ޑރ.ޖަމީލް ވިލިމާލޭގެ ތަރައްގީއަށް ގެންގުޅުއްވާ ތަސައްވުރު ހާމަކުރައްވައިފި

ރައްޔިތުންގެ މަޖިލީހުގެ އިންތިޚާބުގައި ވިލިމާލެ ދާއިރާއަަށް ޖޭޕީގެ ޓިކެޓްގައި ވާދަކުރައްވާ ކުރީގެ ނައިބު ރައީސް ޑރ.މުހައްމަދު ޖަމީލު އަހުމަދު، ހޮއްވަވައިދެއްވައިފިނަމަ ވިލިމާލެ ތަރައްގީ ކުރައްވާނެ ގޮތުގެ ތަސައްވުރެއް ހާމަކުރައްވައިފިއެވެ.

މި ތަސައްވުރު ހާމަކުރައްވާފައިވަނީ ރޭ އޮތް ޚާއްސަ ޖަލްސާއެއްގައެވެ.

މި ޖަލްސާގައި ވާހަކަފުޅު ދައްކަވަމުން ޑރ ޖަމީލް ވިދާޅުވީ މާލެއާއި ހުޅުމާލެއަށް މިހާރު އަންނަމުންދާ ތަރައްގީތައް ވިލިމާލެއަށްވެސް ލިބުން ހައްގުވެގެންވާކަމަށެވެ.

ޑރ.ޖަމީލު ވިދާޅުވީ އެމަނިކުފާނުގެ ވިލިމާލޭގެ ތަސައްވުރުގައި ވާގޮތުން، އެ ރަށުގައި ޓޫރިސްޓު ސްޓްރީޓެއް ގާއިމުކޮށް، އެ ސަރަހައްދުން ފަތުރުވެރިންނަށް ވިޔަފާރި ކުރެވޭނެ ގޮތެއް ހަމަޖެހިގެންދާނެއެވެ. އޭގެ އިތުރުން ވިލިމާލޭގެ އިގްތިސާދު ކުރިއެރުވުމަށް ކަލްޗުރަލް ވިލެޖެއް ގާއިމުކޮށް، ގެސްޓް ހައުސްގެ ވިޔަފާރި ފުޅާކުރުމަށް މަަސައްކަތްކުރައްވާނެކަަމަށްެ އެމަނިކުފާނު ފާހަގަކުރެއްވިއެވެ.

މި ތަސައްވުރުގައި ޒުވާނުންގެ ތަރައްގީއާއި ކުރިއެރުމަށްވެސް ވަނީ އިސްކަންދީފައެވެ. އެގޮތުން ޒުވާނުންނަށް ކުޅިވަރު ކުޅެވޭނެ އަދި މުނިފޫހިފިލުވޭނެ ގިނަ ހަރަކާތްތައް ހިންގޭނެ ގޮތަށް ޒަމާނީ ފެންވަރުގެ ސްޕޯޓްސް ކޮމްޕްލެކްސްއެއް ގާއިމު ކުރުމަށް ޑރ.ޖަމީލްގެ ތަސައްވުރުގައި ވަނީ ހިމަނާފައެވެ.

އަދި މީގެ އިތުރުން ވިލިމާލޭގައި އޮތް ހުސް ބިންތަކުގައި ޒަމާނީ ފެންވަރުގެ ސްވިމިން ޕޫލާއި ޖިމާއި ކެފޭއާ އެކީގައި ފްލެޓް އެޅުމަށް ހުށަހަޅުއްވާނެ ކަމަށް ޑރ. ޖަމީލު ވިދާޅުވިއެވެ.

ޑރ ޖަމީލު ވިދާޅުވީ، އެމަނިކުފާނުގެ ތަސައްވުރުގައި އެންމެ މުހިއްމު ކަމެއްގެ ގޮތުގައި ހިމަނުއްވާފައިވާނީ ވިލިމާލެ ރައްޔިތުންނަށް ބޯހިޔާވަހިކަން ފޯރުކޮށްދޭން އެ ރަށަށް ހާއްސަ ފަންޑެއް ގާއިމްކުރުން ކަމަށެވެ.

އެ ފަންޑު މެދުވެރިކޮށް ގެދޮރު ނޭޅިތިބި މީހުންނަށް، ގެދޮރު އެޅުމަށްޓަކައި ކުޑަ އިންޓަރެސްޓް ރޭޓެއްގައި 30 އަހަރަށް ބަހާލައިގެން ދައްކާ ގޮތަށް ފައިސާ ހަމަޖެހިގެންދާނެ ކަމަށް ޑރ.ޖަމީލު ވިދާޅުވިއެވެ.