"ގޮސިޕް ގާރލް" ގެ ރީބޫޓެއް ފެނުމުގެ ފުރުސަތު އެބައޮތް: ޕްރޮޑިއުސަރުން

2007 ވަނަ އަހަރުން ފެށިގެން 2012 ވަނަ އަހަރާއި ހަމައަށް ޓީވީތަކުން "ޑްރާމާ" އަށް ލޯބިކުރާ ފަރާތްތަކަށް ޙާއްސަކޮށް ގެނެސްދިން މަޤްބޫލު ސީރީޒް "ގޮސްޕް ގާރލްސް" އަލުން އުފެއްދުމުގެ ޚިޔާލެއް ގެންގުޅޭކަމަށް އެ ސީރީޒް ޕްރޮޑިޔުސްކުރި އެމެރިކާގެ "ސީ.ޑަބްލިޔު ޓެލެވިޝަން ނެޓްވޯރކް" އިން ވަނީ ހާމަކޮށްފައެވެ.

އެމެރިކާގައި ދިރިއުޅޭ މުއްސަނދި ޒުވާނުންތަކެއްގެ ދިރިއުޅުމުގަ ހިނގާ ޤަބޫލުކުރަން ދަތި، އެހެންނަމަވެސް ހަޤީގަތާ ގާތްކުރާ މޮޅެތި ވާހަކަތަށް ދައްކުވައިދޭ "ގޮސްޕް ގާރލް" ސީރީޒަކީ، ތަފާތު ސްޓޯރީއާއެކު މީގެ އަހަރުތަކެއް ކުރިން ބެލުންތެރިންގެ މެދު އަރައިގެންދިޔަ އުފެއްދުމެކެވެ.

"ސީ.ޑަބްލިޔު" ނެޓްވޯކްގެ ރައީސް މަރކް ޕެޑޮވިޓްޒް މައުލޫމާތުދިން ގޮތުގައި "ގޮސިޕް ގާރލް" ގެ ވާހަކަ އަނެއްކާވެސް ތަފާތު ގޮތަކަށް ބެލުންތެރިންނާއި ހަމަޔަށް ގެނެސްދިނުމުގެ ވާހަކަ އެ ކުންފުނި ތެރޭން ދަނީ ދެކެވެމުންނެވެ.

"ގޮސިޕް ގާރލް" އަށް ފަހު ހަމަ އެފަދަ ވާހަކައަކާއި އެކު އެމެރިކާގެ ޓީވީ ސްކްރީންތަކުން ފެނިގެންދިޔަ "ޕްރިޓީ ލިޓްލް ލަޔާރޒް" ވެސް ބެލުންތެރިންގެ މެދުގައި ކާމިޔާބު އުފެއްދުމަކަށް ވެގެންގޮސްފައުވާ އިރު، ގިނަ ބަޔަކު ދެކޭ ގޮތުގައި މިހާރުގެ ގިނަ ޒުވާނުން އިންތިޒާރު ކުރަމުންދަނީ "ގޮސިޕް ގާރލް" ގެ ފެންވަރުގެ އެހެން ޝޯ އެއް ބަލައިލުމަށެވެ. އަދި "ގޮސިޕް ގާރލް" ގެ އެންމެ ފަހު އެޕިސޯޑް އެޅުވިތާ މިއަދަށް 7 އަހަރު ވެފައިވާއިރު، "ގޮސިޕް ގާރލް" ގެ ވާހަކަ އޭގެ މައްޗަށް ބިނާވެފައިވާ މީސް މީޑިޔާއަކީ މިހާރު މީހުންގެ ދިރިއުޅުމުގައި އޭރަށް ވުރެ މާ ބޮޑު ދައުރެއް އަދާކުރާ ވަސީލަތެއްކަންވެސް ފާހަގަކޮށްލެވެއެވެ.

"ގޮސްޕް ގާރްލް" ގެ ރީބޫޓެއް ވެގެންދާނީ ޓީވީ ތަކުން ފަހުގެ އަހަރުތަކުގައި ފެންނާނެ އެންމެ މޮޅު، އެންމެ މަޤްބޫލް އުފެއްދުންކަމަށް އެ ޝޯގެ ގިނަ ފޭނުން އެއްބަސްވެއެވެ. އަދި ސީރީޒް ނިމުނުތާ 7 އަހަރު ފަހުންވެސް މި ޝޯ އަށާއި ޝޯގެ ފަންނާނުންނަށް އޮތް ތަރުޙީބު މާ ބޮޑަށް ހީނަރުވފައިވާކަމެއްވެސް ފާހަގަ އެއް ނުކުރެވެއެވެ. "ގޮސިޕް ގާރލް" އިން ފެނިގެންދިޔަ ގިނަ ތަރިން އަދިވެސް ދަނީ ހޮލިވޫޑް ގައި ޙަރަކާތްތެރިވެ މޮޅެތި އުފެއްދުންތަކެއް ބެލުންތެިންނާ ހިއްސާ ކުރަމުންނެވެ. އެގޮތުން ބްލޭކް ލައިވްލީ އަދި ޕެން ބެޖްލީ (ނެޓްފްލިކްސް ގެ "ޔޫ") އެކްޓިންގެ ދާއިރާގައި ކުރަަމުން އަންނަ މަސައްކަތްތަށް ފާހަގަކޮށްލެވެއެވެ.

"ގޮސިޕް ގާރލް" އުފެއްދި "ސީ.ޑަބްލިޔު" ނެޓްވޯކްގެ ރައީސް މަރކް ޕެޑޮވިޓްޒް ބުނާގޮތުގައި ސީރީޒް ރީބޫޓްކުރުމުގެ ކަންތައް އޮތީ ހަމަ އެއްކޮށްވެސް އެ ޝޯގެ އަސްލު ލިޔުންތެރިންގެ މައްޗަށް ދޫކޮށްލާފައެވެ. ސްކްރީން-ރައިޓާރސް ގެ ގޮތުގައި 2007 ވަނަ އަހަރުން ފެށިގެން 2012 ވަނަ އަހަރަށް "ގޮސިޕް ގާރލް" ގައި މަސައްކަތްކުރި ޖޯޝް ޝްވާރޓްޒް އަދި ސްޓެފަނީ ސެވެޖް މިކަމާ މެދު ވަކި ބަހެއް ބުނެފައި ނެތުމުން ފޭނުންނަށް މި ރީބޫޓާއި މެދު ޔަޤީން ޖަވާބެއް ވަނީ ނުލިބިފައެވެ.