އަޑުގަދަވާގޮތަށް މޮޑިފައިކޮށްގެން ދުއްވާ އުޅަނދުތައް އެއް މަސް ދުވަހަށް ހިފަހައްޓަނީ

މާލޭ މަގުތަކުގެ ރައްކާތެރިކަން ކަށަވަރު ކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަޅުއްވަން އެންގެވި ފިޔަވަޅުތަކުގެ ދަށުން، އަޑުގަދަވާހެން ސައިލެންސަރު ހަރުކޮށްގެން ނުވަތަ އާންމުންނަށް އުނދަގޫވާ ގޮތަށް ބަދަލުކޮށްފައި ހުންނަ އުޅަނދުތައް 1 މަސް ދުވަހަށް ހިފެހެއްޓޭ ގޮތަށް ފުލުހުންގެ ގަވާއިދުތަކަށް އިސްލާހު ގެނެސްފިއެވެ.

އެއްގަމު ދަތުރުފަތުރު ކުރުމާ ބެހޭ ގާނޫނުގެ ދަށުން ފުލުހުން މި ގަވާއިދަަށް އިސްލާހު ގެނެސް ގަވާއިދު މިހާރު ވަނީ، ގެޒެޓް ކޮށްފައެވެ.

މި އިސްލާހު ބުނާގޮތުން، ސައިލެންސަރުގެ އަޑު ގަދަކޮށްގެން މީހުންގެ ހިތްތަކުގައި ބިރުވެރިކަން އުފެދޭގޮތަށް އުޅަނޑު ދުއްވައިފިނަމަ، އެ އުޅަނދު ދޫކުރެވޭނީ، ގެނެސްފައިވާ މޮޑިފިކޭޝަން ރަނގަޅު ކުރުމަށްފަހު މޮޑިފައިކޮށްފައިވަނީ ސައިލެންސަރު ނުވަތަ ބަރުގޮނު ފަދަ ބިރުވެރިކަން އުފެދޭ އެއްޗެއް ނަމަ، އެ އެއްޗެއް ފުލުހުންގެ ބެލުމުގެ ދަށުން ނައްތާލުމަށްފަހުއެވެ. އަދި އުޅަނދު ދޫކުރެވޭނީ އުޅަނދު ހިފެހެއްޓުނުތާ 30 ދުވަސް ހަމަވުމުން ކަމަށް ވެސް އެ އިސްލާހުގައި ބަޔާންކޮށްފައިވެއެވެ.

މީގެ އިތުރުން، ސައިލަންސަރު ބަދަލުކޮށްފައިވާ އުޅަނދެއް ނަމަ، ވެރިފަރާތަަށް އެކަން އަންގައިގެން އެ ކަމެއް ރަނގަޅު ނުކޮށްގެން ފުލުހުންގެ ބެލުމުގެ ދަށަށް ގެނެސްފައިވާ އުޅަނދެއް ނަމަ 15 ދުވަހުގެ ތެރޭގައި އެ އުޅަނދަކަށް ގެނެސްފައިވާ ބަދަލު ރަނގަޅުކުރަން ޖެހޭނެ ކަމަށް ވެސް މި އިސްލާހުގައި ބަޔާން ކުރެއެވެ.

މީގެ އިތުރުންވެސް ގެނައި ބަދަލުތަކުގެ ތެރޭގައި ނުގަވާއިދުން ޕާކުކޮށްގެން ފުލުހުންގެ ބެލުމުގެ ދަށަށް ގެންނަ އުޅަނދުތައް 48 ގަޑިއިރަށް ހިފެހެއްޓުމާއި، އަސްލަށް ބަދަލު ގެނެސްގެން ދުއްވާ އުޅަނދެއް ނަމަ ވެރިފަރާތަށް އަންގައި އެ ކަމެއް ރަނގަޅުނުކޮށްފިނަމަ 15 ދުވަހަށް އެ އުޅަނދެއް ޓޯކުރުން ވެސް ހިމެނެއެވެ.