ވީއައިއޭއިން މަސްތުވާތަކެތި ބޭރުކުރަން އުޅުނު މައްސަލައެއްގައި އެމްއޭސީއެލްގެ ދެ މުވައްޒަފަކު ހައްޔަރުކޮށް، އެކަކު ދޫކޮށްލައިފި

ވެލާނާ އިންޓަނޭޝަނަލް އެއަރޕޯޓުން ގިނަ އަދަދެއްގެ މަސްތުވާތަކެތި ބޭރުކުރަން އުޅުނު މައްސަލައިގައި، އެމްއޭސީއެލްގެ ދެ މުވައްޒަފަކު ހައްޔަރު ކޮށްފައިވާކަމަށް ފުލުހުން ވިދާޅުވެއްޖެއެވެ.

މީޑިޔާތަކާ ހިއްސާކުރި މެސެޖެއްގައި ފުލުހުން ވިދާޅުވީ، މާޗު މަހުގެ 15 ވަނަ ދުވަހު، މަސްތުވާތަކެތި ހުރި ލަގެޖެއް، ވެލާނާ އިންޓަނޭޝަނަލް އެއަރޕޯޓުން، އުސޫލުން ބޭރުން ބޭރުކުރަން އުޅުނު މައްސަލައިގައި، ޕާކިސްތާނު މީހަކާއި، ލަގެޖާ ހަވާލުވާން ދިޔަ މީހާގެ އިތުރުން އެމްއޭސީއެލްގެ ދެ މުވައްޒަފުން ހައްޔަރު ކުރި ކަމަށެވެ.

ނަމަވެސް ހައްޔަރު ކުރި މީހުންގެ ތެރެއއިން، އެންމެ އިސްމީހާ ކަމަށް ބެލެވޭ އެމްއޭސީއެލްގެ ސީނިއަރ މުވައްޒަފަކު ވަނީ ދޫކޮށްލާފައެވެ. ފުލުހުން މައުލޫމާތު ދެއްވިގޮތުގައި، އެމްއޭސީއެލް މުވައްޒަފެއް ދޫކޮށްލާފައިވަނީ ބަންދުގެ މުއްދަތު އިތުރު ކުރުމަށް ގެންދިޔުމުން، ކޮންމެވެސް ވަރަކަށް ހެކި ހުރި ނަމަވެސް ޝަރުތުކޮށްފައެވެ.

ވެލާނާ އިންޓަނޭޝަނަލް އެއަރޕޯޓުން މާޗު މަހުގެ 15 ވަނަ ދުވަހު އަތުލައިގަންފައިވާ ލަގެޖުން ހިރޮއިން އަދި މެތު ވެސް ފެނިފައިވާއިރު، މިތަކެތީގައި ޖުމުލަ 4.5 ކިލޯއަށްވުރެ ގިނައިން ހުއްޓެވެ. ފުލުހުން ވިދާޅުވެފައިވަނީ މި މައްސަލައަކީ ޖިނާއީ ބޮޑު ތަޙްޤީގެއް ކުރަމުންދާ، ވަރަށް ސީރިއަސްކޮށް ބަލަމުންދާ މައްސަލައެއް ކަމަށެވެ.