ހުޅުމާލެ ފޭސް ތިނެއްގެ ހިއްކަންޖެހޭ ބިމުގެ 77.8 އިންސައްތަ ބިން ހިއްކައި ނިމިއްޖެ
ލިޔުންތެރިޔާ
އަބްދުﷲ ހުސައިން
ހުޅުމާލޭ ފޭސް ތިނަކުން ހިއްކަންޖެހޭ ބިމުގެ 77.78 އިންސައްތަ ބިން ހިއްކާ ނިމިއްޖެކަމަށް އެ ޕްރޮޖެކްޓްގެ ވެރިފަރާތް މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމްއޭސީއެލުން ބުނެފިއެވެ.
އެމްއޭސީއެލުން އެކްސްގައި ކުރި ޕޯސްޓެއްގައި ބުނެފައިވަނީ، ހުޅުމާލޭ ފޭސް ތިނެއްގެ ބިން ހިއްކުމުގެ މަސައްކަތް ކަނޑައެޅިފައިވާ ތާވަލާއެއްގޮތަށް ވަރަށްބާރަށް ކުރިއަށްދާކަމަށެވެ. އެގޮތުން މިއަދާ ހަމަޔަށް އާއިރު 49 ހެކްޓަރުގެ ބިން ހިއްކައި ނިމިފައެވެ. ސަރުކާރުން ކަނޑައަޅާފައިވަނީ ފޭސް ތިނަކުން 63 ހެކްޓަރު ހިއްކުމަށެވެ.
ރައީސް ޑރ.މުހައްމަދު ހުޅުމާލޭ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ވަނީ ހުޅުމާލެ ފޭސް ތިނެއްގެ ބިން ހިއްކުމުގެ މަސައްކަތް ބާރުސްޕީޑްގައި ކުރިއަށްދާނޭކަމުގެ ޔަގީންކަން ދެއްވާފައެވެ.
ހުޅުމާލެ ފޭސް 3 ގެ ބިން ހިއްކުމުގެ މަސައްކަތް ފަށާފައިވަނީ މިދިޔަ އަހަރުގެ ސެޕްޓެމްބަރުމަހުގެ 24 ވަނަ ދުވަހުއެވެ. މި މަސައްކަތް މެދުކެނޑިފައި އޮތުމަށްފަހު އެންމެފަހުން މި މަސައްކަތް ފަށާފައިވަނީ ނޮވެމްބަރުމަހުގެ 10 ވަނަ ދުވަހުއެވެ.
ފޭސް ތިނެއްގެ ބިން ހިއްކުމުގެ މަސައްކަތް އަވަސްކުރުމަށް ސަރުކާރުން ވަނީ ބިންހިއްކުމުގައި ދުނިޔޭގެ އެންމެ މަޝްހޫރު އެއްކުންފުނި، ނެދަލޭންޑްސްގެ ބޮސްކާލިސްގެ ޑްރެޖަރެއް ގެނެސްފައެވެ. އެއީ 22,000 ސީބީއެމްގެ ޑްރެޖަރެކެވެ. ސަރުކާރުގެ އަމާޒަކީ މިއަހަރު ނިމުމުގެ ކުރިން ފޭސް ތިނެއްގެ ބިން ހިއްކުމުގެ މަސައްކަތް ނިންމައި މިއަހަރުގެ ތެރޭގައި އެތަނުން ގޯތި ދޫކޮށް ނިންމުމެވެ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
