެވެ.

ފަލަސްތީނުގެ ރައްޔިތުންނަށް ސައުދީގައި ދައުލަތެއް ހެދުމާ ގުޅޭގޮތުން ނަތަންޔާހޫ ދެއްކެވި ވާހަކަތަކާ ގުޅިގެން ސައުދީ އަރަބިއާއިން ބުނެފައިވަނީ، ފަލަސްތީނު ރައްޔިތުންގެ ދައުލަތަކީ ފަލަސްތީނު ކަމަށާއި، އެކަން ބަދަލުކުރުމުގެ ހައްޤެއް އިސްރާއީލަކަށް ނޯންނާނެ ކަމަށެވެ.