ރާއްޖޭގައި ގާއިމުކުރާ އެންމެ ބޮޑު ޑޮކްޔާރޑު ތިލަފުށީގައި ގާއިމު ކުރަނީ

ދިވެހިރާއްޖޭގައި ގާއިމުކުރެވޭ އެންމެ ބޮޑު ޑޮކްޔާޑު ތިލަފުށީގައި ގާއިމުކުރަން ހަމަޖެހިފައިވާ ކަމަށް މޯލްޑިވްސް ޕޯޓްސް ލިމިޓެޑް، އެމްޕީއެލްގެ ސީއީއޯ މުހައްމަދު ވަޖީހު އިބްރާހީމް ވިދާޅުވެއްޖެއެވެ.

ވަޖީހު މިފަދައިން ވިދާޅުވެފައި ވަނީ ދައުލަތު މީޑިއާ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުންނެވެ.

އެ ޕްރޮގްރާމު މެދުވެރިކޮށް ވަޖީހު ވިދާޅުވީ، ރާއްޖޭގެ ނިސްބަތުން ގާއިމްކުރާ އެންމެ ބޮޑު ޑޮކްޔާޑުގެ މަސައްކަތް ތިލަފުށީގައި މިހާރު ކުރިއަށްދާ ކަމަށާއި، ބޯޓްޔާޑުގެ މަސައްކަތްވެސް މިހާރު ކުރިއަށްދާ ކަމަށެވެ.  އަދި އެތަނުގައި މުވައްޒަފުންނަށް ތިބެވޭ ގޮތަށް އެކޮމޮޑޭޝަން ހަމަޖެއްސުމުގެ މަސައްކަތާއެކު، ރާއްޖޭއިން ލިބެން ހުންނަ ހުރިހާ ޚިދުމަތްތަކަކާއި އެކު ރަނގަޅު ވޯކްޝޮޕެއް އެތަނުގައި ގާއިމްކުރުމުގެ މަސައްކަތް ވެސް ކުރިއަށްދާނެ ކަމަށެވެ.

" އިރާދަކުރެއްވިއްޔާ މިއަހަރުގެ ތެރޭގައި އެތަނުގެ މަސައްކަތް ނިންމާނަން. މިހާރުވެސް ބޯޓުޔާޑުގެ މަސައްކަތް ފެށިފަ ހުރީ، ދެން ބައެއްކަހަލަ މަރާމާތްތަކާ، އެތަނުގެ ބައެއްތަންތަން ބޮޑުކުރުމުގެ މަސައްކަތް މިހާރު ކުރަނީ. މިދެންނެވި ވޯކްޝޮޕްގެ މަސައްކަތަށް ދަތިތަކެއް އަދި އެބަހުރި. އެއީ ކުރިން އެކަންތައްތައް ފަށަން އުޅެފަ، ދިމާވި ކަންތައްތަކުގެ ތެރެއިން ލީގަލް މައްސަލައެއް އުޅޭތީ އަޅުގަނޑުމެން މިއުޅެނީ ނުފެށިގެން"

އެމްޕީއެލްގެ ސީއީއޯ ވިދާޅުވިއެވެ.

ވަޖީހު އިތުރަށް ވިދާޅުވީ ލީގަލް މައްސަލަ އޮތް ނަމަވެސް އެކަންތައްތައް ހައްލުކޮށް ދެހަފްތާއެއްގެ ތެރޭގައި ވޯކްޝޮޕްގެ މަސައްކަތް ފަށާނެކަމަށާއި، އަދި އެއާއިއެކު އެތަނުން ޚިދުމަތް ހޯދަން ބޭނުންވާ ފަރާތްތަކަށް ޑޮކްޔާޑް، ބޯޑްޔާޑް އަދި ވޯކްޝޮޕްގެ ޚިދުމަތް މިއަހަރުގެ ތެރޭގައި ފޯރުކޮށްދޭނެ ކަމަށެވެ.