މިރޭގެ މެޗުން ބަލިނުވެއްޖެ ނަމަ، ކޮންމެ ކުޅުންތެރިޔަކަށް އެއްލައްކަ މަދު: މަހުލޫފު

މިރޭ ޗައިނާއާއި ދެކޮޅަށް ރާއްޖެ ކުޅޭ މެޗުން، ގައުމީ ފުޓްބޯޅަ ޓީމު މޮޅުވެއްޖެނަމަ، އިނާމެއްގެ ގޮތުގައި ކޮންމެ ކުޅުންތެރިޔަކަށް އެއްލައްކަ ރުފިޔާގެ ފައިސާގެ އިނާމެއްދޭން، ސަރުކާރުން ނިންމާފައިވާއިރު، އެއީ ކުޑަ އަދަދެއް ކަމަށް ޔޫތު މިނިސްޓަރ އަހުމަދު މަހުލޫފު ވިދާޅުވެއްޖެއެވެ.

މިރޭ ކުރެއްވި ޓްވީޓެއްގައި މިނިސްޓަރ ވިދާޅުވީ ރާއްޖޭގެ ކުޅިވަރު، ކުރި އަރުވައި، ގައުމަށް ރީތި ނަން ހޯދައި ދިނުމަކީ، އެމަނިކުފާނުގެ ޒިންމާއެއް ކަމުގައެވެ.

"ވޯލްޑްކަޕުގައި ކުޅޭ ވަރުގަދަ ޗައިނާ އަތުން ބަލި ނުވެއްޖެ ނަމަ، 100ކޭ(އެއްލައްކަ)ވެސް މަދު" މަހުލޫފު ވިދާޅުވިއެވެ.

މިނިސްޓަރ ވިދާޅުވީ، އިންޑިއަން އޯޝަން އައިލެންޑް ގޭމްސް(އައިއޯއައިޖީ)ގައި ރާއްޖެއަށް ރަން މެޑަލް ހޯދައިދިން ދީމާއަށް ސަރުކާރުން 535000 ރުފިޔާ ދޭނެ ކަމަށެވެ.

މިރޭ ވޯލްޑްކަޕް ކޮލިފައިންގައި ރާއްޖެއިން ޗައިނާއާއި ދެކޮޅަށް ނުކުންނައިރު، އެ މެޗުގައި ގައުމީ ޓީމުގެ އިތުބާރު ފޯވަޑް އަލީ އަޝްފާގުވެސް ކުޅޭނެއެވެ. އަޝްފާގަށް ސްކޮޑުން ފުރުސަތު ދީފައިމިވަނީ، އޭނާ އަކީ އުމުރުން މާ ދޮށީ މީހެއް ކަމަށް ބުނެ، ގައުމީ ސްކޮޑުން އޭނާ ބާކީ ކޮށްފައި ހުންނަތާ އަހަރަކަށްވުރެ ގިނަ ދުވަސްފަހުންނެވެ.

ފޮޓޯ: ދި އެޑިޝަން