ކޯޓު އަމުރަކާއި ނުލާ ހައްޔަރު ކުރެވޭ ގޮތަށް ކޮމެޓީން ފާސްކޮށްފި

ޓެރަރިޒަމްގެ ކުށުގެ ތުހުމަތުގައި ހައްޔަރު ކުރެވޭ ފަރާތް ކޯޓު އަމުރަކާއި ނުލާ، ހައްޔަރު ކުރެވޭ ގޮތަށް ސަރުކާރުން ހުށަހެޅި ޓެރަރިޒަމްގެ ގާނޫނު ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކާ ބެހޭ ކޮމިޓީ އިން ފާސްކޮށްފިއެވެ.

ޓެރެރިޒަމް ޤާނޫނަށް ސަރުކާރުން ހުށަހެޅި އިސްލާހުތަކާއެކު ޓެރަރިޒަމްގެ ބިލް ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކާބެހޭ ކޮމިޓީއިން ފާސްކޮށްފިއެވެ.

މީގެ ތެރެއިން އެންމެ ފާހަގަކުރެވޭ އިސްލާހަކީ ޓެރަރިޒަމްގެ ކުށުގެ ތުހުމަތުގައި ހައްޔަރު ކުރެވޭ ފަރާތް ކޯޓު އަމުރަކާއި ނުލާ ހައްޔަރުކުރެވޭގޮތަށް ހުށަހަޅާފައިވާ އިސްލާހެވެ.

ޤައުމީ ސަލާމަތާއި ޚާރިޖީ ގުޅުންތަކާބެހޭ ކޮމިޓީގެ މުޤައްރިރު އިބްރާހީމް ޝަރީފް ވިދާޅުވީ ކޮމިޓީން މި ބިލު ފާސްކޮށްފައިވާނީ ޤައުމުގެ މިހާރުގެ ޙާލަތަށް ބަލައި ކަމާއިބެހޭ ފަރާތްތަކާއި ޢާންމުންނާއި މަޖިލިސް މެމްބަރުންގެ ޚިޔާލުތަކަށް ބަލައި އެކަންކަމަށް ރިޢާޔަތްކުރުމަށް ފަހުގައި ކަމަށެވެ.

ބިލުގައި ބަޔާން ކޮށްފައިވާ ގޮތުގައި ހަނގުރާމަ ކުރުމަށް ހަނގުރާމަ ހިނގާ ސަރަހައްދަކަށް ދާން އުޅުމާއި ދިއުމާއި ހަނގުރާމައަށް މީހުން ފޮނުވުމަކީ ވެސް ކުށެކެވެ. އަދި ހަނގުރާމައަށް ދިއުމަށް ހިތްވަރު ދިނުމަކީ ވެސް ކުށެއް ކަމަށް ބިލުގައި ބުނެފައިވެއެވެ.

މީގެއިތުރުން މި ޤާނޫނުގައި ޓެރަރިސްޓު ޖަމާއަތެއްގެ މެންބަރެއްކަން ނުވަތަ އެފަދަ ޖަމާއަތަކަށް ތާއީދުކުރާ މީހެއްކަމަށް ދޭހަވާފަދަ އަންނައުނެއް ލުން ނުވަތަ އެފަދަ ދޭހައެއްވުން އެކަށީގެންވާ ލިޔުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމަކީ ވެސް ކުށެކެވެ.

މިކަމަކީ ޢާންމުންގެ މެދުގައި ފާޑުކިޔުން އަމާޒުވެފައިވާ ކަމެއްކަން ފާހަގަކޮށްލަންޖެހެއެވެ.

ސަރުކާރުގެ ފަރާތުން ޓެރަރިޒަމްގެ ގާނޫނަށް އިސްލާހު ހުށަހެޅީ މަޖިލިސް ޗުއްޓީގައި ވަނިކޮށެވެ.

ޓެރަރިޒަމްގެ ބިލަށް ސަރުކާރުގެ ފަރާތުން އިސްލާޙު ހުށަހަޅުއްވާފައިވަނީ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙްޤީޤްކުރާ ކޮމިޝަނުގެ މަސައްކަތް ފުރިހަމަކުރުމުގައި ޤާނޫނީ ގޮތުން ކުރިމަތިވާ ގޮންޖެހުންތަކަށް ހައްލެއް ހޯދުމަށެވެ.