ޖަނަވާރުންނަށް ފަރުވާދޭ ކްލިނިކެއް ވިލިމާލޭގައި ހުޅުވައިފި
ދިވެހިރާއްޖޭގައި ފުރަތަމަ ފަހަރަށް ޖަނަވާރުންނަށް ފަރުވާދޭ ކްލިނިކެއް މިއަދު ވިލިމާލޭގައި ހުޅުވައިފިއެވެ.
މި ކްލިނިކް މިއަދު ހުޅުއްވައިދެއްވީ ފިޝަރީޒް މިނިސްޓަރ ޒަހާ ވަހީދެވެ.
މިތަން ހުޅުއްވައިދެއްވުމަށްފަހު ވާހަކަފުޅު ދައްކަވަމުން މިނިސްޓަރ ވިދާޅުވީ ފަހަކަށް އައިސް ގިނައަދަދެއްގެ ޒުވާނުން ބުޅަލާއި، ދޫނި ފަދަ އޮޅުކޮށްގެން ގެންގުޅޭ ޖަނަވާރު ގެންގުޅޭކަމަށާއި މިފަދަ ތަކެއްޗަށް އެކަށީގެންވާ ފަރުވާ ލިބޭނެ މަގު ފަހިކޮށްދީ، ދުޅަހެޔޮ މާހައުލެއް ޤާއިމުކޮށްދިނުމަކީ އިސްކަންދޭންޖެހޭކަމެއްކަމުގައެވެ.
ޕެޓްގެ ގޮތުގައި ގެންގުޅޭ ޖަނަވާރުގެ ދުޅަހެޔޮކަމާއި އެތަކެތި ގެންގުޅޭ މީހުންގެ ދުޅަހެޔޮކަމާ ގުޅިފައިވާކަމަށް މިނިސްޓަރ ޒަހާ ވަނީ ފާހަގަކުރައްވާފައެވެ.
މި ކްލިނިކް ހުޅުވުމާއި އެކު ޖަނަވާރުތަކަށް ބޭނުންވާ ބޭސް އެސްޓީއޯގެ އެހީއާއި އެކު އެތެރެކުރެވެމުންދާކަމަށް މިނިސްޓަރ ވަނީ ފާހަގަކުރައްވާފައެވެ.
އަލަށް ޤާއިމުކުރި ވެޓް ކްލިނިކްއާއިއެކު އައްސިކުރުމާއި، ހޭނެއްތުމާއި، ތަފާތު ބޭސްތަކާއި، އެފަދަ ޖަނަވާރަށް ބޭނުންވާ އޮޕަރޭޝަންތައް ކުރުމުގެ ޚިދުމަތް ލިބިގެންދާނެކަމަށް މިނިސްޓްރީން މައުލޫމާތުދެއެވެ. މި ކްލިނިކުން ވެޓެރިނަރީ ޚިދުމަތް ދިނުމަށް ހަމަޖެހިފައިވަނީ ކޮންމެ ހޯމަ އަދި ބުރާސްފަތި ދުވަހެއްގެ ހެނދުނު 9 އިން މެންދުރުފަހު 2 އަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
