ޓޫރިޒަމް އޯފް ސީޒަނުގައި ބޭންކްތަކަށް އެމްއެމްއޭއިން ވިއްކާ ޑޮލަރު އިތުރުކުރަން ނިންމައިފި

ހިނގަމުން މިދާ ފަތުރުވެރިކަމުގެ އޯފް ސީޒަނުގައި ބޭންކުތަކަށް ވިއްކާ ޑޮލަރުގެ މިންވަރު އިތުރުކުރުމަށް މޯލްޑިވްސް މަނިޓަރީ އޮތޯރިޓީން ނިންމައިފިއެވެ.

މިކަމާ ގުޅޭގޮތުން މަރުކަޒީ ބޭންކުން މިއަަދު ނެރުނު ބަޔާނެއްގައި ބުނެފައިވަނީ، އޯފްސީޒަނުގައި ބޭންކްތަކަށް ވިއްކާ ޑޮލަރުގެ މިންވަރު 25 އިންސައްތައަށް އިތުރުކުރުމަށް ނިންމާފައިވާކަމަށެވެ. އެމްއެމްއޭއިން ބުނީ މިހިނގާ ޖޫންމަހުގެ 28 ވަނަ ދުވަހުން ފެށިގެން ކުރިއަށް އޮތް 3 މަހު ކޮންމެ ހަފްތާއަކު ބޭންކްތަކަށް ޑޮލަރު ވިއްކާ މިންވަރު މިހާރަށްވުރެ ޖުމްލަކޮށް 25 އިންސައްތަ އިތުރަށް ވިއްކަމުންދާނޭ ކަމަށެވެ.

ބޭންކުތަކަށް ބޭރު ފައިސާ އިތުރަށް ދޫކުރުމަށް ނިންމީ، ފަތުރުވެރިކަމުން ލިބޭ ބޭރު ފައިސާގެ މިންވަރު ދަށްވާ ދުވަސްވަރެއްގައި، ރާއްޖޭން ބޭރަށް ފޮނުވަންޖެހޭ ފައިސާގެ ޑިމާންޑް އެއްވަރެއްގައި ހުރުމުން ކުރިމަތިވާ ދަތިތަކަށް ހައްލެއް ހޯދައިދިނުމަށް ކަމަށް އެމްއެމްއޭއިން ބުންޏެވެ. މިއީ ބޭންކިންގ ނިޒާމުގެ ތެރޭގައި އޮތް ބޭރު ފައިސާގެ ދަތިކަން ކުޑަކުރުމަށާއި، ޒަރޫރީ ބޭނުންތަކަށް ބޭނުންވާ ޑޮލަރު ފަސޭހައިން ލިބޭނެ މަގު ފަހިކޮށްދިނުމަށް މަރުކަޒީ ބޭންކުން އެޅި ވަގުތީ ފިޔަވަޅެއްކަމަށްވެސް ބުންޏެވެ.

އެމްއެމްއޭއިން ބުނީ މިދިޔަ އަހަރުގެ ފުރަތަމަ ފަސްމަސްދުވަހާ އަޅާބަލާއިރު، މިހިނގާ އަހަރުގެ ފުރަތަމަ ފަސްމަސްދުވަހު އެ ބޭންކުން ވިޔަފާރިތަކަށް އަދި އާންމުންގެ އެކި ބޭނުންތަކަށް ބޭންކްތައް މެދުވެރިކޮށް ވިއްކި ބޭރުފައިސާގެ މިންވަރު 72 އިންސައްތަ އިތުރުވެފައިވާކަމަށެވެ.

ބޭރު ފައިސާގެ ޑިމާންޑް އެންމެ ބޮޑަށް އިތުރުވެފައިވަނީ ބޭސްފަރުވާގެ އިތުރުން ތައުލީމާއި ދިވެހިން ރާއްޖެއިން ބޭރަށްކުރާ ދަތުރުތަކަށެވެ. ތަފާސްހިސާބުތަކަށް ބަލާއިރު މި އަހަރުގެ ފުރަތަމަ ފަސް މަސްދުވަހު ބޭސްފަރުވާއަށާ ތައުލީމަށް ބޭންކުތައް މެދުވެރިކޮށް ވިއްކި ބޭރު ފައިސާގެ މިންވަރު ވަނީ، މިދިޔަ އަހަރުގެ މި މުއްދަތާ އަޅާބަލާއިރު 78 އިންސައްތަ އިތުރުވެފައެވެ. މީގެ އިތުރުން، ރާއްޖެއަށް ތެލާ، ކާޑު އަދި ބޭހާއި މެޑިކަލް އިކުއިޕްމަންޓް އެތެރެކުރުމަށް އެމް.އެމް.އޭ އިން ވިއްކި ބޭރު ފައިސާގެ އަދަދު ވަނީ މި އަހަރުގެ ފުރަތަމަ ފަސް މަސް ދުވަހު ވަނީ 30 އިންސައްތަ އިތުރުވެފައެވެ.

ބޭންކުތަކަށް ވިއްކާ ބޭރުފައިސާގެ އަދަދު އިތުރުކުރުމުން ފަތުރުވެރިކަމުގެ އޮފް-ސީޒަނުގައި ބޭރު ފައިސާގެ ތާށިކަން ކުޑަވެ، ކަސްޓަމަރުންގެ ބޭނުންތަކަށް ބޭންކުތަކުން ފޯރުކޮށްދޭ ޚިދުމަތްތައް އިތުރަށް ހަރުދަނާވެގެންދާނޭކަމަށް އެމްއެމްއޭއިން ވަނީ ބުނެފައެވެ.