ކުންފުނިތަކުގެ ވެރިންނަށް މުސާރައިގެ ގޮތުގައި އެންމެ ގިނައިން ދެވޭނީ 90،000 ރުފިޔާ: ޕީސީބީ

ސަރުކާރު ހިއްސާވާ ކުންފުނިތަކުގެ ވެރިންގެ މުސާރަ 90،000 ރުފިޔާއަށްވުރެ ބޮޑު ނުކުރުމަށް ކުންފުނިތަކުގެ ބަލަދުވެރިފަރާތް، ޕްރައިވަޓައިޒޭޝަން އެންޑް ކޯޕްރޮޓައިޒޭޝަން ބޯޑު (ޕީސީބީ)އިން މިއަދު ކުންފުނިތަކަށް އަންގައިފިއެވެ.

މިކަމާ ގުޅިގެން ޕީސީބީން މިއަދު ނެރުނު ސާކިއުލާއެއްގައި ބުނެފައިވަނީ، ސަރުކާރުގެ ހަރަދުތައް ކުޑަކުރުމުގެ ސިޔާސަތުގެ ދަށުން، ބޭންކުތައް ފިޔަވައި ސަރުކާރުން ކުންފުނިތަކުގެ އެންމެ އިސް މަޤާމުތަކުގައި ތިއްބަވާ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ރައީސުލްޖުމްހޫރިއްޔާ ވަނީ ކަނޑައަޅުއްވާފައެވެ.

ޕީސީބީން ވަނީ  ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ ބޮޑް ޑިރެކްޓަރުންގެ ތެރެއިން ރާއްޖެއިން ބޭރުގެ ޑިރެކްޓަރުން ފިޔަވައި ބޯޑުތަކުގެ ޗެއާމަނުން، މެނޭޖިން ޑިރެކްޓަރުން އަދި ޑެޕިއުޓީ މެނޭޖިންގ ޑިރެކްޓަރުންނާއި އިތުރު ޑިރެކްޓަރުން ހިމެނޭހެން މުސާރައާއި އިނާޔަތްތަކުން 90،000 ހާހަށްވުރެ އިތުރުވާބައި، ޑިޑަކްޝަންގެ ގޮތުގައި އުނިކުރުމަށްފަހު 90،000 ހާހަށްވުރެ ބޮޑުނުވާނެހެން ދިނުމަށް އެދިފައެވެ.

މީގެ އިތުރުން ޕީސީބީން ވަނީ، ސަރުކާރު ކުންފުނިތަކުގެ ޓެކްނިކަލް މަސައްކަތްކުރާ މުއައްޒަފުންގެ މުސާރައާ އިނާޔަތްތައް 90،000 ހާހަށްވުރެ އިތުރުވާ ބައި ޑިޑަކްޝަންގެ ގޮތުގައި އުނިކުރުމަށްފަހު، 90،000 ރުފިޔާއަށްވުރެ އިތުރުނުވާނޭހެން މުސާރައާއި އިނާޔަތްތައް ދިނުމަށާއި އެކަމާ ގުޅިގެން ޤާނޫނީ ގޮތުން މުވައްޒަފުންނާ އެކު ހަދާފައިވާ އެއްބަސްވުންތަކަށް ގެންނަންޖެހޭ ބަދަލުތައް ގެނައުމަށް ކުންފުނިތަކަށް އަންގާފައެވެ.

ޕީސީބީން ބުނީ މި ފިޔަވަޅު އެޅުމަށް ނިންމާފައިވަނީ ކުރިއަށްއޮތް ދެއަހަރުދުވަހުގެ ނިޔަލަށް ކަމަށެވެ. ސަރުކާރު ކުންފުނިތަކުގެ އިސްވެރިންގެ މުސާރަތައް ވަކި ހަމައެއްގައި ބެހެއްޓުމަށް ޕީސީބީން އަންގާފައިވާއިރު، ރައީސުލްޖުމްހޫރިއްޔާ އާއި މަޖިލީހުގެ މެމްބަރުންގެ އިތުރުން ސިޔާސީ ފަރާތްތަކުގެ މުސާރަތައްވެސް ވަކި ހަމައެއްގައި ބެހެއްޓުމަށް ސަރުކާރުން ވަނީ ނިންމަވާފައެވެ.