ގަވާއިދާ ހިލާފަށް ބިދޭސީންނަށް ވިޔަފާރި ހިންގުމުގެ ފުރުސަތު ސަރުކާރުން ދެން ނުދޭނެ: ސައީދު

ގަވާއިދާއި ހިލާފަށް ރާއްޖޭގައި ދެން ބިދޭސީންނަށް ވިޔަފާރިކުރަން ތިބުމުގެ ފުރުސަތު ނުދެއްވާނޭކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ބިޒްނަސް ސެންޓަރ ކޯޕަރޭޝަނުން ރޭ ބޭއްވި އެސްއެމްއީ އެވޯޑް ހަފްލާގައި ވާހަކަދައްކަވަމުްނ ވަޒީރު ވިދާޅުވީ، ބިދޭސީންނަށް ދެން ރާއްޖޭގައި ޤާނޫނީ އިމުން ވިޔަފާރި ހިންގުމުގެ ފުރުސަތު ނުދޭނޭކަމަށާއި، އެގޮތަށް އެކަން ކުރާނަމަ ފޮނުވާލާނޭކަމަށެވެ. ވަޒީރު ވިދާޅުވީ  ބިދޭސީން ކުރާ ވިޔަފާރިތައް ކަމާއިބެހޭ ފަރާތްތަކާއި ގުޅިގެން ބަންދުކުރުމުގެ މަސައްކަތް ކުރާނޭކަމަށެވެ.

'ކޮންބެޓިން އިލީގަލް އެކްސްޕެޓްރިއޭޓް އޮޕަރޭޝަން' ކިޔާ ގައުމީ ޓާސްކު ފޯހެއް ރައީސުލްޖުމްހޫރިއްޔާ އެކުލަވާލާފައިވާކަން ފާހަގަކުރައްވައި ވަޒީރު ވިދާޅުވީ ފޮރިން އިންވެސްތްމަންޓްގެ އައު ޤާނޫނާއެކު، ބިދޭސީންނަށް ނުކުރެވޭނެ ފަދަ ވިޔަފާރިތައް ކަނޑައަޅާ، ގަވައިދާއި ހިލާފަށް ބިދޭސީން ކުރަމުން އަންނަ ވިޔަފާރިތައް ހުއްޓުވުމުގެ މަސައްކަތް ކަމާއިބެހޭ އިދާރާތަކާއި ގުޅިގެން މިހާރު ފަށާފައިވާކަމަށެވެ.

45 އަހަރަށް ފަހު މުޅިން އާ ފޮރިން އިންވެސްޓްމެންޓް ގާނޫނެއް މިހާރު ވާނީ ވުޖޫދުކޮށްފަ. އޭގެ ސަބަބުން ތަފާތު އެކި ވިޔަފާރީގެ ދާއިރާތަކުގެ ތެރެއިން ބިދޭސީންނަށް ނުކުރެވޭނެ ވިޔަފާރިތައް ކަނޑައަޅާފަ އެހެރީ. މިހާރު އަޅުގަނޑުމެންނާއި ހޮމްލޭންޑް މިނިސްޓްރީއާއި ލޯ އެންފޯސްމެންޓް އޭޖެންސީތަކާއިއެކު މިދަނީ އިލީގަލް ވިޔަފާރިތައް ބަންދުކުރުމާއި ދިމާލަށް. އިރާދަކުރެއްވިއަޔާ ރައްޔިތުންގެ ސަޕޯޓާއި އެއްކޮށް އެކަން ތަންފިޒު ކުރާނަން.

އިޤްތިސާދީ ތަރައްގީއާއި ވިޔަފާރިއާބެހޭ ވަޒީރު މުޙައްމަދު ސަޢީދު

މިދިޔަ އޮކްޓޯބަރުމަހުގެ ތެރޭގައި ފޮރިން އިންވެސްޓްމަންޓް ޤާނޫނަށް އަމަލުކުރަން ފަށާފައިވާއިރު، އެ ޤާނޫނު ބުނާގޮތުން ބިދޭސީންނަށް ވަނީ ބައެއް ކަހަލަ ވިޔަފާރިތައް ހިންގުން މަނާކޮށްފައެވެ

ބިދޭސީންނަށް ވިޔަފާރިކުރުން މަނާ ދާއިރާތަކުގެ ގޮތުގައި މިނިސްޓްރީއިން ކަނޑައަޅާފައި ވަނީ ރީޓެއިލް އަދި ހޯލްސޭލް ވިޔަފާރިއާއި، ކާބޯތަކެތީގެ ހިދުމަތަ ދިނުމާއި، ކަނޑައެޅިފައިވާ މިންވަރަށް ވުރެ ދަށް އިމާރާތްކުރުމުގެ މަސައްކަތްތަކާއި، ޓްރެވަލް އެޖެންސީތަކާއި، ލޮޖިސްޓިކްސް އަދި ކާގޯ ހެންޑްލިންގެ ހިދުމަތްތަކާއި، ޕޯސްޓް އަދި ކުއަރިއާގެ ހިދުމަތްތަކާއި، ވަޒީފާދޭ އިދާރާތަކާއި، ދުންފަތުގެ އުފެއްދުމާއި، ޕްލާސްޓިކް އުފެއްދުމާއި، ވެލި ނެގުމާއި، ސަލާމަތީ ހިދުމަތްތަކާއި، ދަތުރުފަތުރުގެ ހިދުމަތަތަކާއި، ފޮޓޯގްރަފީ އަދި ވީޑިއޯގްރަފީއާއި، އިޝްތިހާރުކުރުމާއި، މާކެޓް ދިރާސާތަކާއި، އަދި އެހެނިހެން ބައެއް ދިރާސާތަކެވެ.