ސިފައިންގެ ވައިގެ ބާރަށް ގިނަ ޢާލާތްތައް ތުރުކިޔޭއިން ދީފައިވަނީ ހިލޭ: ރައީސް ޑރ. މުޢިއްޒު

ދިވެހި އަސްކަރިއްޔާގެ ވައިގެ ޚިދުމަތަށް ގެނެވުނު ގިނަ އާލާތްތައް ތުރުކީޔޭއިން ގެނެސްފައިވަނީ ހިލޭ އެހީގެ ތެެރެއިން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ.

އެ މަނިކުފާނު މިފަދައިން ވިދާޅުވީ އެމްއެންޑީއެފް އެއާކޯ އިފްތިތާހުކުރުމާއި، އަންމޭންޑް އޭރިއަލް ވެހިކަލް (ޔޫއޭވީ) ސިފައިންގެ ޚިދުމަތް ތައާރަފްކުރުމަށް ނ. މާފަރު އިންޓަނޭޝަނަލް އެއާޕޯޓުގައި މިރޭ ބޭއްވި ޚާއްސަ ރަސްމިއްޔާތުގައި ވާހަކަފުޅުދައްކަވަމުންނެވެ.

އެގޮތުން ރައީސުލްޖުމްހޫރިއްޔާ ވިދާޅުވީ، ދިވެހި ސިފައިންގެ ވައިގެ ބާރުގެ ޚިދުމަތްފެށުމަށް އެންމެ ބޮޑު އެއްބާރުލެއްވުމެއް ދިވެހި ސަރުކާރަށް ދެއްވީ ތުރުކިޔޭގެ ރައީސް ރަޖަބް ޠައްޔިބު ޢުރުދުޣާން ކަމަށެވެ. އެހެން ކަމުން ރައީސުލްޖުމްހޫރިއްޔާ ވަނީ އެމަނިކުފާނާއި، ދިވެހި އެންމެހައި ރައްޔިތުންގެ ނަމުގައި އުރުދުޣާން އަށް ޝުކުރު އަދާކުރައްވާފައެވެ.

މިއާއެކު ރައީސް މުޢިއްޒުވަނީ އެމަނިކުފާނު ވެރިކަމާއި ހަވާލުވެވަޑައިގެންތާ ދެ ހަފްތާ ނުވަނީސް ތުރުކިޔޭ އަށް ވަޑައިގެންނެވުމަށް އެމަނިކުފާނަށް ދައުވަތު ދެއްވައި، އެގައުމަށް ވަޑައިގެންނެވުމުން ރައީސް އުރުދުޣާން ބެހެއްޓެވި ގާތްކަމަކީ ރާއްޖޭގައި ރާއްޖޭގެ އަމިއްލަ ވައިގެ ބާރެއް އުފެއްދުމުގެ ހުވަފެން ހަގީގަތަކަށް ވުމުގެ އަސްލު ކަމަށެވެ.

މިތަނުން 3 ޔޫއޭވީ ފެނުނު ނަމަވެސް، އިރާދަކުރެއްވިއްޔާ އެއަށްވުރެ މާ ގިނަ ވާނެ، އެމަނިކުފާނާއި، އަޅުގަނޑުމެންނާއި ދޭތެރޭގައި މިއޮތް ގާތްކަމުގެ ތެރެއިން އަޅުގަނޑުމެންގެ އަސްކަރިއްޔާގެ ބާރުވެރިކަން. އަދި މީގެ ގިނަ އާލާތްތަކަކީ، މިއޮތް ގާތްކަމުގެ ތެރެއިން، ދިވެހި ގައުމަށް ހިލޭ ހަދިޔާ ކޮށްފައިވާ ތަކެތިކަން އަޅުގަނޑު ފަޚުރުވެރިކަމާއި އެކު ފާހަގަ ކުރަން

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު އިތުރަށް ވިދާލުވީ، ދިވެހި ކަނޑުގެ ސަރަހައްދު ބަލަހަށްޓާ ޔޫއޭވީ، އުފައްދާ ކުންފުނި ކަމަށްވާ ބައިކާރު ކުންފުނީގެ އިސްވެރިންނާއި، އެމަނިކުފާނާއި ބައްދަލުކުރެއްވިގެންދިޔައީވެސް ތުރުކިޔޭގެ ރައީސް އާއި ސަރުކާރާއި އޮންނަ ގާތް ގުޅުމުގެ ސަބަބުންނެވެ.

ބައިކާރު ކުންފުންޏަކީ އެފަދަ ޢާލާތްތައް އުފެއްދުމަށް ދުނިޔޭގައިވެސް ނަން މަޝްހޫރު ކުންފުންޏެކެވެ. އެހެންކަމުން ދިވެހިރާއްޖޭގެ ކަނޑު ބެލެހެއްޓިގެންދާނީ އެންމެ ޒަމާނީ ވަސީލަތްތަކުގެ އެހީގައިކަންވެސް ރައީސް ފާހަގަކުރެއްވިއެވެ.