ދެ މިލިއަން ވަނަ ފަތުރުވެރިޔާ ރާއްޖެއަށް މިއަދު ޒިޔާރަތްކޮށްފި

ރާއްޖޭގެ ފަތުރުވެރިކަމުގެ ސިނާއަތުގައި ފުރަތަމަ ފަހަރަށް ދެ މިލިއަން ފަތުރުވެރިން ރާއްޖެއަށް ޒިޔާރަތްކުރުމުގެ އަމާޒަށް މިއަދު ވާސިލްވެއްޖެއެވެ.

މިއަހަރުގެ ތެރޭގައި ރާއްޖެއަށް ޒިޔާރަތްކުރި ދެ މިލިއަން ވަނަ ފަތުރުވެރިޔާ މިއަދު ހެނދުނު ރާއްޖެ އައިސްފައިވާއިރު، ޓޫރިޒަމް މިނިސްޓްރީ އާއި އެމްއޭސީއެލްގެ އިތުރުން އެމްއެމްޕީއާރުސީއާ ފަތުރުވެރިިކަމުގެ ސިނާއަތުގައި ހަރަކާތްތެރިވާ ފަރާތްތަކުން ވަނީ އެ ފަތުރުވެރިޔާއަށް މަރުހަބާކިޔާފައެވެ. މިކަމަށްޓަކައި ވެލާނާ އިންޓަރނޭޝަނަލް އެއާޕޯޓްގައި ހަފްލާއެއް ބާއްވާފައިވާއިރު، މި ހަފްލާ ޝަރަފްވެރިކޮށަްދެއްވީ ޓޫރިޒަމް މިނިސްޓަރު އިބްރާހީމް ފައިސަލް އެވެ. ދެމިލިއަން ވަނަ ފަތުރުވެރިއަކީ އޮސްޓްރިއާގެ އެސްޓްރިޑް ޑިރްނެގަރ އެވެ.

ރާއްޖެއަށް ދެ މިލިއަން ފަތުރުވެރިން މިއަދު ޒިޔާރަތްކޮށްފައިވާއިރު، ސަރުކާރުން ވަނީ މިއަހަރުގެ ތެރޭގައި ދެ މިލިއަން ފަތުރުވެރިން ރާއްޖެ ގެނައުމަށް އަމާޒުހިފާފައެވެ. މިއަހަރުގެ މިހާތަނަށް ރާއްޖެއަށް އެންމެގިނައިން ފަތުރުވެރިން ޒިޔާރަތްކުރި ޤައުމުތަކުގެ ތެރޭގައި ހިމެނެނީ ޗައިނާ، ރަޝިއާ، އިނގިރޭސިވިލާތް، ޖަރުމަނުވިލާތް އަދި އިޓަލީވިލާތެވެ.

އަހަރުގެ މިހާތަނަށް ޓޮޕް 5 މާކެޓް:

1. ޗައިނާ: 261,821

2. ރަޝިއާ: 217,724

3. އިނގިރޭސިވިލާތް: 176,312

4. ޖަރުމަނުވިލާތް: 153,319

5. އިޓަލީވިލާތް: 136,916

ސަރުކާރުން ވަނީ ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކުރުމުގެ ގޮތުން އެ ސިނާއަތުގެ ވިޔަފާރީގެ ދާއިރާތައް ފުޅާކުރުމަށް ކަންތައްތަކެއް ކުރުމަށް ނިންމާފައެވެ. މިގޮތުން މޯލްޑިވިއަންގެ ފްލީޓަށް އެއާބަސް މަރުކާގެ ވައިޑް-ބޮޑީ އެއާރކްރާފްޓެއް ގެނެސް މުހިއްމު ބައެއް މާކެޓްތަކަށް ދަތުރުތައް ބޭއްވުމަށް ދަނީ ތައްޔާރުވަމުންނެވެ. މިގޮތުން އެންމެ ފުރަތަމަ ދަތުރުތައް ބޭއްވުމަށް ހަމަޖެހިފައިވަނީ ޗައިނާގެ ތިން ސިޓީއަކަށެވެ. އެއީ ބެއިޖިން، ޗެންދޫ، އަދި ޝަންހާއީއެވެ.

އެ ތިން މަންޒިލަކީ މީގެ ކުރިންވެސް ރާއްޖެއަށް ސީދާ ދަތުރުތައް ބޭއްވި މަންޒިލްތަކެވެ. ޗައިނާއަކީ ރާއްޖޭގެ ފަތުރުވެރިކަމުގެ ސިނާއަތުގައި ވަރަށް މުހިއްމު މާކެޓެއްކަމަށް މޯލްޑިވްސް މާކެޓިން ޕީއާރު ކޯޕަރޭޝަނުން ބުނެއެވެ. ކޮވިޑް ކުރިއަށްޖެހިލާއިރު، އެއް ޤައުމަކުން ރާއްޖެއަށް އެންމެގިނަ ފަތުރުވެރިން ރާއްޖެއަށް ޒިޔާރަތްކުރަމުން އައި މަންޒިލަކީ ޗައިނާއެވެ. ކޮވިޑަށްފަހު ޗައިނާއިން ރާއްޖެއަށް ޒިޔާރަތްކުރަމުން އައި ފަތުރުވެރިންގެ އަދަދު ދަށްވިނަމަވެސް މިއަހަރުގެ ތެރޭ ޗައިނާއިން އަނެއްކާވެސް ވަނީ ރާއްޖޭގެ ފަތުރުވެރިކަމުގެ ސިނާއަތުގެ އެއްވަނަ މާކެޓަށް ވެފައެވެ. މިއަހަރުގެ މިހާތަނަށް ޗައިނާގެ ސިޓީތަކުން ރާއްޖެއަށް 261,821 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.