ޣައްޒާގެ މަދަރުސާއަކަށް އިސްރާއީލުން ދިން ހަމަލާ ދިވެހިރާއްޖެއިން ކުށްވެރިކޮށްފި
ޣައްޒާގެ ސްކޫލަކަށް އަމާޒުކޮށް ދިން ހަމަލާ ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
ޣައްޒާގައި ހާލުގައި ޖެހިފައިވާ މީހުންނަށް ހިޔާވަހިކަން ދޭ ސްކޫލަކަށް އިސްރާއީލުން އަމާޒުކޮށް ދިން ހަމަލާ ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފައިވާއިރު، ރޭ ފަތިސް ނަމާދަށް ތިއްބާ ދިން މި ހަމަލާގައި ޝަހީދުވި މީހުންގެ އަދަދު 93 އަށް އަރާފައިވާ ކަމަށް ވަނީ ރިޕޯޓުކޮށްފައެވެ.
މިކަމާ ގުޅިގެން ޚާރިޖީ ވުޒާރާއިން ނެރުނު ބަޔާނުގައި ބުނެފައިވަނީ ފަލަސްޠީނުގެ ސަތޭކައަށްވުރެ ގިނަ މީހުން ހިމާޔަތް ހޯދަމުން ދިޔަ އަލް ތަބީޢީން ސްކޫލަށް އިސްރާއީލުން ދިން ހަމަލާ ކުށްވެރި ކުރާ ކަމަށެވެ. އަދި މި ހަމަލާއަކީ ބައިނަލްއަގްވާމީ ގާނޫނުތަކާއި އިންސާނީ ގާނޫނުގެ އަސާސީ އުސޫލުތަކާއި އދ.ގެ ސަލާމަތީ މަޖިލީހުގެ 2610 ވަނަ ގަރާރާ ޚިލާފު އަމަލެއް ކަމަށް ސަރުކާރުގެ ބަޔާނުގައި ވަނީ ފާހަގަކޮށްފައެވެ.
ދިވެހި ސަރުކާރުން ވަނީ ކުށެއްނެތް އާންމުންނަށް ދޭ މި ހަމަލާތައް ހުއްޓުވައި ފަލަސްޠީނުގެ ރައްޔިތުންނަށް ދެމެހެއްޓެނިވި ސުލްހަ ގާއިމުކުރުމަށް މަސައްކަތް ކުރުމަށް ބައިނަލްއަގްވާމީ މުޖުތަމައަށް ގޮވާލާފައެވެ. އަދި ފަލަސްޠީނުގެ ރައްޔިތުންނަށް ލިބިދޭ ހައްގުތަކާއި، މިނިވަން ދައުލަތެއް ގާއިމް ކުރުމުގެ ހައްގު ޙާޞިލުކުރުމަށް އެހީތެރިކަން ފޯރުކޮށްދިނުމުގައި ދިވެހި ސަރުކާރާއި ރައްޔިތުން ދެމިތިބޭނެ ކަމަށްވެސް މި ބަޔާނުގައި ބުނެފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
