ގްރީންޓެކްސް، ޓީޖީއެސްޓީ އަދި އެއާޕޯޓް ޓެކްސް އިތުރުކުރުމަށް ފާސްކޮށްފި

ސަރުކާރުގެ ފަރާތުން ގްރީންޓެކްސް، ޓީޖީއެސްޓީ އަދި އެއާޕޯޓް ޓެކްސް ރޭޓް އިތުރުކުރުމަށް ހުށަހެޅި އިސްލާހް، ރައްޔިތުންގެ މަޖިލީހުން މިއަދު ފާސްކޮށްފިއެވެ.

ސަރުކާރުގެ ފަރާތުން ގްރީންޓެކްސް، ޓީޖީއެސްޓީ އަދި އެއާޕޯޓް ޓެކްސް ރޭޓް އިތުރުކުރުމަށް މަޖިލީހަށް ބިލް ހުށަހަޅުއްވާފައިވަނީ، މައްޗަންގޮޅި ދެކުނު ދާއިރާގެ މެންބަރު މުސްތަފާ ހުސައިން އެވެ. މި ބިލް މަޖިލީހުން ފާސްކޮށްފައިވަނީ މަޖިލީހުގައި ތިއްބެވި، ސަރުކާރަށް ނިސްބަތްވާ މެމްބަރުންގެ ވޯޓުންނެވެ. މި ބިލަށް ވޯޓު ނުދެއްވަނީ އިދިކޮޅަށް ނިސްބަތްވާ މެމްބަރުންނެވެ.

ފާސްކުރި އިސްލާހުގައި ވާގޮތުން ޓޫރިސްޓެއްގެ ބޮލަކަށް މިހާރު ދުވާލަކަށް 6 ޑޮލަރު ގްރީން ޓެކްސްގެ ގޮތުގައި ނަގަމުން އަންނަ ތަންތަނުން އަންނަ އަހަރުން ފެށިގެން ނަގާނީ 12 ޑޮލަރެވެ. އަދި ތިން ޑޮލަރު ދައްކަމުން އައި ތަންތަނުން ހަ ޑޮލަރު ދައްކަން ޖެހޭނެ ކަމަށް އެ އިސްލާހުގައި ބުނެފައިވެއެވެ.

އެއާޕޯޓް ޓެކްސްއަށް ގެނައި އިސްލާހަށް ބަލާއިރު، އަންނަ ޑިސެމްބަރުމަހުގެ އެއްވަނަ ދުވަހުން ފެށިގެން އެއާޕޯޓު ފީ ބޮޑު ކުރާ ގޮތަށް ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ ތެރެއިން އިކޮނޮމީ ކުލާހުން ފުރާ ކޮންމެ ބިދޭސީންގެ އަތުން ނަގާ 30 ޑޮލަރުގެ ބަދަލުގައި 50 ޑޮލަރު ނެގުމަށް ވަނީ ނިންމާފައެވެ. ބިޒްނަސް ކުލާހުން ދަތުރުކުރާނަމަ، ފުރާ ދިވެހިންނާއި ބިދޭސީންގެ އަތުން މިހާރު ނަގަމުން އަންނަ 60 ޑޮލަރުގެ ބަދަލުގައި 120 ޑޮލަރު ނެގުމަށް ވަނީ ނިންމާފައެވެ. އަދި އަމިއްލަ ޖެޓްތަކުގައި އަންނަ މީހުންގެ އަތުން ވަނީ  120 ޑޮލަރުގެ ބަދަލުގައި 480 ޑޮލަރު ނެގުމަށް ނިންމާފައެވެ.

ޓީޖީއެސްޓީގެ ގޮތުގައި ނަގަމުން އަންނަ 16 އިންސައްތައިގެ ބަދަލުގައި އިސްލާހުކޮށްފައިވަނީ، އަންނަ އަހަރުގެ ޖުލައިމަހުން ފެށިގެން 17 އިންސައްތަ ރޭޓްގައި ނެގުމަށެވެ.

ޓެކްސް އާއި ފީތަކަށް ގެންނަ ބަދަލާއެކު އަންނަ އަހަރު މިބައިން ގާތް ގަނޑަކަށް 5 ބިލިއަން ރުފިޔާ ލިބޭނޭކަމަށް ސަރުކާރުން ލަފާކުރެއެވެ.