ޣަައްޒާއަށް އުފާވެރި ވަގުތުކޮޅެެއް: ދިވެހީންގެ އެހީގައި ބޮޑު ރޯދަވީއްލުމެއް

ފަލަސްތީނުގެ ޣައްޒާގައި ދިވެހީންގެ އެހީގައި މިހާތަނަށް ބޭއްވި އެންމެ ބޮޑު ރޯދަވީއްލުން ބާއްވައިފި އެވެ.

ދިވެހީންގެ އެހީގައި މި ރޯދަވީއްލުން އިންތިޒާމު ކުރީ ދިވެހީންގެ އެހީ, ފަލަސްތީނުގެ ރައްޔިތުންނަށް ފޯރުކޮށްދޭ ބައިވެރިޔާ -- އިންޓަނޭޝަނަލް އެއިޑް ކެމްޕެއިންގެ ފަރާތުންނެވެ.

ރޯދަ ވީއްލުން އޮތީ އިއްޔެ އެވެ.

އައިއޭސީން ބުނީ މި ރޯދަ ވީއްލުމުގައި ޣައްޒާގެ އެތައް ސަތޭކަ ބަޔަކު ބައިވެރިވި ކަމަށެވެ.

"މި ރޯދަ ވީއްލުމުގައި ހާހަކަށް ވުރެ ގިނަ މީހުން ވަނީ ބައިވެރިވެފައި," އިއްޔެގެ ހަރަކާތާއި ގުޅޭގޮތުން އައިއޭސީން ބުންޏެވެ.

މިއީ ދިވެހީންގެ އެހީގައި މިހާތަނަށް ޣައްޒާގައި ބޭއްވުނު އެންމެ ބޮޑު ރޯދަވީއްލުމެވެ.

އިއްޔެ ރޯދަވީއްލުން ބޭއްވިއިރު މުޅި ޣައްޒާ އޮތީ ޔަހޫދީންގެ އަނިޔާވެރި ހަމަލާތަކުގައި ސުންނާަތިކޮށްލާފަ އެވެ. ހިތްވަރު ގަަދަ ޣައްޒާގެ ރައްޔިތުން ރޯދަ ވީއްލުން ކުރިއަށް ގެންދިޔައީ މަގުތައް ފޮރުވިފައިވާ ގާކުޑިތައް އެއްކައިރިކޮށް ސާފުކޮށްލުމަށް ފަހު އެވެ.

އަދި އެވަގުތުކޮޅުގެ އުފާވެރިކަން އެންމެ ފުރިހަމަ ގޮތުގައި ހޯދުމަށް ކުލަ ބޮކިތަކާއި ދިދަފަތިތަކުން ތަން އޮތީ ޒީނަތްތެރިކޮށްފަ އެވެ.

ހަނގުރާމަ މިވަގުތަށް ހުއްޓާލާފައި އޮތް ނަމަވެސް ޣައްޒާގެ ރައްޔިތުން ދިރިއުޅެމުން ދަނީ ވަރަށް ދަތި ހާލުގަ އެވެ.

އަނިޔާވެރި ހަރުކަށި އިޒްރޭލުގެ ސިފައިން ގެންދަނީ ޣައްޒާއަށް އިންސާނީ އެހީ ފޯރުކޮށްދިނުމަށް ވެސް ހުރަސް އަޅަމުންނެވެ. ދިވެހީންގެ އެހީގައި ބޮޑު ރޯދަ ވީއްލުމެއް ބޭއްވުމަށް އައިއޭސީން ނިންމީ ޣައްޒާގެ ރައްޔިތުން ތިބި ދަތި ހާލަތަށް ކުޑަ ނަމަވެސް ލުޔެއް ހޯދައިދީ އާއިލާތަކަށް އުފާވެރި ވަގުތުކޮޅެއް ހޯދާ ދިނުމުގެ ބޭނުމުގަ އެވެ.

އިއްޔެގެ ހަރަކާތުން އެކަން ވަރަށް ބޮޑަށް ފުރިހަމަވި އެވެ. ރޯދަ ވީއްލުމުގެ ބައިވެރީން ތިބީ އެ ހަރަކާތަށްޓަކާ ވަރަށް އުފަލުންނެވެ.

ފަލަސްތީނުގެ ހައްގުގައި އެންމެ ބޮޑަށް ވާހަކަ ދައްކާ އެ ގައުމުގެ ރައްޔިތުންނަށް އެހީވުމުގައި ދިވެހީންނަކީ ނަމޫނާ ބައެެކެވެ. އެކަން ފަލަސްތީނުގެ -- ހާއްސަކޮށް ޣައްޒާގެ ރައްޔިތުން ގަބޫލު ކުރެ އެވެ.

ފަލަސްތީނު މައްސަލާ ގައި މުޅި ދުނިޔޭގައި ވެސް އެންމެ ގަދަ އަޑަކީ ދިވެހީންގެ އަޑެވެ. ދިވެހީންގެ ބަޔަކު ހިންގާ އައިއޭސީއަކީ ޣައްޒާއަށް އެހީ ފޯރުކޮށް ދިނުމުގައި އެންމެ ފާހަގަކޮށްލެވޭ އެއް ޖަމާއަތްމެ އެވެ.

ޣައްޒާގެ ރައްޔިތުންނަށް ސާފު ބޯފެނާއި ކާނެ ތަކެއްޗާއި އަންނައުނާއި ރަޖާ ފޯރުކޮށް ދިނުން ފަދަ އެތައް ހަރަކާތެއް ދިވެހީންގެ އެހީގައި މީގެ ކުރީން އައިއޭސީން ވަނީ ހިންގާފަ އެވެ.

އިއްޔެގެ ހަރަކާތަށް ވެސް ދިވެހީންގެ ފަރާތުން ލިބުނު އެހީތެރިކަން އައިއޭސީން ވަނީ ފާހަގަކޮށްފަ އެވެ.

ޣައްޒާ އަލުން އާރާސްތު ކުރެވި ހަނގުރާމަ ދާއިމީ ގޮތެއްގައި ހުއްޓުމަކަށް އަންނާނެ ވަގުތަކަށް އެ ރައްޔިތުން ދަނީ އިންތިޒާރު ކުރަމުންނެވެ.

ނަމަވެސް ހުޅަނގުގެ ބާރުތަކުގެ މަދަދު އޮތް ވަޒަނެއް ނެތް އިޒްރޭލުން ގެންދަނީ ހަރުކަށިކަން ދައްކާ ފަލަސްތީނުގެ މުޅި ބިން ފޭރިގަތުމަށް ކުރަމުންދާ ހަނގުރާމަ އަލުން ފެށޭނެ މަގެއް ހޯދުމަށް މަސައްކަތް ކުރަމުންނެވެ. އިޒްރޭލާއި ހުޅަނގުން ކިތަންމެ ބިރެއް ދެއްކި ނަމަވެސް ޣައްޒާގެ ރައްޔިތުންގެ ކިބައިން ފެންނަނީ މާތްﷲ ހަސްރަތުން ވާގިއެދި ހިތްވަރާއެކު އެ މީހުންގެ ވަޒަން ދިފާއު ކުރުމަށް މަސައްކަތް ކުރާ އާދަޔާ ހިލާފު ގަދަ އިމާނެއްގެ ވެރި ބައެއްގެ ގޮތުގަ އެވެ.