މަޖިލީހުގެ ޖަލްސާ ކެންސަލް ކޮށްފި

މިއަދު ބާއްވަން ނިންމާފައި އޮތް، މަޖިލީހުގެ ޖަލްސާ ކެންސަލްކޮށްފިއެވެ.

މަޖިލީހުގެ މިއަދުގެ ޖަލްސާ އެޖެންޑާކޮށްފައި އޮތީ ހެނދުނު 9:00 އަށެވެ.

ނަމަވެސް، މެންބަރުން ހަމަނުވުމުގެ ސަބަބުން ޖަލްސާގެ ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވަނީ ހެނދުނު 10:00 އަށް ޖަލްސާ ފެށުން ފަސްކޮށްފަ އެވެ.

10:00 އަށް ޖަލްސާ ފަސްކުރުމަށްފަހު، އެ ގަޑީގައިވެސް ޖަލްސާގެ ކޯރަމް ހަމައެއް ނުވިއެވެ. ޖަލްސާއަށް ހާޒިރުވެވަޑައުގެން ތިއްބެވީ، ނާޒިމް އާއި އިދިކޮޅު އެމްޑީޕީގެ ހަ މެންބަރުންނެވެ. ޕީއެންސީގެ މެންބަރުން މަޖިލީހުގެ ތަޅުމަށް ހާޒިރެއް ނުވެއެވެ.

އެހެންކަމުން، މިއަދުގެ ޖަލްސާ ނިންމަވައިލައްވައި މާދަމާއަށް ފަސްކުރީ ކަމަށް، ރިޔާސަތުގައި އިންނެވި މަޖިލީހުގެ ނާއިބު ރައީސް އަހުމަދު ނާޒިމް އިއުލާން ކުރެއްވިއެވެ.

ނާޒިމް ރިޔާސަތުގައި އިންނަވައިގެން ކުރިއަށް ގެންދަވަން މަސައްކަތްކުރެއްވި ޖަލްސާއަށް ޕީއެންސީގެ މެންބަރުން ހާޒިރު ނުވިއިރު، އެ ޕާޓީގެ މަޖިލިސް ވަޓްސްއަޕް ގުރޫޕުން ނާޒިމް މިއަދު ވަނީ ބޭރުކޮށްފައެވެ.

އެނގިފައިވާ ގޮތުގައި ނާޒިމް އެ ގުރޫޕުން ބޭރުކޮށްލީ މިއަދު ހެނދުނު 6:00 އެހާކަންހާއިރުއެވެ.

އެ ގުރޫޕަކީ ރައީސް ޑރ މުޙައްމަދު މުޢިއްޒު ހިމެނިވަޑައިގަންނަވާހެން ޕީއެންސީގެ މަޖިލީސް މެންބަރުން ތިއްބަވާ ވަޓްސްއެޕް ގްރޫޕެވެ.

ނާޒިމް އެ ގުރޫޕުން ބޭރުކޮށްލާފައިވާއިރު، މިދިޔަ މަހު 21 ގައި މަޖިލީހުގެ އެންމެ ބާރުގަދަ ކޮމިޓީތަކުން ވެސް އޭނާ ވަނީ ވަކިކޮށްފައެވެ. އެ ބަދަލު ގެނައިކަން މަޖިލީހުގެ ޖަލްސާގައި އިއުލާނެއް ނުކުރެއެވެ.

މީގެ އިތުރުން، ނާޒިމް އެ ގުރޫޕުން ބޭރުކޮށްލާފައި މިވަނީ، އޭނާ މަޖިލީހުގެ ނާއިބު ރައީސްގެ މަގާމުން ވަކިކުރަން އުޅޭ ކަމުގެ އަޑުތައްވެސް ފެތުރެންފަށާފައިވާ ދަނޑިވަޅެއްގައިކަން ފާހަގަކޮށްލަން ޖެހެއެވެ.