އެސްޖޭ ކުންފުނިން ފޭސް ދޭއްގައި އިމާރާތްކުރަމުންދާ މިސްކިތް ނިމޭނީ ޑިސެމްބަރުމަހު: އިސްލާމިކް މިނިސްޓްރީ

ހުޅުމާލޭ ދެވަނަ ފިޔަވަހީގައި އިމާރާތްކުރަމުންދާ ދެ މިސްކިތުގެ ތެރެއިން އެސްޖޭ ކޮންސްޓްރަކްޝަނުން އިމާރާތްކުރަމުންދާ މިސްކިތް ނިމޭނެ ތާރީހަކީ މިއަހަރުގެ ޑިސެމްބަރުކަމަށް އިސްލާމިކް މިނިސްޓްރީން ބުނެފިއެވެ.

ހުޅުމާލޭގައި އިމާރާތްކުރަމުންދާ މިސްކިތްތައް މަސައްކަތް ގޮސްފައިވާ ހިސާބާ ގުޅޭގޮތުން އިސްލާމިކް މިނިސްޓްރީން ހިއްސާކުރި ލިއުމުގައިވާގޮތުން ހުޅުމާލެ ފޭސް ދޭއް ސަލާހުއްދީން ސްކޫލް ކައިރީހުރި މިސްކިތް ނިމޭނެ ތާރީހެއްގެ ގޮތުގައި ދީފައިވަނީ މިއަހަރުގެ ޑިސެމްބަރުމަހެވެ. މިހާރު ކުރިއަށްދަނީ އެ މިސްކިތުގެ ކޮންކްރިޓް އަރޗްތައް ހެދުމުގެ މަސައްކަތެވެ. އެސްޖޭ ކުންފުނިން އެ މިސްކިތުގެ މަސައްކަތް އަލުން ފަށާފައިވަނީ މީސްމީޑިއާގައި މިސްކިތް ނުނިމި ލަސްވަމުންދާ ވާހަކަތައް ދެކެވެން ފެށުމާ ގުޅިގެންކަން ފާހަގަކޮށްލެވެއެވެ.

އިސްލާމިކް މިނިސްޓްރީގެ ޓީމުން މިދިޔަ އަހަރުގެ ނޮެމްބަރުމަހު މިސްކިތް އިމާރާތްކުރާ ސައިޓަށްގޮސް ބެލުމަށްފަހު އޭރު ބުނެފައިވަނީ މިއަހަރުގެ ޖޫންމަހުގެ ތެރޭގައި މިސްކިތުގެ މަސައްކަތް ނިންމާލެވޭނޭކަމަށް އެސްޖޭއިން ބުނެފައިވާކަމަށެވެ. ކުރިން އެ މިސްކިތުގެ މަސައްކަތް ލަސްވަމުންދާ މައްސަލާގައި އިސްލާމިކް މިނިސްޓްރީން މިދިޔަ 2023 ވަނަ އަހަރުގެ މާޗްމަހު ބުނެފައިވަނީ، މަސައްކަތް މަޑުޖެހުނީ ފައުންޑޭޝަން އެޅިފަހުން ބެންޗްމާކްތަކުގައި މައްސަލަތަކެއް ދިމާވެގެން ކަމަށެވެ.

އެޗްޑީސީން މައުލޫމާތުދޭގޮތުގައި މި މިސްކިތަކީ ހުޅުމާލޭގައި ބިނާކުރެވިގެންދާނެ ތަފާތު މިސްކިތެއް ކަމަށެވެ. އެގޮތުން މި މިސްކިތް ފަރުމާކޮށްފައިވަނީ މިސްކިތައް އަރާ ފޭބުމުގައި ތޮއްޖެހުން ކުޑަވާނޭ ގޮތަށެވެ. މިސްކިތުގެ އެންމެ ހާއްސަ އެއްކަމަކީ، މިސްކިތް ފަރުމާކޮށްފައިވަނީ, ކޯޓްޔާޑް ސަރަހައްދުގައި މީހުންނަށް އިށިއިނދެވޭ ގޮތަށެވެ.

މިސްކިތުގެ މަސައްކަތުގެ އެއްބަސްވުމުގައި ސޮއިކޮށްފައިވަނީ، 2022 ވަނަ އަހަރުގެ ޖެނުއަރީމަހުގެ ތެރޭގައެވެ. އެސްޖޭއިން އެ މިސްކިތް ނިންމާގޮތަށް އޮތީ އަހަރުދުވަހުގެ ތެރޭގައެވެ. މިސްކިތުގައި އެއްފަހަރާ 1،400 މީހުންނަށް ނަމާދުކުރެވޭއިރު، މިސްކިތުގެ ބޭރާއެކު އެއްފަހަރާ 3،000 މީހުންނަށް ނަމާދުކުރެވޭނޭކަމަށް އިސްލާމިކް މިނިސްޓްރީން އޭރު ވަނީ ބުނެފައެވެ.

ހުޅުމާލޭގައި އިމާރާތްކުރަމުންދާ އިތުރު މިސްކިތްތަކަށް ބަލާއިރު، ޓަވަރު 16 ކައިރީ އިމާރާތްކުރަމުންދާ މިސްކިތް ނިމޭނޭ ތާރީހެއްގެ ގޮތުގައި ކަނޑައަޅާފައިވަނީ އަންނަ މެއިމަހުގެ ތެރޭގައެވެ. މިހާރު އެ މިސްކިތުގެ ކުރިއަށްދަނީ ފިނިޝިން މަސައްކަތެވެ. ހުޅުމާލެ ފޭސް ދޭއްގައި އިމާރާތްކުރަމުންދާ އިތުރު ތިން މިސްކިތެއް 2026 ވަނަ އަހަރުގެ ފުރަތަމަ ކުއާޓަރުގެ ތެރޭގައި ނިމޭނޭކަމަށް އިސްލާމިކް މިނިސްޓްރީން ބުނެއެވެ. އެ ތިން މިސްކިތަކީ ފެޑޯ ޕްރައިވެޓް ލިމިޓެޑުން ލޮޓް 20110 އިމާރާތްކުރަމުންދާ މިސްކިތާއި، ބެޗް ކުންފުނިން ލޮޓް 2215 ގައި އިމާރާތްކުރަމުންދާ މިސްކިތުގެ އިތުރުން ސަންފްރޮންޓުން އިމާރާތް ކުރަމުންދާ މިސްކިތެވެ.