ރައީސްގެ ޕޯލް: ގިނަ މީހުން ބޭނުންވަނީ 2000ގެ ފަހުން އުފަންވި އެންމެނަށް ސިނގިރޭޓް މަނާކުރަން

ރާއްޖޭގައި ދުންފަތް މަނާކުރަންވީ އުމުރަކާއި ގުޅޭގޮތުން ރައްޔިތުންގެ ޚިޔާލު ހޯއްދެވުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހުޅުވާލެއްވި ޕޯލްގައި ގިނަ ބަޔަކަށް ބޭނުންވަނީ 2000ގެ ފަހުން އުފަންވި އެންމެނަށް ސިނގިރޭޓް މަނާކުރަން ކަމަށް ދައްކައިފި އެވެ.

ރައީސުލްޖުމްހޫރިއްޔާ ސޯޝަލް މީޑިއާގެ ތިން މަންސައެއް ގައި ހުޅުވެވި އެ ޕޯލަށް ވޯޓް ދިނުމުގެ ފުރުސަތު މީގެ ކުޑައިރުކޮޅެއްގެ ކުރީން ވަނީ ބަންްދުވެފަ އެވެ. ޕޯލް ކުރިއަށް ގެންދެވީ ހަތަރު ދުވަހުގެ މުއްދަތަށެވެ.

އެމަނިކުފާނުގެ ޕޯލް ގައި ވިދާޅުވީ ދުންފަތުގެ ނުރައްކަލުން ޒުވާން ޖީލާއި އަންނަން އޮތް ޖީލު ސަލާމަތް ކުރެއްވުމަށް ކުރައްވާ މަސައްކަތުގެ ދަށުން ދުންފަތް މަނާ އުމުރެއް ރާއްޖޭގައި ކަނޑައަޅުއްވަން ނިންމަވާފައިވާ ކަމަށެވެ. އެކަމަށް ރައްޔިތުން ހިޔާލު ދެއްވުމަށް އެމަނިކުފާނު އެދިވަޑައިގެންނެވި އެވެ. ރަައީސްގެ ޕޯލް ގައި ވަނީ ތިން އުމުރުފުރައެއް ފާހަގަ ކުރައްވާފަ އެވެ.

ރައީސްގެ ޕޯލް

ގިނަ ބަޔަކު ވޯޓް ދިނީ ޖަނަވަރީ 1, 2000 އިން ފެށިގެން އުފަންވި އެންމެނަށް ދުންފަތް މަނާކުރުމަށެވެ. އެގޮތަށް ފެންނަ ކަމަށް 51.1 ޕަސެންޓް މީހުން ވޯޓް ދީފައިވެ އެވެ.

ރައީސްގެ މި ޕޯލް 127 ހާހަށް ވުރެ ގިނަ މީހުން ވިއުކޮށްފައިވެ އެވެ. 5,500 ވުރެ ގިނަ މީހުން ވޯޓް ދީފައިވެ އެވެ.

ފޭސްބުކުގައި މި ޕޯލަށް ވޯޓް ދިން މީހުންގެ ތެރެއިން 72 ޕަސެންޓް މީހުން ވޯޓް ދިނީ ޖަނަވަރީ 1, 2000 އިން ފެށިގެން އުފަންވި އެންމެނަށް ދުންފަތް މަނާކުރުމަށެވެ. އިންސްޓަގްރާމްގައި އެ އުމުރުފުރައިން ފެށިގެން ދުންފަތް މަނާކުރަން 45 ޕަސެންޓް މީހުން ވޯޓް ދިނެވެ.

ދުންފަތުން ދިވެހިން ސަލާމަތް ކުރުމަށް ސަރުކާރުން ދަނީ މުހިންމު ފިޔަވަޅުތަކެއް އަޅުއްވަމުންނެވެ. އާންމުންގެ ތެރޭގައި ކޮންމެވެސް ވަރަކަށް އެކަމާމެދު ހިޔާލުތަފާތުވުން އޮތް ނަމަވެސް ވަަރަށް ގިނަ ބަޔަކު ދަނީ ސަރުކާރުގެ ފިޔަވަޅުތަކަށް ތާއީދު ކުރާކަން ހާމަ ކުރަމުންނެވެ.

ސަރުކާރުން މިހާރު ވަނީ ރާއްޖޭގައި ވޭޕު ކުރުން ވެސް މަނާކޮށްފަ އެވެ. އެކަން ސަރުކާރުން ތަންފީޒު ކުރަން ފެށީ ވޭޕް ކުރުން ބޮޑު ފެޝަނަކަށް ވެ ދިވެހީންގެ ސިއްހަތު, އެކަމުން ވަރަށް ބޮޑު ނުރައްކަލަކަށް ހުށައެޅިފައިވަނިކޮށެވެ.