އާސެނަލް ބަލިވެ ގަދަ ހަތަރަކަށް ނޭރުމުގެ ބިރު ބޮޑުވެއްޖެ

އާސެނަލް އަދި ވެސްޓް ހަމް ޔުނައިޓެޑް ބައްދަލުކުރި 1-0 ގެ ހަނި ނަތީޖާއަކުން ކާމިޔާބުކުރީ ވެސްޓް ހަމްއެވެ.

ދާދި ހަމަހަމަ ކުޅުމެއް ފެނިގެން ދިޔަ މި މެޗުގައި ފެނުނު ހަމައެކަނި ލަނޑު ވެސްޓް ހަމްއަށް ކާމިޔާބުކޮށްދިނީ އެޓީމުގެ ޒުވާން ތަރި ޑެކްލަން ރައީސްއެވެ. ރައީސްގެ ލަނޑު ކާމިޔާބުކޮށްދިނުމުގައި އެހީތެރިވެދިނީ އާސެނަލްގެ ކުރީގެ ތަރި އަދި މިހާރު ވެސްޓް ހަމްއަށް ކުޅެމުން އަންނަ ސަމީރް ނަސްރީއެވެ.

މެޗަށް ފަހު ރައީސްއައި ބެހޭ ގޮތުން ވާހަދަ ދައްކަމުން ވެސްޓް ހަމްގެ ކޯޗް ޕެލެގިރިނީ ބުނީ މެޗަކަށް ފަހު މެޗެއް ރައީސް ރަނގަޅު ކުރަމުން އަންނަ ކަމަށައި އުމުރުން އެންމެ 19 އަހަރުގެ ކުޅުންތެރިޔަކައި އަޅައި ބަލާއިރު އޭނާގެ ޓެކްނީކް އަދި އޭރިއަލް ޑުއެލްތައް ވަރަށް ރަނގަޅު ކަމަށެވެ. މުސްތަގްބަލުގައި ފެންނާނެ އެންމެ މޮޅު ކުޅުންތެރިންގެ ތެރޭގައި ރައީސް ހިމެނޭނެކަމަށްވެސް ޕެލެގިރިނީވަނީ ބުނެފައެވެ.

މި މެޗުންވީ ބައްޔާއެކު އާސެނަލް އޮތީ 22 މެޗު ކުޅެގެން ލިބުނު 41 ޕޮއިންޓާއެކު ތާވަލުގެ ފަސްވަނައިގައެވެ. އާސެނަލްގެ ފަހަތުން ހަ ވަނައިގަ މެންޗެސްޓާ ޔުނައިޓެޑް އޮތީ 21 މެޗް ކުޅެގެން ލިބުނު 38 ޕޮއިންޓާއެކީއެވެ. ޔުނައިޓެޑް ކުރިއަށް އޮތް މެޗް ކާމިޔާބުކޮށްފިނަމަ އާސެނަލްއައި ޕޮއިންޓުގެ ގޮތުން އެއްވަރުވާނެއެވެ.

ޕްރިމިއާ ލީގުގައި ކުޅުނު އެހެން މެޗުތަކުގެ ނަތީޖާތަކަށް ބަލާލާއިރު ބާންލީވަނީ ރެލިގޭޝަން ޒޯނުގައި އޮތް ފުލަމް މައްޗަށް 2-1 ކުން ކުރި ހޯދާފައެވެ. ލެސްޓާ ސިޓީ 2-1 ކުން ސައުތްހެމްޕްޓަން އަތުން ބަލިވިއިރު ކްރިސްޓަލް ޕެލަސްގެ މައްޗަށް ވޮޓްފޯޑް ކާމިޔާބު ހޯދީވެސް 2-1 ކުންނެވެ.

ކާޑިފް ސިޓީ އަދި ހަޑަސްފީލް ބައްދަލުކުރި ފޯރިގަދަ މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.