ބައްޕާފުޅުގެ ފަނޑިޔާރު ހެދުންކޮޅު، ހައިކޯޓުން ރައީސް ޑރ.މުއިއްޒަށް އަރުވައިފި

ދިވެހިރާއްޖޭގެ ހައިކޯޓުގެ 44 ވަނަ އަހަރީ ދުވަހުގެ މުނާސަބަތުގައި މިރޭ ބޭއްވި ރަސްމިއްޔާތުގައި އެހެންޏާ މި ބާވަތުގެ ރަސްމިއްޔާތުތަކުން ނުފެންނަ ކަމެއް ފެނިގެންދިޔައެވެ.

އެއީ ހައިކޯޓްގެ ކުރީގެ ފަނޑިޔާރު އަދި ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ބައްޕާފުޅު، އަލްމަރުހޫމް ހުސެން އަބްދުއްރަހްމާންގެ ފަނޑިޔާރުކަމުގައި ހޭދަކުރެއްވިއިރު، ކޯޓްގައި ބޭނުންފުޅުކުރެއްވި ހެދުންކޮޅު (ގައުންކޮޅު) ރައީސް މުއިއްޒުއަށް ހަދިޔާކުރެއްވި ކުރެއްވުމެވެ.

މި ރަސްމިއްޔާތުގައި ރައީސް ޑރ.މުއިއްޒުގެ އަތްޕުޅަށް ބައްޕާފުޅުގެ ފަނޑިޔާރު ހެދުންކޮޅު އެރުވީ، ހައި ކޯޓުގެ އިސް ފަނޑިޔާރު ހުސެން ޝަހީދެވެ. ހެދުންކޮޅާއެކު މަރުހޫމް ހުސެން އަބްދުއްރަހްމާނުގެ ހިދުމަތުގެ އަގު ވަޒަންކުރުމުގެ ގޮތުން ރަމްޒީ ފިލައެއްވެސް ވަނީ ރައީސް ޑރ.މުއިއްޒަށް ހަދިޔާކުރައްވާފައެވެ.

ފަޟީލަތުއްޝައިޚް އަލްއުސްތާޛު އަލްމަރުޙޫމް ޙުސައިން ޢަބްދުއްރަޙްމާނަކީ، 5 އޮކްޓޫބަރު 1980 ގައި ދިވެހިރާއްޖޭގެ ހައިކޯޓު އުފައްދަވައި، އެ ކޯޓަށް ފުރަތަމަ ޢައްޔަނު ކުރެއްވި ފަނޑިޔާރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އެމަނިކުފާނު ޝަރީޢަތާ ޤާނޫނުގެ ރޮނގުން މަތީ ތަޢުލީމު ޙާޞިލްކުރައްވާފައިވަނީ މިޞްރުގެ އަލްއަޒްހަރު ޔުނިވަރސިޓީއިންނެވެ.

ހއ.ވަށަފަރަށް ނިސްބަތްވެ ވަޑައިގަންނަވާ މަރުހޫމް ހުސެއިން އަބްދުއްރަހްމާނަކީ ނިޔާ އިއްވުމުގައި އަދުލުވެރި ފަނޑިޔާރެކެވެ. އަދި ހަމައެހެންމެ، ރައްޔިތުންގެ އިހުތިރާމް ލިބިފައިވާ ދީނީ އިލްމުވެރިއެއްވެސް މެއެވެ.

ދީނީގޮތުން ރައްޔިތުން ހޭލުންތެރިކުރެއްވުމަށް މަރްހޫމް އަބްދުއްރަހްމާން ކުރެއްވި އަގުހުރި މަސައްކަތްޕުޅުތަކުގެ ސަބަބުން އެމަނިކްފާނަށް ޤައުމީ އިނާމުވެސް ލިބިވަޑައިގެންނެވިއެވެ.

ދިވެހިންގެ ތެރޭގައި މަޝްހޫރުވެގެންދިޔަ "އަލީގެ މައްޗަށް އައްޔެއް" ފަދަ ދީނީގޮތުން މަޤްބޫލު އެތައް ޕްރޮގްރާމެއްގައި ދިވެހިރާއްޖޭގެ ޤައުމީ މީޑިއާ މެދުވެރިކޮށް އެމަނިކުފާނު ބައިވެރިވެވަޑައިގެންފައި ވެއެވެ. އަދި ދީނީ ތަޢުލީމު އުނގަންނައިދެއްވުމުގެ އިތުރަށް ޢިލްމީ އެކި މައުޟޫޢުތަކުގައި ދިރާސާކުރައްވަައި ލިޔުއްވާފައިވެއެވެ. އިސްލާމްދީނަށް ޚިދުމަތްކުރުމަށް ސަރުކާރުން އުފެއްދެވި ވަރަށް ގިނަ ކޮމިޓީތަކުގައިވެސް އެމަނިކުފާނު ވަނީ ހިމެނިވަޑައިގެންފައެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ، މަރުހޫމް ހުސެން އަބްދުއްރަހްމާނަށް ލިބިވަޑައިގެންނެވި ހަމައެކަނި ދަރިކަލުންނެވެ.