މަޖިލީހުގެ ތިން މެންބަރަކަށް ހަދިޔާގެ ގޮތުގައި މިލިއަނެއްހާ ރުފިޔާ

ރައްޔިތުންގެ މަޖިލީހުގެ ތިން މެންބަރަކަށް ހަދިޔާގެ ގޮތުގައި މިލިއަނެއްހާ ރުފިޔާލިބިފައިވާކަމަށް ރައްޔިތުންގެ މަޖިލީހުން އާންމުކުރި  މެންބަރުންގެ މާލީ ބަޔާންތަކުން ހާމަވެއްޖެއެވެ.

މަޖިލީހުގެ އިދާރާއިން އަންގާރަ ދުވަހު އާންމުކުރި މެންބަރުންގެ އަހަރީ މާލީ ބަޔާންތަކުގައިވާ ގޮތުން، ހަދިޔާގެ ގޮތުގައި ފައިސާ ލިބިވަޑައިގެންފައިވަނީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި، މާފަންނު ދެކުނު ދާއިރާގެ މެންބަރު އަބްދުﷲ ރިފާއު އަދި ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝާމްހީދަށެވެ. މީގެ ތެރެއިން މަޖިލީހުގެ ރައީސް އަބްދުއްރަހީމާއި މެންބަރު ރިފާއު އަކީ ވެރިކަންކުރާ ޕީއެންސީއަށް ނިސްބަތްވެވަޑައިގަންނަވާ ދެ ބޭފުޅުންނެވެ.

ޕީއެންސީގެ ޗެއާޕާސަންގެ މަގާމުގައި ވެސް ހުންނެވި މަޖިލީހުގެ ރައީސް އަބްދުއްރަހީމް ހާމަކުރައްވާފައިވާ ގޮތުގައި، އެ މަނިކުފާނަށް ހަދިޔާގެ ގޮތުގައި 120,191.76 ރުފިޔާ ވަނީ ލިބިވަޑައިގެންފައެވެ. އަދި އެ ފައިސާ ހޭދަކުރައްވާފައިވަނީ ދަތުރުފަތުރުގެ ކަންކަމަށާއި ކްރެޑިޓް ކާޑުގެ ބިލްތައް ދެއްކެވުމަށް ކަމަށް އެ މަނިކުފާނުގެ ބަޔާނުގައި ބަޔާންކުރައްވާފައިވެއެވެ.

މީގެ އިތުރުން، މެންބަރު ރިފާއުއަށް ހަދިޔާގެ ގޮތުގައި 300,000 ރުފިޔާ ލިބިވަޑައިގެންފައިވާއިރު، މެންބަރު ޝާމްހީދަށް ވަނީ ހަދިޔާގެ ގޮތުގައި 36,000 އެމެރިކާ ޑޮލަރު (ގާތްގަނޑަކަށް 555,120 ރުފިޔާ) ލިބިވަޑައިގެންފައެވެ. ނަމަވެސް، މި ދެ ބޭފުޅުންނަށް ލިބިވަޑައިގެންނެވި ފައިސާ ހޭދަކުރެއްވި ގޮތުގެ ތަފްސީލެއް މާލީ ބަޔާނުގައި ހާމަކުރައްވާފައެއް ނުވެއެވެ.

ރައްޔިތުންގެ މަޖިލީހުގެ އިދާރާއިން މަޢުލޫމާތު ދެއްވި ގޮތުގައި، މާލީ ބަޔާން ހުށަހެޅުމުގެ ސުންގަޑި ކަމަށްވާ އޮގަސްޓް 31 ގެ ނިޔަލަށް 93 މެންބަރުންގެ ތެރެއިން 91 މެންބަރަކު ވަނީ ބަޔާން ހުށަހަޅުއްވާފައެވެ. ކަނޑައެޅިފައިވާ މުއްދަތުގައި ބަޔާން ހުށަނާޅުއްވަނީ ޕީއެންސީއަށް ނިސްބަތްވެވަޑައިގަންނަވާ ދެ މެންބަރުން ކަމަށްވާ މައްޗަންގޮޅި އުތުރު ދާއިރާގެ މެންބަރު އިބްރާހީމް މުޙައްމަދު (ޖަނާބު) އާއި ނައިފަރު ދާއިރާގެ މެންބަރު ޔާސީން އަބްދުﷲ އެވެ.

ރައްޔިތުންގެ މަޖިލީހުގެ ގަވާއިދު ބަޔާންކުރާ ގޮތުން، ކޮންމެ މެންބަރަކު ވެސް އެ ބޭފުޅެއްގެ އަހަރީ އާމްދަނީ އާއި، ބޭންކު އެކައުންޓްތަކުގައިވާ ފައިސާގެ އަދަދާއި، ނަންގަވާފައިވާ ލޯނުތަކުގެ އިތުރުން މިލްކިއްޔާތުގައިވާ އެންމެހައި މުދަލުގެ ތަފްސީލު ހިމެނޭ މާލީ ބަޔާނެއް ކޮންމެ އަހަރަކު މަޖިލީހަށް ހުށަހަޅަންޖެހެއެވެ. މީގެ އިތުރުން، ވިޔަފާރި ކުންފުނިތަކުގެ ހިއްސާ އާއި، އަތުގައި ހުރި ނަގުދު ފައިސާ އާއި، ވިއްކާފައިވާ މުދަލުގެ ތަފްސީލުގެ އިތުރުން އަމިއްލަ ފިކުރީ މުދަލުގެ މައުލޫމާތު ވެސް ހިމަނަންޖެހެއެވެ.

ހަމައެއާއެކު، ދެފުށް ފެންނަ ގޮތެއްގައި ކަންކަން ކުރިއަށް ގެންދިއުމުގެ ގޮތުން، މެންބަރުންގެ އަނބިކަނބަލުން ނުވަތަ ފިރިކަލުން އަދި 18 އަހަރު ނުފުރޭ ދަރިންގެ މާލީ މައުލޫމާތުތައް ވެސް މި ބަޔާނުގައި ފުރިހަމައަށް ހާމަކުރުމަކީ ގާނޫނުން ލާޒިމުކުރާ ކަމެކެވެ.