މަހެއްގެ މައްޗައް ފިރިހެނުންނަށް ކުރާ އަނިޔާގެ 3 މައްސަލަ ހުށަހަޅާ: ޖެންޑަރ މިނިސްޓްރީ
ފިރިހެނުންނަށް ކުރާ ގެވެށި އަނިޔާ އިތުރުވަމުން އަންނަ ކަމަށް ޖެންޑާ މިނިސްޓްރީން ބުނެފި އެވެ.
ބައެއް ނޫސްތަކަށް މައުލޫމާތުދެއްވަމުން ޖެންޑާރ މިނިސްޓްރީ އިން ބުނެފައިވަނީ އެ މިނިސްޓްރީއަށް ހުށަހެޅާފައިވާ މައްސަލަތަކުގެ ތެރޭގައި ފިރިހެނުންނަށް ލިބެމުންދާ ގެވެށި އަނިޔާ މައްސަލަ ހުށަހަޅާފައިވާ މިންވަރު އިތުރުވެފައިވާކަމަށެވެ. އެގޮތުން ފާއިތުވި އަހަރުގެ ތަފާސް ހިސާބުތަކަށް ބަލާއިރު މަހެއްގެ މައްޗަށް 3 މައްސަލަ ހުށަހަޅާފައިވާކަމަށެވެ.
އެގޮތުން މިދިޔަ އަހަރު މުޅިއެކު 31 ފިރިހެނަކަށް ގެވެށި އަނިޔާކޮށްގެން ރިޕޯޓްކޮށްފައިވާކަމަށް އެމިނިސްޓްރީން ބުނެފައިވެވެ. އެ މިނިސްޓްރީން ބުނެފައިވަނީ ފިރިހެނުންނަށް ލިބެމުންދާ ގެވެށި އަނިޔާގެ މައްސަލަތައްވެސް ލަސްނުކޮށް މިނިސްޓްރީއަށާއި ކަމާއި ގުޅޭ އެހެން އިދާރާތަކަށް ހުށަހެޅުމަށް އެމިނިސްޓްރީން އިލްތިމާސްކޮށްފައިވެއެވެ. އެ ފަދަ މައްސަލަތަކާއި ގުޅިގެން މިނިސްޓްރީގެ އިހުތިސާސްގެ ތެރެއިން އަޅަން ހުރި ފިޔަވަޅުތައް އަޅާނެ ކަމަށްވެސް ޖެންޑަރ މިނިސްޓްރީން ބުނެފައިވެއެވެ.
ޖެންޑާރ މިނިސްޓްރީއަށް ހުށަހަޅާ މައްސަލަތަކުގައި ގިނައީ އަންހެނުންނާއި ގުޅޭ މައްސަލަތައް ކަމަށާއި ނަމަވެސް ޖިއްސު ތަފާތު ކުރުމެއް ނެތި އެމިނިސްޓްރީއަށް ހުށަހަޅާ މައްސަލަތައް ބަލާނެ ކަމަށްވެސް އެ މިނިސްޓްރީން ބުނެފައިވެއެވެ.
ޖެންޑާރ މިނިސްޓްރީން ކޮންމެ މަހަކުވެސް އެ މިނިސްޓްރީއަށް ހުށަހަޅާ މައްސަލަތަކުގެ ތަފާސް ހިސާބުތައް އާންމުކުރާއިރު އެންމެ ކޮންމެ މަހެއްގައިވެސް ނިސްބަތުން އެންމެ ގިނައިން ހުށަހަޅާފައިވަނީ ކުޑަކުދިންނާއި ގުޅުންހުރި މައްސަލަތައް ކަން ފާހަގަކޮށްލެވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
