ސުޕްރީމް ކޯޓަށް ދެ ފަނޑިޔާރުން ނެގުން: ޖޭއެސްސީގެ ހޮވުމަކީ ސަލީމާއި ހަމީދު

ސުޕްރީމް ކޯޓުގެ ހުސްވެފައިވާ ފަނޑިޔާރުކަމުގެ މަގާމަށް ކުރިމަތިލުމަށް ހުޅުވާލި ފުުރުސަތުގައި ކުރިމަތިލެއްވި ބޭފުޅުންނާއި އިންޓަވިއު ކުރުމަށް ފަހު ފަނޑިޔާރު ކަމަށް ހަމަޖެއްސުމަށް ޖުޑީޝަލް ސާވިސް ކޮމިޝަނަށް ފެންނަ ދެ ނަމެއް ކަނޑައަޅައިފި އެވެ.

ސުޕްރީމް ކޯޓަށް ފަނޑިޔާރުން ހޯދަނީ އެ ކޯޓްގެ ދެ ފަނޑިޔާރަކު މަގާމުން ވަކިކުރުމާއި ގުޅިގެންނެވެ. ސުޕްރީމް ކޯޓުގެ ފަނޑިޔާރުކަމުން މަހާޒު އަލީ ޒާހިރާއި، ޑރ. އަޒްމިރަލްދާ ޒާހިރު ވަކިކުރީ ޖޭއެސްސީން އެ ދެ ފަނޑިޔާރުން މަގާމުން ވަކިކުރަން ނިންމާ އެކަން ރައްޔިތުންގެ މަޖިލީހަށް ހުށައެޅުމުން އެ މަޖިލީހުގައި ނެގުނު ވޯޓުންނެވެ.

ފަނޑިޔާރު ކަމަށް ކުރިމަތިލުމުގެ ފުރުސަތު ޖޭއެސްސީން ހުޅުވާލާފައި އޮތީ މި މަހުގެ 22 ވަނަ ދުވަހުގެ ނިޔަލަށެވެ. މުއްދަތު ހަމަވިއިރު 12 ބޭފުޅަކު ކުރިމަތިލެއްވި އެވެ. އޭގެ ތެރޭގައި ހައިކޯޓްގެ ފަނޑިޔާރުންނާއި ފަނޑިޔާރު ކަމުން ވަކިވެވަޑައިގެންފައިވާ ބޭފުޅުން ހިމެނެ އެވެ.

އެ ބޭފުޅުންނާއި އިންޓަވިއު ކުރުމަށް ފަހު ޖޭއެސްސީން އެންމެ މަތީން މާކުސް ދީފައި ވަނީ ހައި ކޯޓުގެ ފަނޑިޔާރު މުހައްމަދު ސަލީމާއި އެ ކޯޓުގެ ކުރީގެ ފަނޑިޔާރު އަބްދުﷲ ހަމީދަށެވެ. ސުޕްރީމް ކޯޓްގެ ފަނޑިޔާރު ކަމަށް ދެ ބޭފުޅުންގެ ހަމަޖެއްސުމަށް ރައީސަށް ލަފާ އެރުވުމަށް ވަނީ ނިންމާފަ އެވެ.

ސުޕްރީމް ކޯޓްގެ ފަނޑިޔާރު ކަަަމަށް ހައިކޯޓްގެ އިސް ފަނޑިޔާރު މުހައްމަދު ފައިސަލް އާއި ކުރީގެ މަޖިލީސް މެންބަރު މުހައްމަދު ވަހީދު އިބްރާހިމް އާއި ކުރީގެ ފަނޑިޔާރުން ކަމަށްވާ އަބްދުލް ގަނީ މުހައްމަދާއި ސުޖާއު އުސްމާން އާއި އަހުމަދު ހައިލަމް އާއި މުހައްމަދު ރާގިބު އަހުމަދު ވެސް ކުރިމަތި ލެއްވި އެވެ.

އަދި ކުރީން ވެސް ސުޕްރީމް ކޯޓްގެ ފަނޑިޔާރު ކަަމަށް ކުުރިމަތިލެއްވި މަރްޔަމް ނިހާޔަތުގެ އިތުރުން އައިޝަތު ފަޒްނާ އަހުމަދު އާއި އިބްރާހިމް އަލީ ވެސް ކުރިމަތިލެއްވި އެވެ.