ޑިމޮކްރަސީގެ ނަމުގައި، ޑެމޮކްރަޓިކް ޓެރަރިޒަމް ހިންގި؛ އައު އިސްލާހުން އެކަންކަން ހުއްޓުވޭނެ: އިބްރާހީމް

ޑިމޮކްރަސީގެ ނަމުގައި، ބައެއް ޕާޓީތަކުން ޑެމޮކްރަޓިކް ޓެރަރިޒަމް ހިންގި މަންޒަރު ފެނިގެންދިޔަ ކަމަކާ، ސިޔާސީ ޕާޓީތަކުގެ ގާނޫނަށް ގެންނަން ނިންމާފައިވާ އިސްލާހުން އެފަދަ ކަންކަން ހުއްޓުވޭނެ ކަމަށް މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުޙައްމަދު (އިއްބެ ޖަނާބު) ވިދާޅުވެއްޖެއެވެ.

ސިޔާސީ ޕާޓީތަކުގެ ގާނޫނަށް ހުށައަޅާފައި އޮތް އިސްލާހަށް ބަހުސް ކުރައްވަމުން އިއްބެ ވިދާޅުވީ، މިއީ މިއަދު ރާއްޖެއަށް ވަރަށް ބޭނުންޖެހިފައިވާ އިސްލާހުތަކެއްކަމަށެވެ.

މިއާއެކު، މިއަދުގެ މަޖިލީހުގައި ކެންދޫ ދާއިރާގެ މެންބަރު މައުރޫފް ޒާކިރު، އެމެރިކާގައި ރައްޔިތުން ދެ ސިޔާސީ ފިކުރަށްވުރެ ގިނަ ފިކުރު ބޭނުންވާކަމަށާ، އެކަމުންވެސް ގިނަ ސިޔާސީ ޕާޓީތަކުގެ މައްޗަށް އެކުލެވޭ ނިޒާމެއްގެ މުހިންމުކަން ހާމަވާކަމަށް ވިދާޅުވެ ދެއްކެވި ވާހަކަތަކަށް އިއްބެ ވަނީ ރައްދުދެއްވާފައެވެ.

އެގޮތުބް އިއްބެ ވިދާޅުވީ، އެމެރިކާ އަކީ އދ ގެ ޗާޓަރާވެސް ދެކޮޅަށް އެތައް ހަނގުރާމަކޮށް، 31 މިލިއަން މީހުންގެ ގަތުލުގެ ޒިންމާވާ ބައެއް ކަމަށެވެ. އެމީހުން ހިންގާފައިވަނީ ޑިމޮކްރަޓިކް ޓެރަރިޒަމް ކަމަށާ އެކަންކަން ކޮށްފައިވަނީ އިސްލާމީ ދައުލަތްތަކާއި ދެކޮޅަށް ކަމަށް އޭނާ ވިދާޅުވިއެވެ. އަދި ރާއްޖޭގައިވެސް ޑިމޮކްރަސީގެ ނަމުގައި، ޑިމޮކްރެޓިކް ޓެރެރިޒަމް ބައެއް ސިޔާސީ ޕާޓީތަކުން ހިންގާކަމަށް އޭނާ ވިދާޅުވިއެވެ.

ރާއްޖޭގައިވެސް ޑިމޮކްރަސީގެ ނަމުގައި، ޑިމޮކްރެޓިކް ޓެރެރިޒަމް ހިންގަމުންދިޔައީ ބައެއް ސިޔާސީ ޕާޓީ ތަކުން، ސިޔާސީ ކަންކަން ތަންފީޒުކުރުމުގެ ނަމުގައި. އަޅުގަނޑުމެންނަށް ފެނިގެން ދިޔަ ޑިމޮކްރެޓިކް ޓެރެރިޒަމް ހިންގި މަންޒަރު މަޖީދީ މަގުގަ، ފުލުހުންނާއި ދެކޮޅަށް އަލިފާން ބޯޅަ އުކި މަންޒަރު، އަޅުގަނޑުމެންނަށް ފެނިގެންދިޔަ 2012 ގައި ފުރުގާން މިސްކިތަށް ނަމާދު ކުރަން ތިބި ބައެއްގެ ބޮލަށް ގާ އުކަމުންދިޔަ މަންޒަރު. އަޅުގަނޑުމެންނަށް ފެނިގެންދިޔަ ސިޔާސީ ހަރަކާތްތަކުގެ ނަމުގައި މާ ބަނޑު ފުލުހަކަށް އަނިޔާދެވިގެން ދިޔަ މަންޒަރު. މިއީ ސިޔާސީ ޕާޓީ ތަކުން އޯގަނައިޒް ކޮށްގެން، ޓެރަރިޒަމް ހިންގާގޮތް

މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުޙައްމަދު (އިއްބެ ޖަނާބު)

މިއާއެކު އިއްބެ ވިދާޅުވީ، އެފަދަ ކަންކަމަކީ ޒިންމާދާރު ކުރުވައި، ޖިނާއީ އަދުލުގެ ތެރެއިން ހުއްޓުވެން ޖެހޭ ކަންކަންކަމަށެވެ. އަދި ”ސިޔާސީ މަސައްކަތް ކުރުމުގެ މާނައަކީ ޓެރެރިޒަމް ހިންގުމެއް ނޫން“ ކަމަށާ އެއީ "ދިވެހީން މުދަލަށް ގެންލުން ދިނުންވެސް ނޫން“ ކަމަށް ވިދާޅުވިއެވެ.

241 މިލިއަން ރުފިޔާއަށް ވާވަރަށް ފުލުހުންގެ މުއައްސަސާތައް އަންދާލެވުނީވެސް ސިޔާސީ މަސައްކަތުގެ ނަމުގައި. ކިތައް ކޯޓުގައި ތީ ހުޅުޖެހީ؟ ކިތައް ފުލުހުންގެ އިދާރާގައިތޯ ހުޅުޖެހީ. މިއީ ސިޔާސީ ޕާޓީތަކުން ކޮށްފައި ހުރި ކަންކަން.

މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުޙައްމަދު (އިއްބެ ޖަނާބު)

އިއްބެ ވިދާޅުވީ އެފަދަ ކަންކަން ރާއްޖޭގައި ހުއްޓުވަންޖެހޭ ކަމަށާ، ހިންގެނީ ހަމައެކަނި އިސްލާމީ ޓެރަރިޒަމް ނޫން ކަމަށާ ޑިމޮކްރަސީގެ ނަމުގައުވެސް ޓެރަރިޒަމް ހިންގޭ ކަމަށެވެ.

އަދި ސިޔާސީ ޕާޓީތަކަށް ސަރުކާރުގެ ފަރާތުން ހުށަހަޅާފައިވާ އިސްލާހުތަކުން، އެކަންކަން ބަލަހައްޓައި، މިފަދަ އަމަލުތަކަށް ޒިންމާދާރު ކުރެވޭނެކަމަށްވެސް ވިދާޅުވިއެވެ.