ކޮންމެހެން ދަންވަރު ގޭގެއަށް ވަދެގެން ސަކަރާތް ޖަހާކަށް ނުޖެހޭ: ރައީސް ޔާމީން

ފުލުހުން ދަންވަރު ގޭގެއަށް ވަދެގެން "ސަކަރާތް" ޖަހަން ނުޖެހޭކަމަށް ކުރީގެ ރައީސް އަބްދުالله ޔާމީން އަބްދުލްޤައްޔޫމް ވިދާޅުވެއްޖެއެވެ.

ޕީއެންއެފުން ރޭގައި ބޭއްވި ޖަލްސާއެއްގައި ރައީސް ޔާމީން މިފަދައިން ވިދާޅުވީ، ކުރީ ސަރުކާރުގައި ރޯޑް ޑިވެލޮޕްމެންޓު ކޯޕަރޭޝަން (އާރްޑީސީ)ގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ދިރިއުޅޭ ތަނާއި އެ ކުންފުނީގެ ކުރީގެ ޗީފް ފައިނޭންޝަލް އޮފިސަރު މަގާމުގައި ހުރި ޔާސިރު ހަސަން ދިރިއުޅޭ ތަން ބަލާ ފާސްކުރުމާއި ގުޅިގެންނެއެވެ.

މިގޮތުން ރައީސް ޔާމީން ވިދާޅުވީ، ކޯޓު އަމުރު ހޯދައިގެން ދިރިއުޅޭތަން ބަލާ ފާސްކުރުމަކީ އެންމެ ރަނގަޅުކަމެއް ކަމެއް ނަމަވެސް، މާލެ ސިޓީގެ މޭޔަރު އާދަމް އާޒިމް ވިދާޅުވިހެން ދަންވަރު ގޭގެއަށް ވަދެ މިކަން ނުކުރުމަށް ތާއީދުކުރައްވާކަމަށެވެ.

14 މަސްދުވަސް ވެފައިވާ ކަމެއްގައި، ގޭގެއަށް ވަންނާނީ ދޮށީ އުމުރުގެ މީހުންނާއި ކުޑަކުދިން އަރާމުގައި ތިއްބާ ނޫންކަން ފާހަގަކުރައްވާ ރައީސް ޔާމީން ވިދާޅުވީ މިއީ ތަހުޒީބީ މުޖުތަމައެއްގައި ކަންކުރާ ގޮތް ނޫންކަމަށާއި، މިކަން ދުވާލު ގަޑީގައިވެސް ކުރެވޭނެ ކަމަށެވެ.

"ކޮންމެހެން ދަންވަރު ގޭގެއަށް ވަދެގެން، މި ބިރުވެރިކަމުގެ ތެރެއަށް ތުއްތު ކުދިންނާއި ދޮށީ މީހުން ވައްދައިގެން، މި ސަކަރާތް ޖަހާކަށް ނުޖެހޭ،"

ރައީސް ޔާމީން ވިދާޅުވިއެވެ.

ފުލުހުން ރަނގަޅު ގަޑިގަޑީގައި ކޯޓު އަމުރު ހިފައިގެން ގޭގެއަށް ދާންވީ ކަމަށާއި، ރޭގަނޑު ދަންވަރު މިފަދައިން އަމަލު ނުކުރިއަސް ވަގުން ހިފަން އުދަނގޫ ނުވާނެކަމަށް ރައީސް ޔާމީން ވިދާޅުވިއެވެ.