ސިޓީ ކައުންސިލްގެ ފަރާތުން މާލޭގެ ރައްޔިތުންނާއި ބައްދަލުކުރަނީ

މާލޭ ސިޓީގެ ރައްޔިތުންނާއި ބައްދަލުވުމެއް ބޭއްވުމަށް މާލޭ ސިޓީ ކައުންސިލްގެ ފަރާތުން ނިންމައިފިއެވެ.

މި ބައްދަލުވުމަކީ ލާމަރުކަޒީ ޤާނޫނުގެ 110 ވަނަ މާއްދާގައި ބަޔާންކޮށްފައިވާ ގޮތުގައި މަތިން ސިޓީ ކައުންސިލުން ރައްޔިތުންނާއި ބައްދަލުކުރުމަށް ބާއްވަން ޖެހޭ ބައްދަލުވުމެކެވެ.

މާލޭ ސިޓީ ކައުންސިލުން އިއްޔެ ކުރި އިއުލާނެއްގައި ބުނެފައިވާ ގޮތުން މާލޭގެ ރައްޔިތުންނާއި ބައްދަލުކުރުން އޮންނާނީ މާޗް މަހުގެ 11 ވަނަ ދުވަހުގެ ރޭ 8:15ގައި ދަރުބާރުގޭގައެވެ.

މި ބައްދަލުވުމަށް މާލޭގެ ހުރިހާ ރައްޔިތުންނަށް ވެސް ދައުވަތު އަރުވާފައެވެ.

2017 ވަނަ އަހަރު ބޭއްވި މާލޭ ސިޓީ ކައުންސިލްގެ އިންތިޚާބުގައި މާލޭ ސިޓީ ކައުންސިލްގެ 13 ގޮނޑީގެ ތެރެއިން އެންމެ ގޮނޑިއެއް ފިޔަވައި ހުރިހާ ގޮނޑިއެއް ކާމިޔާބު ކުރީ އެމްޑީޕީންނެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި މާލޭ ސިޓީ ކައުންސިލްގެ ބާރުތައް ވަރަށް ބޮޑަށް ހަނިކުރިއެވެ. އެހެން ނަމަވެސް ރައީސް އިބްރާހިމް މުހައްމަދު ސޯލިޙް ވެރިކަމަށް ވަޑައިގެންނެވުމަށް ފަހު ވަނީ ކައުންސިލްތަކަށް އަލުން ބާރުތައް ދެއްވާފައެވެ.

އެއާއި އެކު މާލޭ ސިޓީ ކައުންސިލްގެ ފަރާތުން ވެސް ދަނީ މާލޭގެ ރައްޔިތުންގެ ލާބައާއި މަންފާއަށްޓަކައި ގިނަ ކަންތަކެއް ކުރަން ފަށާފައެވެ.